Read Tobelo O HIMATOKO 12 Bible Online

O HIMATOKO 12 - Tobelo bible

O HIMATOKO 12

¹Daha yamäke o dihangoka okianaga moi ihëra-hëranga deʼ kobiahaua. O ngoheka momatëngo mapäke o wange malako hokä amipakeanga, momaokoino o mede mal̄okuoka. Ami häekoka yamäke o makota o gahumu moi mamurumu ngimoi de hinotoka.

²O ngoheka gënanga de amiröehoka, deʼ karana ami öraha yadonoka amingohaka imakil̄au ho münanga mopöaka mahiri.

³ Daha yamäkeoli o dihangoka okianaga moi ihëra-hëranga. Naga moi o dodiha o naga madoka-dokara duruhë kahäpako mahäeke o gahumu tumidoka deʼ matataduku ngimoi. Mahäeke yögetongo yapäke o makota o gahumu moi.

⁴ De toënanga mabikini ënanga yatatauru o murumu o dihangoka maregu hange deʼ ihikaweli o duniauku. Madodiha o naga gënanga imaokoino mangoheka amihimangoka naga momau amingohaka imakil̄au gënanga de madungutu yal̄ahiri amingohaka, kade imakil̄au o ngohaka gënanga.

⁵ Daha o ngoheka gënanga amingohaka o nauru womatëngo aha wäpareta mata-mata o hoana de o berera manyawa de o diki-diki o behi. Mä o ngohaka gënanga mangohekaoka gënanga de yaöra, daha iwiao ma Jou Madutuika deʼ aikuruhi imomulia mahimangoka.

⁶Ho mangoheka gënanga mopiringana o tonaka ikökokakahaika, amingïika ma Jou Madutu wasösadiaoka mangale münanga. Mangïoka gënanga münanga aha imipaliara madëkana o wange o ribuhu moi de o ratuhu hinoto de mori butanga.

⁷ Daha o horogaka idadi o parangi. O Mikhael de aimalaekat-malaekat imateke parangi yalawani o dodiha o naga gënanga. Deʼ o dodiha o naga aimalaekat-malaekat iwïriwo, iwilawani o Mikhael.

⁸Mä o dodiha o naga gënanga ihihanga. Enanga de ma malaekat-malaekat ihigumal̄aokaua igogere o horogaka.

⁹ O dodiha o naga mapako-pako gënanga yaümo maporetika! Enanga ganga o dodiha mabereki maromanga o Ibilihi ekola o Womaha ma Dorou, naga yatipu-tipu o dunia mata-mataika. Enanga yaümo o duniauku de hagala to ëna mamalaekat.

¹⁰ Daha ngohi toihene o ilingi kahakuatil̄e o horogaka itemo, ”Orahanënanga maöraha ma Jou Madutu wahihalamati umati! Orahanënanga ma Jou Madutu wohidumutu Ai kuaha hokä o Koano! Orahanënanga ma Koano Wohihohalamati inahijöjäjajioka gënanga Unangö wohidumutu Ai kuaha! Hababu wäkokalaki nanga riadodoto o hutu de o wange ma Jou Madutu aihimangoka, iwihihupuoka o horogaka.

¹¹Tongone nanga roriadodoto yahohihangoka ënanga, de o Duba ma Ngohaka maawunu gënanga, deʼ de o abari madiai ma Jou Madutuino naga önanga ihingahu-ngahu. Onanga yömodeke manga nyawa ihitai hiädono yohonenge.

¹²Hababu gënanga kokiani o horoga deʼ mata-mata yogögogogere magoronaka, yomörene! Mä ibodito o dunia de o ngöto, hababu o Ibilihi iutioka nginiuku de madohata kahä amoko, karana ënanga ihiöriki maöraha mahou mahuhutulokahi.”

¹³Maöraha o dodiha o naga gënanga imamäo, ënanga yaümoka o duniauku, ënanga imuläenge imiginïki mangoheka amingohaka o nauru imakokil̄auoka gënanga.

¹⁴ Mä mangoheka gënanga imihidöaka o totaleo rajawali mapako-pako magahuhu o gahumu hinoto, hupaya münanga mohoho amingïika o tonaka ikökokakahaika, kiaka münanga aha imipaliara madëkana o taongo hange de mahononga, imihirehene de o dodiha o naga magoginïki.

¹⁵Done o dodiha o naga gënanga mauruiha ihiopuru o akere kahä amoko imimeta mangoheka gënanga la imihinahini.

¹⁶Mä o dunia imïriwo mangoheka gënanga; o dunia mauru yahelenga deʼ yal̄ahiri o akere ihöhupu-hupu o dodiha o naga toëna mauruiha gënanga.

¹⁷O dodiha o naga gënanga duru imingamo mangohekaika gënanga, hiädono ënanga ioiki yäginïki mangoheka gënanga amidifauku mahomoahi, enagënanga o nyawa mata-mata ihingou-ngounu ma Jou Madutu aipareta, deʼ ihidöa-döaka o hakihi mangale o Yesus deʼ touna Ai kuaha.

¹⁸Daha o naga gënanga imaokoino o hohanoka.