Read Tobelo O HIMATOKO 20 Bible Online

O HIMATOKO 20 - Tobelo bible

O HIMATOKO 20

¹Iböto de gënanga ngohi tamäke o malaekat imatëngo iuti o horogadegauku. Ai giamoka ünanga womahi jöino o honenge mawai makusi de o rante o behi mapako-pako gahumu moi.

² Daha ünanga watagoko o dodiha o naga gënanga, o dodiha mabereki — enagënanga o Ibilihi ekola o Womaha ma Dorou gënanga — deʼ waliko de airante o behi o taongo o ribuhu moi madëkana.

³Ipaha o malaekat gënanga waumo madodiha o naga gënanga o honenge mawaiuku, daha wakusi o wai gënanga deʼ wasegel, hupaya o dodiha o naga gënanga yakunokaua yätipu hagala o hoana de o berera manyawa ihira de o taongo o ribuhu moi imata. Iböto de gënanga kokiani ënanga yapidili mä maöraha itipoko.

⁴ Daha ngohi tamäke o kuruhi imomulia, deʼ hagala o nyawa yogögogeruku o kuruhi imomuliaoka gënanga yahidöaka o kuaha la yaputuhu o hukumanga. Ngohi tamäkeö hagala o nyawa manga häeke yatobi-tobikoka manga jiwa karana önanga ihidöaka o hakihi mangale o Yesus, deʼ ihibarihi o behehongo ma Jou Madutuino. O nyawa geönanga yahubaua o aiwani, ekola madulada. Onangö komaiwa yatarima o aiwani gënanga manonako manga bionoko ekola toona manga giamika. Ho önanga yowango okali deʼ yopareta hokä o koano de o Kristus o taongo o ribuhu moi madëkana.

⁵Nenangala madodihiraka o nyawa yohone-honengoka yomomikokali. (Mä o nyawa yohone-honenge mahomoa yowango okaua madekana maöraha o taongo o ribuhu moi gënanga.)

⁶Youtumu hagala o nyawa imakomöteke yahimomikokali madodihiraka gënanga. Onanga yopatutu yodadi madutu toma Jou Madutu. O honenge mahinotoka yäkuahaua önanga. Onanga aha yodadi ma Jou Madutu ai imam-imam deʼ o Kristus ai imam-imam; deʼ onanga aha yopareta dede Unanga o taongo o ribuhu moi madëkana.

⁷Maöraha o taongo o ribuhu moi gënanga ipaha, o Ibilihi o buioka aha yapidili,

⁸ deʼ enanga aha ioiki yätipu hagala o hoana de o berera manyawa naga imahikokabarihika o dunia mata-mataika enagënanga o Gog deʼ o Magog. O Ibilihi yätoomu önanga la imateke parangi, o doomu moi malago-agomo duru, manga ngöe hokä o dowongi o ngötoka.

⁹Ho onangö ma imahigerewoto o dunia mata-mataika, daha yakiloliti ma Jou Madutu ai umati manga tau-tau deʼ o kota ma Jou Madutu wödora-dora. Mä o uku iuti o dihanguku deʼ yäbinaha önanga.

¹⁰Ipaha o Ibilihi yatö tipu-tipu önanga gënanga, ihikaweli o uku deʼ o walira mangötuku. Genangokadau mangï o aiwani deʼ o nabi madutua gënanga yäumo i hiraka. Onanga aha yähangihara o hutu de o wange de kahiado-adonika.

¹¹ Ipaha de gënanga ngohi tamäke o gahumu moi o kuruhi imomulia magare-garehe malamo-amoko deʼ Unanga wogögogeruku mal̄okuoka. O dihanga deʼ o dunia ihihanga Ai himangoka, hiädono yamäkeokaua.

¹²De ngohi tämäke o nyawa yohone-honenge, yolago-agomo de yohohumujuru, imaokoino o kuruhi imomulia gënanga mahimangoka. Ho o buku-bukuö yahelenga. Daha o gahumu moi o buku mahomoa yahelenga enagënanga o Nyawa yo Wango-wango ma Buku. Ipaha o hukumanga yägelenga o nyawa yohone-honenguku, imatero de toönanga manga manarama imoteke yatuli-tulihuku o buku-buku gënanga magoronaka.

¹³Daha o ngöto ihidöaka o nyawa yohöhone-honenge o ngöto magoronaka. O Honenge de o Honenge ma Alamö ihidöaka o nyawa yohone-honenge naga enangoka. Deʼ o nyawa yohone-honenge gënanga mata-mata yägelenga o hukumanga imatero de toönanga manga manarama.

¹⁴Ipaha o Honenge de o Honenge ma Alami ihikaweli o uku mangötuku. (O uku mangöto nënanga ganga o honenge mahinotoka.)

¹⁵Hagala o nyawa ituli-tulihua manga romanga o Nyawa yo Wango-wango ma Buku magoronaka, yäumo o uku mangötuku.