Read Tobelo O HIMATOKO 21 Bible Online

O HIMATOKO 21 - Tobelo bible

O HIMATOKO 21

¹ Daha ngohi tamäke o dihanga mahungi deʼ o dunia mahungi. O dihanga madodihiraka deʼ o dunia madodihiraka ma ihihanga, inoli o ngöto maihihanga.

² Ho ngohi tamäke o kota itebi-tebini gënanga, enagënanga o Yerusalem mahungi, iuti o horogauku ma Jou Madutuino. O kota gënanga ihidiaioka hokä momatëngo o ngoheka mokawi-kawingi imipäkeika la imamäke de manauru wokawi-kawingi.

³ Daha ngohi toihene o ilingi o kuruhi imomuliaino gënanga ipöaka kahäkuatil̄e, ”Orahananga ma Jou Madutu aigogere mangï ganga kamamoi de o nyawa! Unanga aha wowango dede önanga, deʼ onanga aha yodadi Ai umati. Ma Jou Madutu mahirete aha naga dede önanga deʼ wodadi toönanga manga Jou Madutu.

⁴ Unanga aha waehe hagala manga köngo to önanga manga lakoka. O honenge aha kowalioka; o hininga mahuha, o gari, ekola o hiri makoiwakaoli. O hali ihöhira-hira ihihangoka.”

⁵Daha Unanga wogögogeruku o kuruhi imomuliaka gënanga wotemo, ”Orahanënanga Ngohi tadiai mata-mata mahungi!” Unanga wohitemoli ngohino, ”Natulihi nënanga, hababu hagala o demo-demo nënanga itiai deʼ yakunu hangaku.”

⁶ Daha Unanga wotemo, ”Idadioka! Ngohi nanga madodihiraka deʼ mabobahaka; Ngohi nanga ma Jou Mamulaengohi hiädono ihi Bobaha. O nyawa moi-moi manga kiriti madudungu, aha tahiokere de koiwa mabobangu o akere matitino ihidödöa-döaka o ngango.

⁷ Hagala o nyawa youtu-utumu aha yatarima hagala o hali nënanga Ngohino. Ngohi aha todadi manga Jou Madutu, deʼ onanga aha yodadi Ahi ngohaka.

⁸Mä o nyawa yokëo-këoko, yososetiaua, manga kalakuanga itotorou, yotoma-toma, manga manarama ipese-peseke, de o nyawa yapäke-päke o gumatere de o maihi, o gomanga yahuba-huba, deʼ mata-mata yoöelu-eluku aha yäumo o uku mangöto deʼ o walira itötoka-tokarika, enagënanga o honenge mahinotoka.”

⁹O malaekat tumidi manga hidogoronaka imatëngo wasosö inoka ongï-ongï iö oma-omanga de o bodito tumidi mabobaha gënanga waino ngohino deʼ wohitemo, ”Naino! Ngohi aha tonihidumutu ngonaika o Ngoheka mo Kawi-kawingi, enagënanga ma Duba ma Ngohaka ngoihekata.”

¹⁰ Ho ma Jou Madutu ai Womaha ihi kuahaino ngohi, deʼ o malaekat gënanga ihiao ngohi o l̄oku duru magögurutil̄e matubuil̄e. Enanga ihihidumutu ngohino o Yerusalem, o kota itebi-tebini gënanga, o kota gënanga iuti o horogaka deʼ yauku ma Jou Madutuino,

¹¹de maletongo deʼ ma Jou Madutu aimulia. O kota gënanga ileto-letongo hokä o intan de o folori, hokä o helewo baiduri pandan madödodono hokä o kahinä maleto-letongo.

¹² Mabebeno o mehele magilolitino magurutil̄e de malamoko, de mangorana ngimoi de hinoto, deʼ o malaekat ngimoi de hinoto yögöana. Mangora-ngoranika yödulihika o Israeloka manga hoana de manga ahali ngimoi de hinoto manga roma-romanga.

