Read Tobelo O HIMATOKO 22 Bible Online

O HIMATOKO 22 - Tobelo bible

O HIMATOKO 22

¹ O malaekat genangoli wohïhimatoko ngohino o ngairi ma akere ihidöa-döaka o wowango. O ngairi gënanga ileletongo hokä o kahinä maleto-letongo deʼ ihahuru ma Jou Madutu de ma Duba ma Ngohaka manga kuruhi imomuliaino,

² o kota gënanga mangëkomo mahidodogoronaoko. O ngairi gënanga madatekino, yöarihohononga naga o gotamautu o ngangomatiti, o taongo moi, ihohoko mangimoi de mahinoto, enagënanga o mede moi mamoi. To ëna mahoka yapäke la yahitogumu o hoana de o berera manyawa.

³ O kota gënanga magoronaka kamoiö de yämäkeua ma Jou Madutu ailolai yäkorona. Ma Jou Madutu deʼ ma Duba ma Ngohaka manga kuruhi imomulia aha naga o kota gënanga magoronaka. Aigogilaongo aha yopuji Unangika,

⁴deʼ yamäke Aibiono. Airomanga aha yödulihi toona mangabionoko.

⁵ Onanga aha yöparaluua o hilo ekola o wange malako madararono, hababu yöhutuokaua, deʼ Ma Jou Madutu mahirete aha wätararono önanga. Ho önanga aha yopareta hokä o koano kahiado-adonika.

⁶Daha o malaekat gënanga ihitemo ngohino, ”O demo-demo nënanga itiai deʼ yakunu hangaku. Ma Jou Madutu wahidödöa-döaka ai Womaha o nabi-nabika, wähulokoka Aimalaekat la wahidumutu Aigogilaongika okianaga demadataiti kokiani idadi.”

⁷”Niatailako nihidodiai nënanga!” o Yesus wato, ”Ngohi aha itaiti toböa. Youtumu o nyawa ihingou-ngounu o nubuat mademo-demo o buku nënanga magoronaka!”

⁸Ngohi, o Yohanis, toihenoka deʼ tamäkeoka mata-mata nënanga. Ipaha ngohi toihene deʼ tamäke iböto ngohi tomahitudukuku o malaekat wohihimato-matokoka mata-mata gënanga ngohino mahimangoka, deʼ ngohi tomau tihuba ünanga,

⁹mä ena ihitemo ngohino, ”Uha! Uha nohihuba ngohi! Nïhuba ma Jou Madutu! Hababu ngohiö ma kao gilaongo hokä ngona, deʼ hokä ani roriadodoto o nabi-nabi deʼ o nyawa mata-mata ihingöngou-ngounu hagala o behehongo o buku nënanga magoronaka!”

¹⁰Daha ënanga ihitemoli, ”Uha narahasia o nubuat mademo-demo o buku nënanga magoronaka, hababu maöraha itigioka mata-mata nënanga aha idadi.

¹¹ O nyawa madorou, mal̄aikala gila-gila o dorou yodiai; o nyawa yopöpese-peseke, mal̄aikala manga diri yapeseke; o nyawa yamömote-moteke ma Jou Madutu aimau mal̄aikala gila-gila yamoteke ma Jou Madutu aimau, deʼ o nyawa yowango duga-duga mangale ma Jou Madutu, mal̄aikala gila-gila yowango duga-duga mangale ma Jou Madutu.”

¹² ”Nia tailako nihidodiai nënanga!” o Yesus wato, ”Itedekanokaua Ngohi aha toböa deʼ toao o hewa la tabalaha moi-moi o nyawa imoteke okianaga yadodiaioka.

¹³ Ngohi nanga madodihiraka deʼ mabobahaka; Ngohi nanga ma Jou Mamulaengohi hiädono ihi Bobaha.”

¹⁴ Youtumu o nyawa yafoka manga juba hiädono itebini hiädono önanga de manga haku yaol̄omo o wowango magota mautu mahohoko deʼ yowohama o kota gënanga magoronaika yanonu toëna mangorana.

¹⁵Mä o nyawa yadodiai hagala o hali duru itotorou, yogogumatere deʼ yomai-maihi, hagala o nyawa yododiai ipöpese-peseke, yotoma-toma, o gomanga yahuba-huba, deʼ hagala o nyawa yoelu-eluku, kayaoa de manga demo-demo kayaoa de manga manarama, o nyawa geönanga mata-mata manga ngï o kota gënanga toëna maporetoka.

¹⁶ ”Ngohi o Yesus, tohidingotoka Ahi malaekat nginika hupaya ënanga inihingahu o hali-o hali nënanga mangale o jemaat-jemaat manga paralu. Ngohi nënanga o Daud aidifauku; Ngohi nanga o koruku o wange mahiwaroko i totararono gënanga.”

¹⁷ Ma Jou Madutu ai Womaha de ma Ngoheka mo Kawi-kawingi yotemo, ”Niaino!” Moi-moi o nyawa yoihe-ihene nënanga kokiani yotemoli, ”Niaino!” O nagona manga kiriti madudungu kokiani önanga yaino! Deʼ o nagona yoigo, kokiani önanga ima l̄ë o akere ihidöa-döaka o ngango gënanga de koiwa mabobangu.

¹⁸ Moi-moi o nyawa yoihe-ihene o nubuat mademo-demo o buku nënanga magoronaka, ngohi, o Yohanis, onangika tohidöaka o hohininga nënanga: nako o nyawa yödogo okianaga moi o nubuat mademo-demoika nënanga, done ma Jou Madutu aha wödogo o nyawa ge önanga manga hukumanga deʼ hagala o balä ihiö ade-adeoka o buku nënanga magoronaka.

¹⁹Deʼ nako o nyawa yakuranga okianaga moi o nubuat nënanga mademo-demo, done ma Jou Madutu o aha wakuranga manga hidoku naga ihi o ade-adeoka o buku nënanga magoronaka — enagënanga o wowango magota mautuino mahidoku deʼ o kota i tebi-tebinino gënanga.

²⁰Unanga wohiöado-adono o abari mata-mata nënanga wotemo, ”Itiai, Ngohi aha itaiti toböa!” Amin! Naino, ya Jou Yesus!

²¹Tanu ma Jou Yesus wähidöaka Ai barakati ma Jou Madutu Ai umatika mata-mata!