Read Tobelo O HIMATOKO 14 Bible Online

O HIMATOKO 14 - Tobelo bible

O HIMATOKO 14

¹ Ipahaika ngohi tamäke, daha ma Duba ma Ngohaka gënanga womaokoino o Sion ma Doporonoka. Dede Unanga naga o nyawa 144.000 (yaribuhu ratuhu moi de moruata de iata) moi-moi manga bionoko yatulihika Ai romanga deʼ Ai Ama ai romanga.

²Daha ngohi toihene o ilingi o dihangino maruruhu hokä o akere yöhahuru igiwe ma ago-agomuku deʼ hokä o dotoreke ikokua-kuatil̄e ma tuuhu. O ilingi gënanga hokä o musik mailingi o kecapi ihigogogule naga magogiriaka ihi gogule manga kecapi.

³O kuruhi imomulia ma himangoka deʼ o dodadi gahumu iatö inoli o tutuda-tutuda o kuruhi imomulia ihigilolitino gënanga, o nyawa 144.000 (ya ribuhu ratuhu moi de moruata de iata) geönanga ihi nyanyi moi o nyanyi mahungi. O nyanyi gënanga ka o nyawa moiö de yakunua imädotoko mahomoa deya 144.000 (ya ribuhu ratuhu moi de moruata de iata) o nyawa ge önanga yololapahioka o duniaino.

⁴Onanga gënanga o nyawa i tatapu yotebini hokä o goduru maboro, karana imahi ganuua de o ngongoheka. Onanga iwi nïki ma Duba ma Ngohaka gënanga kiaika dika Unanga woiki. O nyawa mata-mataika manga higoronaka, önanga yahilapahioka hokä o huhuba madodihiraka ma Jou Madutuika deʼ ma Duba ma Ngohakika.

⁵ Komaiwa önanga yoëluku; deʼ kamahuhutulö makoiwa mabodito onangoka.

⁶Daha ngohi tamäke o malaekat mahomoa imatëngo ihoho kahagurutil̄e o dihangoka. O malaekat gënanga iao o abari mangale o Abari ma Oa ikokakali la ihiädono o nyawaika o duniaka enagënanga mata-mata o hoana de o berera, o bahasa deʼ o negara.

⁷O malaekat gënanga ipöaka de mailingi kahäkuatil̄e, ”Niwïmodongo ma Jou Madutuika, deʼ nihigiriri Ai mulia! Hababu maorahoka ma Jou Madutu wahihakimi o nyawa. Niwihuba Unanga wohidödädadi o dihanga, o dunia, o ngöto deʼ o akere malako mata-mata!”

⁸ O malaekat mahinotoka yanïki o malaekat madodihiraka de ipöaka, ”Itifaka! O Babel ma Kota ilölago-agomo itifaka! Enanga yadiaioka hagala o hoana de o berera yädaluku de o angguru ma akere, — enagënanga o nahihu itotorou maangguru!”

⁹Imatëngo o malaekat mahangeoka yanïki o malaekat hinoto gënanga, de ipöaka de mailingi kahakuatil̄e, ”O nyawa yahöhoromati o aiwani gënanga de toënanga madulada, deʼ de manga nonako o aiwani gënanga manga bionoko ekola manga giamika,

¹⁰ o nyawa gënanga aha yaokere ma Jou Madutu aiangguru, enagënanga Ai dohata ma angguru yöguhe-guheoka toëna mangïuku, kamahuhutulö de koyakurangua! O nyawa mata-mata gënanga aha yähangihara o uku deʼ o walira magoronaka o malaekat-malaekat yotötebi-tebini manga himangoka deʼ ma Duba ma Ngohaka aihimangoka.

¹¹ O uku yähöhangihara o nyawa gënanga toëna manofo ikuhuhulu kahokogenangika de kahiado-adonika. O hutu de o wange madodogumu koiwa önanga yohangihara, enagënanga önanga yahöhuba-huba o aiwani gënanga deʼ toëna madulada, o nyawa mata-mata de manga nonako o aiwani gënanga maromanga.”

¹²O hali nënanga magoronaka ma Jou Madutu aiumati ihingou-ngounu ma Jou Madutu aipareta deʼ yosetia o Yesusika, iparalu yotongohono.

¹³Daha ngohi toihene o ilingi o horogaino itemo, ”Natulihi nënanga: Muläenge öraha nënanga, youtumu hagala o nyawa ka iwïleleaniohi ma Jou de yohonenge!” ”Itiai!” ma Jou Madutu ai Womaha ihaluhu. ”Onanga aha imatogumu de o manarama itotubuho, karana toönanga manga leleani mahasili hoko genangika aha yatomoteke önanga.”

¹⁴ Ipahaika ngohi tamäke, hoimahimatoko moi o lobi magare-garehe. O lobi mal̄okuoka gënanga wogogeruku womatëngo hölega-lega hokä o nyawa. Ai häekoka naga o makota gurasi o gahumu moi, deʼ aigiamoka naga o gakana o gugutuku madödoto-doto o gahumu moi.

¹⁵ Ipahaika imatëngo o malaekat mahomoa ihupu ma Jou Madutu ai Tauino. De mailingi kahakuatil̄e, ünanga woma pöaka unangika wogögogeruku o lobi mal̄okuoka gënanga, ”Nohiwawe anigugutuku gënanga deʼ noutuku örahanënanga, hababu ma orahoka iutuku; o dunia iohakoka yaoaka yautuku!”

¹⁶Daha ünanga wogögogeruku o lobi mal̄okuoka gënanga wohiwawe aigugutuku o duniauku, ho o dunia mayautuku.

¹⁷Ipahaika ngohi tamäke imatëngo o malaekat mahomoali ihupu ma Jou Madutu ai Tauino o horogaka. Enangö imahijöino o gakana o gugutuku madödoto-doto o gahumu moi.

¹⁸Iböto gënanga, imatëngo o malaekat mahomoa, yakokuaha o uku, o huhuba mangïoka de waino. De aiilingi kahakuata ünanga womapöaka o malaekatika womahi jöjöino o gugutuku madödoto-doto gënanga, ”Nohiwawe anigugutuku gënanga deʼ naluiti o angguru mahohoko o duniaka, karana mahohoko iomukoka!”

¹⁹Ho o malaekat gënanga wohiwawe aigugutuku o duniauku deʼ wautuku ma angguru mahohoko maröehoka, daha ihikaweli ma Jou Madutu aidohata ihebu-hebulu maangguru madedeouku.

²⁰ O angguru mahohoko gënanga yateo o kota maporetoka, deʼ o angguru madedeoino gënanga o awunu ihahuru hokä o ngairi magurutika o kilo ratuhu hangeika deʼ maluku ngade o metere hinoto.