¹³Naga o ngorana hange yöhimanga yögeto-getongo madumutu: hange o wange mahiwaroko, hange o koreharail̄e, hange o koremieuku, deʼ hange o wange madumuniha.

¹⁴O kota gënanga mabebeno o mehele ihigoko o pondasi mahelewo ngimoi de hinoto mal̄okuoka. O pondasi mahelewoka gënanga yödulihika ma Duba ma Ngohaka airasul yangimoi de yahinoto gënanga manga roma-romanga.

¹⁵ O malaekat mimatemo-temo dede ngohi gënanga de aiduduga o gurasi, la watuga o kota gënanga, mangora-ngorana deʼ mabebeno o mehele.

¹⁶O kota gënanga itüku pahagi iata itotiai — magurutu imatero de mangöata. Ho o malaekat gënanga watuga o kota gënanga de touna aiduduga; inyata magurutu o metere o kilo 2400 (o ribuhu hinoto de o ratuhu iata); mangöata deʼ magurutil̄e imatero hokä magurutu.

¹⁷Maöraha o malaekat gënanga watuga mabebeno o mehele, inyata mabebeno o mehele gënanga magurutil̄e o metere mori butanga. O duduga yapöpäke-päke o malaekat ganga o duduga yapöpäke-päke o nyawa.

¹⁸ O kota gënanga mabebeno o mehele ihidiai de o helewo baiduri pandan, ho dë makota mahirete de o gurasi madutu, mamododono hokä o kahinä.

¹⁹O kota gënanga mapondasi mahelewo yaporomu de hagala rupa o intan de o folori. Mapondasi madodihiraka mahelewo ihidiai de o helewo baiduri pandan, mahinotoka de o helewo nilam, mahangeoka de o helewo yakut, maiatoka de o helewo zamrud,

²⁰mamotoaka de o helewo baiduri sepah, mabutangaka de o helewo delima, matumidoka de o helewo ratna cempaka, matufangeoka de o helewo pirus, mahiwoka de o helewo topas, mangimoioka de o helewo krisopras, mangimoi de moioka de o helewo lazuardi, deʼ mangimoi de hinotoka de o helewo kecubung.

²¹Ngimoi de hinoto mangorana ganga ngimoi de hinoto o muhutika, ongorana moi-ongorana moi ihidiai de o muhutika moi. Ma ngëkomo o kotaoka gënanga i hi diai de o gurasi madutu, mamododono hokä o kahinä ilöleto-letongo.

²²Ngohi tamäkeua ma Jou Madutu ai Tau o kota magoronaka gënanga, hababu ma Jou Madutu ai Tau ganga ma Jou mahirete, ma Jou Madutu Duru woko Kuaha, deʼ ma Duba ma Ngohaka gënanga.

²³ O kota gënanga iparaluua o wange malako ekola o mede yodihiwara, hababu ma Jou Madutu aimulia yatararono, deʼ ma Duba ma Ngohaka gënanga ganga toëna mahilo.

²⁴ O hoana de o berera manyawa o duniaka aha yotagi Ai dararono magoronaka, deʼ o kokoano ma aha yao toönanga manga kaya o kota gënanga magoronaika.

²⁵ Mangorana-mangorana o kota gënanga aha ihelengaika o wange magurutu; aha koyabënoua, hababu genangoka yohutuokaua.

²⁶O hoana deʼ o berera manyawa manga horomati deʼ manga kaya aha yao o kota gënanga magoronaika.

²⁷ Mä o nyawa yadödodiai hagala o hali haemo-emono, ekola o nyawa yoelu-eluku — madipoko okia dika mapöpese-peseke, hakali-kali aha yowohamua magoronaika. Aha yowohama duga-duga o nyawa naga manga romanga yatuli-tulihoka o Nyawa yo Wango-wango ma Buku magoronaka, ma Duba ma Ngohaka gënanga Ai buku.