Read Tobelo O HIMATOKO 19 Bible Online

O HIMATOKO 19 - Tobelo bible

O HIMATOKO 19

¹Iböto de gënanga ngohi toihene okianaga moi hokä o nyawa yowöe-wöe manga ilingi o horogaino yopöa-pöaka, ”Niwi higiriri ma Jou Madutu! Tongone nanga Jou Madutu ganga ma Jou Madutu wohihohalamati; Unanga ma Jou Madutu womomulia deʼ wokokuaha!

² Wohidero o adili hokä o hakimi woadili deʼ wobarija! Unanga womigelengaka o hukumanga o hudali maamokika, makokilianga o dunia de tomuna amimanarama ipese-peseke. Ma Jou Madutu womihukumoka mohöhuda-hudali gënanga, hababu mätomaka ma Jou Madutu aigogilaongo.”

³ Daha o nyawa yowöe-wöe manga ilingi gënanga ipöakoli, ”Niwihigiriri ma Jou Madutu! O uku manofo yatötuhu-tuhuku o kota maamoko gënanga aha ikuhuhulu itogu-togumua!”

⁴Ho o tutuda yamonaoko de yaruata gënanga deʼ o dodadi iata yakokilolitino de o kuruhi imomulia gënanga imahitudukuku deʼ iwihuba ma Jou Madutu naga wogö gogeruku o kuruhi imomuliaka. Onanga yotemo, ”Igoungu! Hihigiriri ma Jou Madutu!”

⁵ Daha o kuruhi imomuliaino gënanga toihene o ilingi itemo, ”Niwihigiriri ma Jou Madutu, hei mata-mata ma Jou Madutu aigilaongo, deʼ o nyawa mata-mata — yolago-agomo de yohohumujuru — iwihöhuba-huba ma Jou Madutu!”

⁶ Iböto de gënanga ngohi toihene okianaga moi hokä o nyawa o doomu moi duruhë kamangangöe mangailingi; mailingi hokä o moku-moku malulu deʼ hokä o dotoreke maruruhu. Ngohi toihene önanga yotemo, ”Niwihigiriri Ma Jou Madutu! Hababu ma Jou, tongone nanga Jou Madutu Duru woko Kuaha gënanga örahanënanga wopareta!

⁷Niaino ngone homörene deʼ homagarago; niaino ngone hohigiriri Ai mulia! Hababu yadonoka Ai kawingi mawange wasösö o romanga o Duba ma Ngohaka gënanga, deʼ mangoheka womikawi-kawingi momäböbötoka la yokawingi.

⁸Amipäke o ngöere o lenan malöleto-letongo imihidöakoka munangika la mapäke.” (O pakeanga mangöere o lenan gënanga ganga hagala o manarama maoa-oa yadödodiai ma Jou Madutu aiumati.)

⁹ Daha o malaekat genangö wohitemo ngohino, ”Natulihi nënanga: ’Youtumu o nyawa yäaho-ahoko ma Duba ma Ngohaka gënanga aikawingi marameangino.’ ” Ipaha o malaekat gënanga wödogoli, ”Nënanga o abari madiai ma Jou Madutuino.”

¹⁰Ngohi tomahitudukuku o malaekat gënanga mahimangoka tomau tihuba, mä unanga wohitemo ngohino, ”Uha! Uha nohihuba ngohi, nïhuba ma Jou Madutu! Hababu ngohiö makao gilaongo imatero hokä ngona deʼ hokä mata-mata aniroriadodoto imahi jojojö ikekete o Yesus aihakihiika!” Hababu o Yesus aihakihi gënanga yahidöaka o hidumutu hagala o nyawa yohingahu-ngahu okianaga idödadadiuahi.

¹¹ Ipahaika ngohi tamäke o horoga ihelenga, daha tamäke o kuda magögare-garehe moi. Wöbare-barenuku airomanga Wososetia deʼ Wototiai. O hukumanga woputuhu magoronaka deʼ o parangi wadodiai Unanga woadili.

¹² Ai lako hokä o uku madokara deʼ Ai häekoka wapäke o makota mangöe. Ai dirioka yatulihika moi o romanga; deʼ duga-duga Unanga mahirete wohiöriki o romanga gënanga.

¹³O juba wapöpäke-päke yatonoka o awunuku. Deʼ Unanga iwihetongo ”Ma Jou Madutu ai Demo”.

¹⁴O horogaka matentara iwitomoteke Unanga de yöbarenuku o kuda magögare-garehe, deʼ manga pakeanga mangöere o lenan magare-garehe de itebini.

¹⁵ Ai uruiha ihupuiha o oworo moi madödoto-doto deʼ de o oworo gënanga Unanga aha wähihanga hagala o hoana de o berera, deʼ Unanga aha wäpareta önanga de o diki-diki o behi. Unanga aha wödëo o angguru ma Jou Madutu Duru woko Kuaha aidohata maangguru madedëo magoronauku.

¹⁶Ai jubaika deʼ Ai ugurika yödulihika o romanga nënanga, ”O koano de hagala o koano, deʼ o Jou de hagala o tuanga.”

¹⁷ Daha ngohi tamäke imatëngo o malaekat imaokoino o wange malakoka. De aiilingi kahakuatil̄e ünanga wopöaka o totaleoika mata-mata ihöhöhoho o gitawaka, ”Niaino nimatoomu la niohimanga o rameanga maamoko wohirörame-rame ma Jou Madutu!

¹⁸Niaino niol̄omo o kokoano manga akeme, o kokapita manga akeme deʼ yonönau-nauru manga akeme; niaino niaol̄omo o kuda yoböbare-barene manga akeme de manga kuda ma akeme deʼ o nyawa o umati mata-mataika manga akeme yolago-agomo deʼ yohohumujuru, o gilaongo deʼ yogogilaongua!”

¹⁹Ipaha ngohi tamäke o aiwani gënanga, deʼ o kokoano o duniaka de toona mangatentara, imatoomu la yoparangi iwi lawani ünanga woböbare-barenuku o kuda magare-garehe gënanga deʼ aitentara.

²⁰ Done o aiwani gënanga yatägoko kamamoi de o nabi madutua yadödodiaioka ihöhëra-hëranga o aiwani gënanga mahimangoka. (De ihöhëra-hëranga gënanga o aiwani gënanga yätipu hagala o nyawa de manga nonakoka o aiwani gënanga manonako, deʼ hagala o nyawa yahuba-huba o aiwani gënanga madulada.) Daha o aiwani gënanga deʼ o nabi madutua gënanga kamanga ngango yäumo o uku itoka-tokara de o walira mangötuku.

²¹Deʼ toona manga tentara yätoma de o oworo ihöhupu-hupu aiuruiha woböbare-barene o kuda magö gare-garehe gënanga. Ho hagala o totaleo maiböa deʼ yaol̄omo isabaranga to önanga manga akeme yätoma-tomaka gënanga.