Read Tobelo O HIMATOKO 17 Bible Online

O HIMATOKO 17 - Tobelo bible

O HIMATOKO 17

¹ Iböto de gënanga o malaekat tumidö imahijöjöino o ngï gënanga manga higoronaka imatëngo yaino ngohino deʼ itemo, ”Naino, ngohi aha tonihidumutu ngonaika sarakia o hudali ma amoko gënanga aha yahukumu, enagënanga o kota malago-agomo gënanga naga ihigoko o ngairi-o ngairi madatekino.

² O kokoano o duniaka yodiai ipese-peseke de itotorou de ënanga, deʼ o duniaka yogögogere yädaluku karana yaokere to ëna mapeseke de madorou ma angguru.”

³ Daha ma Jou Madutu ai Womaha ihikuaha ngohi, deʼ o malaekat gënanga ihiao ngohi o tonaka ikökokakahaika. Dokengoka ngohi tomimäke o ngoheka momatëngo mogogeruku o aiwani duru madödoka-dokara mal̄okuoka, deʼ iomanga ituli-tulihika de o roma-romanga o hikauku ma Jou Madutuika. O aiwani gënanga mahäeke tumidoka deʼ matataduku ngimoi.

⁴ O ngoheka gënanga mapäke o baju mawuwungu deʼ duru madödoka-dokara, inoli ihiporomuika de o päke-päke o gurasi, de o intan de o folori de o muhutika. Ami giamoka momahi jöino o udo-udomo o gurasi o gahumu moi iömanga de o hali duru itotorou deʼ ipeseke, ami manarama itötotorou mahasilino.

⁵Ami bionoko yodulihika moi o romanga naga de toëna mamangarati irörahasia. O romanga gënanga ganga ”O Babel Ma Lamo-amoko, o ayo de hagala o hudali deʼ o nyawa manga kalakuanga itotorou o duniaka.”

⁶Daha ngohi tomimäke o ngoheka gënanga imi daluku de ma Jou Madutu aiumati manga awunu, deʼ manga awunu hagala o nyawa yätoma-toma karana yosetia o Yesusika. Maöraha ngohi tomimäke o ngoheka gënanga, ngohi kato hëra-hërangika.

⁷Daha o malaekat gënanga ihitemo ngohino, ”Mahababu okia ngona kano hëra-hërangika! Kayaoa de ngohi tonihingahu o ngoheka gënanga amirahasia deʼ o aiwani mobare-barenuku marahasia, enagënanga o aiwani mahäeke tumidoka deʼ matataduku ngimoi.

⁸ O aiwani gënanga mahiraino iwango, mä oraha nenangä iwangokauali. Enanga mahutuohi aha ihupu o honenge mawaiil̄e deʼ aha ioiki yödumutu o binahaika. O nyawa yowöwango-wango o duniaka, manga romanga yatuli-tulihua o Nyawa yo Wango-wango ma Buku magoronaka ihira de o dunia nënanga idadi aha yohëranga nako yamäke o aiwani gënanga. Hababu o aiwani gënanga mahiraino iwango. Oraha nanga ënanga iwangokauali, mä enanga aha iböaokali.

⁹O hali nënanga magoronaka i paralu naga o sawaro deʼ o mangarati. Mahäeke tumidi gënanga ganga o doporono gahumu tumidi; enagënanga odoporono-odoporono amingï o ngoheka gënanga mogögogeruku. Deʼ mahäeke tumidi gënanga gangö o koano yätumidi:

¹⁰manga higoronaka yämotoa yotifaka, womatëngo kawoparetaohi deʼ womatëngohi woböaowahi.

¹¹Deʼ o aiwani mahiraino iwango, mä oraha nanga iwangokauali, ganga o koano matufangeoka. Unanga ganga makoano yatumidi ho ünanga ganga womatëngo, örahananga woiki magogiria wodumutu o binaha.

¹² O tataduku ngimoi namömake-make gënanga ganga o koano yangimoi yomulaengowahi yopareta. Mä onanga aha yahidöaka o kuaha la yopareta hokä o koano imakinïki de o aiwani gënanga madëkana o jam moi.

¹³O koano yangimoiö nënanga mata-mata de manga dungutu imakoketero; önanga mata-mata ihidöaka toönanga manga kuata deʼ manga kuaha o aiwanika gënanga.

¹⁴Onanga aha yoparangi iwilawani ma Duba ma Ngohaka gënanga. Mä ma Duba ma Ngohaka gënanga deʼ iwinöninïki yososetia wä aho-ahokoka deʼ wäiri-irikoka gënanga aha yähihanga o kokoano gënanga, hababu Unanga hagala o tuanga manga Jou, deʼ hagala o kokoano manga Koano.”

¹⁵O malaekat gënanga itemoli, ”O akere naga ngona namäke gënanga, mohuda-hudali gënanga amingï mogogere, ganga hagala o hoana de o berera, hagala o kawaha, hagala o negara deʼ hagala o bahasa.

¹⁶O tataduku ngimoi ngona namö make-make deʼ o aiwani gënanga aha imïdohata mohuda-hudali gënanga. Onanga aha yaora hagala moi-moi tomünanga madutu, deʼ imidiai münanga mohekono. Onanga aha yaol̄omo amiakeme deʼ imibinaha de o uku.

¹⁷Hababu ma Jou Madutu wagarakioka toönanga manga hininga la ihidagi ma Jou Madutu aidatoro. Ma Jou Madutu wadiai önanga o fakati moi la ihidöaka toönanga manga kuaha o aiwanika gënanga, hupaya o aiwani gënanga ipareta hiädono idadi okia ma Jou Madutu wohidodemoka.

¹⁸O ngoheka nomimäke-mäke gënanga enaganga o kota ma lago-agomo, yäpopareta o kokoano o duniaoka.”