Read Tobelo O HIMATOKO 18 Bible Online

O HIMATOKO 18 - Tobelo bible

O HIMATOKO 18

¹Iböto degënanga ngohi tamäke o malaekat mahomoa imatëngo iuti o horogauku. Enanga de makuaha iamoko, deʼ toëna maletongo yadiai o dunia mata-mataika idadi itararono.

² Dema ilingi kahaamokil̄e, ënanga ipöaka, ”Itifaka! O Babel ma amoko itifaka! Orahananga imadadi hagala o hëtanga deʼ hagala o womaha madorou mangï. Toena magoronaka hagala rupa o totaleo madorou deʼ o nyawa yödoha-dohata.

³ Hababu hagala o hoana de o berera manyawa yaokeroka toëna manahihu itotorou ma angguru. O kokoano o duniaka yodiai ipese-peseke dede ënanga, deʼ imahuku-hukunu o duniaka idadi yokaya mangale toëna manahihu yakunua yatumungu gënanga.”

⁴ Daha ngohi toihene o ilingi mahomoa o horogaino yotemo, ”Nihupu, Ahi umati! Magoronaka nihupu! Uha ngini nianïki toëna mabaradoha deʼ mahukumanga nimahi tagongo!

⁵ Hababu mabaradoha itotoporono hiädono daku o dihangil̄e, deʼ ma Jou Madutu aha wohininga madorou.

⁶ Nihidapara ënanga hoka sarakia ënanga inihidapara ngini; nia balahi enangika nihigali mahinoto mangale mata-mata yadodiaioka. Nioguhe maudo-udomo de o daluku iböbiha-biha higali mahinoto mabiha iö oke-okere ënanga yasosadia mangale ngini.

⁷ Nihidöaka enangika o huha de o hangihara deʼ o duka de o baliha imaketero mangöe de o mulia deʼ o dagakunu i hi döa-döaka ami dirika mahirete. Hababu münanga hokogenangika dika matemo amidirika, ’Ngohi nënanga o koano o ngoheka topopareta! Ngohi o ngoheka bobaoua; ngohi aha tamäoua o hininga mahuha!ʼ

⁸Karana o hali gënanga, hokä o wange moioka dika münanga aha imi tapal̄u o bodito — o panyake, o hininga mahuha, deʼ o habirokata. Deʼ munanga aha imituhuku de o uku, hababu Ma Jou Madutu wokuaha womihihaki-hakimi gënanga.”

⁹ Okokoano oduniaka yamote-moteke hagala amimanarama ipese-peseke magoronaka deʼ o ngoheka gënanga aminahihu aha yögari deʼ yödodora o kota gënanga maöraha okia önanga yamäke o uku ihituhu-tuhuku manofo ikuhuhulu.

¹⁰Onanga aha kama gurutoka de imaokoino hababu önanga yömodongo yäkorona toëna mahuha demahangihara. Onanga yotemo, ”Amao, kao goguleua mabodito o kota nënanga maromanga kiaka dika yögihene — o Babel okota ikökua-kuata! O jam moi magoronaka dika anihukumanga yadiaioka!”

¹¹ Ima huku-hukunu o duniaka yoari deʼ imanonakoika yoduka karana o ngoheka gënanga, hababu kao nyawa moiö de yoijaokaua toönanga manga kiahonanga yahöhuku-hukunu.

¹² Moiokaua yoija o gurasi, o haäka, o intan de o folori, deʼ toönanga manga muhutika; o ngöere o lenan, o ngöere mawuwungu, o hutara, deʼ o ngöere duru madödoka-dokara; hagala marupa o gota igapa-gapangua hamäke, okia honanga yadodiai de o gaja mahihipata, deʼ yadodiai de o gota mahöhali-hali maija, yadodiai de o tabaga, de o behi, deʼ de o marmar;

¹³o kayu manis makai, o rampa-rampa, o dupa, o mur, deʼ o manyanyi; o angguru deʼ o minya, o gopuno deʼ o gandum; o hapi deʼ o duba, o kuda deʼ o kereta, o gogilaongo, maboboloi o nyawa manga jiwa ö.

