Read Tobelo O HIMATOKO 13 Bible Online

O HIMATOKO 13 - Tobelo bible

O HIMATOKO 13

¹ Ipahaika ngohi tamäke o aiwani o gahumu moi ipuda o ngötil̄e. Enanga matataduku ngimoi deʼ mahäeke tumidi. Matataduku yögëto-gëtongo naga o makota o gahumu moi, deʼ mahäeke yögëto-gëtongo yodulihika moi o romanga iwihikokauku ma Jou Madutuika.

² O aiwani ngohi tamömäke-mäke gënanga marupa hokä o harimau, deʼ mal̄ou hokä o beruang mal̄ou, deʼ mauru hokä o singa mauru. Daha o aiwani gënanga o dodiha o naga gënanga ihidöaka toëna mahirete makuata, deʼ toëna makuruhi imomulia deʼ toëna makuaha ilamo-amoko.

³O aiwani mahäeke o gahumu tumidi gënanga mahigoronaka moi hölega-lega hokä manabo duru kahäamoko, mä manabo gënanga itogumoka. O dunia mata-mataika yamoteke o aiwani gënanga de mangamamäo yohëranga.

⁴Deʼ onanga ihigogiriri yahoromati o dodiha o naga gënanga hababu ënanga ihidöakoka toënanga makuaha o aiwanika gënanga. Deʼ onanga ihigogiririö ma aiwani gënanga. Onanga yotemo, ”Koiwa naga imaketero de o aiwani nënanga! Koiwa naga yakunu yoparangi yalawani ënanga!”

⁵ O aiwani gënanga ihigumal̄a ihidemo hagala o hali duru i ëde-ëdenge deʼ iwihikokauku ma Jou Madutu. Enanga ihigumal̄a ipareta o mede moruata de hinoto madëkana.

⁶Daha ënanga i muläenge iwihikauku ma Jou Madutu deʼ ma Jou Madutu ai romanga. Hoko genangoli ma Jou Madutu aigogere mangï, deʼ mata-mata yogö gogogere o horogaka mä yähikauku.

⁷ Enanga ihi gumal̄aoli yalawani ma Jou Madutu aiumati inoli yähihanga önanga. Deʼ yakokuaha mata-mata o ahali, o negara, o bahasa, deʼ o hoana de o berera ihidöaka enangika.

⁸ O nyawa mata-mata yowö wango-wango o dunia mal̄okuoka aha yahuba o aiwani gënanga, sowaliua o nyawa manga romanga ihituli-tulihoka ihira de o dunia nënanga idadi o nyawa yowango-wango manga buku magoronaka madutu to Duba ma Ngohaka yatoa-toakoka.

⁹Hababu gënanga, nako ngini kaniakunu niihene, niihene o abari nënanga:

¹⁰ ”O nyawa naga kokiani yätagoko, marai aha yätagoko. Deʼ o nyawa naga kokiani yätoma de o oworo, marai aha yätoma de o oworo. Mahababu gënanga ma Jou Madutu Ai umati kokiani yotongohono deʼ yosetia.”

¹¹Daha ngohi tamäke o aiwani mahomoa o gahumu moi ipuda o duniail̄e. Enanga matataduku hinoto hokä o duba mangohaka matataduku. Mailingi hokä o dodiha o naga mailingi.

¹²O aiwani madodihiraka gënanga toena mahimangoka ënanga yapäke o kuaha maago-agomo yamömäke-mäke maaiwanino gënanga. O dunia mata-mataika deʼ mata-mata yogögogogere mal̄okuoka, yäpakisa yahuba o aiwani madodihiraka gënanga, naga manabo ilölago-agomo itogumoka.

¹³O aiwani mahinotoka gënanga yadiai ihöhëra-hëranga ilölago-agomo. O nyawa mata-mata manga himangoka ënanga yadiai o uku o dihangoka iuti o duniauku.

¹⁴Deʼ o nyawa mata-mata yowöwango-wango o duniaka yätipu de ihöhëra-hëranga yakunu yadodiai o aiwani madodihiraka gënanga toëna mahimangoka. Deʼ mata-mata önanga yähuloko ihigoko o aiwani yal̄abo-l̄aboka de o oworo maitatapu iwango gënanga ma dulada o gahumu moi.

¹⁵O aiwani mahinotoka gënanga ihigumal̄a manyawa ihidöaka o duladaika gënanga, hiädono o dulada gënanga yakunu itemo-temo deʼ yätoma o nyawa mata-mata yolu-oluku yahuba.

¹⁶O nyawa mata-mata, yoaluhu deʼ yolago-agomo, yomihikini deʼ yokaya, o gilaongo deʼ o gilaongua, o aiwani gënanga yäpakisa la yatarima o nonako toönanga manga giama manirakika ekola toönanga manga bionoko.

¹⁷Ka o nyawa moi ö dekoiwa yakunu yoija ekola yohukunu okianaga moi, nako önanga koiwa manga nonako gënanga, enagënanga o aiwani gënanga mahirete maromanga, ekola o gegetongo ihinyönyata-nyata o romanga gënanga.

¹⁸Nenangoka iparalu naga o barija. O nyawa yososawaro yakunu yaetongo mamangarati o aiwani gënanga magegetongo, hababu o gegetongo gënanga ganga womatëngo o nyawa airomanga. Ma gegetongo ganga 666 (o ratuhu butanga de mori butanga de butanga).