Read Tobelo O HIMATOKO 15 Bible Online

O HIMATOKO 15 - Tobelo bible

O HIMATOKO 15

¹Ipahaika ngohi tamäke o dihangoka okianaga moi ihëra-hëranga de kabiahaua makuata. Naga o malaekat tumidi deʼ o balä mabobaha tumidi. Nënanga wohibobaha ma Jou Madutu wakopoa Ai dohata.

²Iböto de gënanga ngohi tamäke okianaga moi hapulo-pulono hokä o ngöto o kahinä imaganu o uku. Ngohi tamäkeoli hagala o nyawa yautu-utumoka o aiwani de toëna madulada, deʼ yäutumu o nyawa manga romanga yanononakoika de o gegetongo. Hagala o nyawa youtu-utumu gënanga imaokoino o ngöto o kahinä madatekoka inoli imahijöino o kecapi ma Jou Madutu wahidödöa-döaka onangika.

³ Deʼ onanga ihinyanyi o Musa ainyanyi ma Jou Madutu aigilaongo, deʼ ma Duba ma Ngohaka ainyanyi. Hoko nënanga mabetongo, ”Jou, Jou Madutu noko Kuaha, hokokia maamoko deʼ ihëranga hagala to Ngona animanarama! Hagala o hoana de o berera ma Koano, hokokia maadili deʼ madiai hagala to Ngona anijojobo!

⁴ O nagona inimodongua Ngonaika, Jou? O nagona yoluku ihiabari Ani mulia? Ngona dika naga notebi-tebini. Hagala o hoana de o berera aha yoböa inihuba Ngona karana Ani jojobo iadili o nyawa mata-mata yamäkeoka.”

⁵ Iböto de gënanga ngohi tamäke ma Jou ai Tau o horogaka ihelengaika, deʼ ma Jou ai Tau-tau naga magoronaka.

⁶Daha o malaekat tumidi de o balä tumidi gënanga ihupu ma Jou Madutu ai Tauino. Toönanga manga pakeanga mangöere o lenan madebi-debini deʼ maleto-letongo. Deʼ onanga yapäke ma ale mangunungu madadamunu o gurasi.

⁷Ipahaika o dodadi iata mahigoronaka gënanga moi ihidöaka o malaekat tumidika gënanga o gahumu tumidi o ngï gurasi naga iömanga de ma Jou Madutu aidohata, — ma Jou Madutu wowango kahiado-adonika.

⁸ Done ma Jou Madutu ai Tau gënanga iömanga de o nofo ma Jou Madutu aimuliaino deʼ Ai kuaha. Deʼ hokokia madekana o balä gënanga naga yao-ao o malaekat tumidi gënanga ihibobahauwahi, ka o nyawa moiö de koiwa naga yakunu yowohama ma Jou Madutu ai Tau magoronaika.