¹⁴Imahuku-hukunu imitemo mangohekaika gënanga, ”Mata-mata ngona nonönahihu nomahitongona koiwaka, deʼ hagala nowango nomahi sosanangi deʼ anihailoa ihihangoka. Ngona aha konamäkeokaua!”

¹⁵ Ima huku-hukunu yokaya-kayaoka karana ima hukunu o kotaoka gënanga aha kamagurutoka de imaokoino, hababu önanga yömodongo yäkorona mahuha de mahangihara. Onanga aha yoari deʼ imanonakoika yoduka,

¹⁶daha yotemo, ”Amao ka o goguleua mabodito o kota nënanga maromanga kiakadika yögihene! Mabiaha ënanga yapäke o ngöere o lenan, o ngöere mawuwungu, de o ngöere duru madödoka-dokara; mabiaha iniömanga de o päke-päke gurasi, o intan de o folori de o muhutika!

¹⁷ Mä o jam moi dika magoronaka, ihihangoka hagala toëna makaya gënanga!” Mata-mata o kapa makaputeni, o kapa yoböbare-barene, deʼ o kapaoka manyawa, inoli o nyawa imalölingi-lingiri o ngötoka, kamagurutoka de imaokoino.

¹⁸ Deʼ yopöaka maöraha yamäke manofo ikuhuhulu o uku yatuhu-tuhuku ma kota gënanga. Onanga yopöaka, ”Komaiwa naga o kota mahomoa hokä o kota malago-agomo nënanga!”

¹⁹ Done önanga ihibarihi o kafo manga mumukuku hokä manonako yoduka, daha yoari deʼ yopöa-pöaka, ”Amao, ka o goguleua mabodito o kota malago-agomo nënanga. Toena makaya yadiaioka o nyawa mata-mata de manga kapa-kapaoka o ngötoka idadi yokaya! Mä o jam moi dika magoronaka, ënanga de mahagala mata-mata imahidihihangoka!”

²⁰ Hei horoga, nimörene mangale o kota gënanga iwedere! Hei ma Jou Madutu aiumati, rasul-rasul, deʼ o nabi-nabi, nimörene! Hababu ma Jou Madutu wahukumoka ënanga hokä mabalaha okianaga yadodiaioka nginika!

²¹ Iböto gënanga, o malaekat imatëngo ikökua-kuata yagöraka o helewo gahumu moi — ma amoko ho o gulinga mahelewo malago-agomo — daha wohikaweli o ngöto magoronauku de itemo, ”Hokonënanga madodagi o Babel makota ihigögogiriri gënanga aha ihikaweli kahäkuata hiädono aha koyamäkeokaua.

²² O musik mailingi o kecapi ihigogogule, yonyönyanyanyiino, o suling ihigögogoguleino, deʼ o trompet yowöwuwuwuino, aha yoihenokaua anihidogoronaka! Aha kawomatengö ma iwimäkeua okianaga wododiai wososawaro genangokadau, deʼ o helewo o gulinga mailingi ma aha yögihenokaua.

²³Aha o nyawa yamäkeokaua o hilo madararono anihigoronaka; deʼ aha yoihenokauali o kawingi marameanga marame genangokadau. Ani da ganga manyawa yolölago-agomo o duniaka, deʼ de anidodötoko irörahasia ngona nätipu hagala o hoana de o berera o duniaka!”

²⁴ O Babel yahukumu hababu o kota gënanga magoronaka yamäkeoka o nabi-nabi manga awunu, ma Jou Madutu aiumati manga awunu — de madipoko o nyawa mata-mata yätoma-tomaka o dunia mal̄okuoka toona manga awunu.