Read Tobelo O HIMATOKO 4 Bible Online

O HIMATOKO 4 - Tobelo bible

O HIMATOKO 4

¹Ipahaika gënanga ngohi tamäkeoli o lolega. Ngohi tamäke o horogaka o ngorana moi ihelengaika. Ipaha toihenoli o ilingi kama mulaengohi itemoka ngohino hokä o trompet mailingi. O ilingi gënanga itemo, ”Naino nodoa nengil̄e. Ngohi aha tonihimatoko ngonaika damä okia aha idadi.”

² Gila-gila dika ngohi ihi kuaha ma Jou Madutu ai Womaha. Daha ngohi tamäke o horogaka naga moi o kuruhi imomulia, deʼ naga womatëngo o nyawa wogogeruku o kuruhi imomuliaka gënanga.

³O nyawa gënanga aibiono mame letongo hokä o helewo baiduri pandan, deʼ o delima mahelewo. O ngawatoro moi yogöuku o kuruhi imomulia gënanga marupa magoguhurungu.

⁴De madüku ihululunino o kuruhi imomulia magoronaka yakiloliti gënanga, naga o kuruhi imomulia monaoko de iata mahomoa. Genangoka yogogeruku o tutuda yamonaoko de yaruata manga pakeanga magare-garehe, deʼ imahi tamunuku o makota o gurasi.

⁵ O kuruhi imomuliaino gënanga itararono o leletongo macahaya deʼ ihupu o dotoreke idilo-dilongo mailingi. Deʼ o kuruhi imomulia gënanga mahimangoka naga o oboro o gahumu tumidi itoka-tokara; gënanga ma Jou Madutu ai Womaha o gahumu tumidi.

⁶ Tamäkeoli o kuruhi imomulia gënanga mahimangoka okianaga moi hapulo-pulono hokä o ngöto o kahinä mamododono hokä o kahinä maleto-letongo. O kuruhi imomulia yakilolitino, madatekino yogetongo, naga o dodadi iata, mahimangoka deʼ maporetoka iomanga de malako.

⁷O dodadi madodihiraka holega-lega hokä o singa. Mahinotoko, hokä o hapi manauru. Mahangeoka toënanga mabiono hokä o nyawa mabiono. Maiatoka, holega-lega hokä o totaleo rajawali magogiria ihoho.

⁸ Ododadi iata gënanga, moi-moi toënanga magahuhu butanga, deʼ yakilolitino deʼ doka magoronaka iomanga dema lako. O hutu de o wange o dodadi-dodadi gënanga imatogu-togumua i nyanyi, ”Notebini, notebini, notebini Jou, ma Jou Madutu noko Kuaha; nänaga, nagaka, deʼ naga hokogenangika.”

⁹O dodadi iata gënanga ihinyanyi o puji dema lugo-lugoka, horomati deʼ o sukur Unangika wogögogeruku o kuruhi imomuliaka gënanga, enagënanga mangale Unanga wowango kahiado-adonika. Deʼ maöraha o dodadi-dodadi gënanga inyanyi,

¹⁰o tutuda yamonaoko de yaruata gënanga imahitudukuku Ai himangoka o nyawa wogögogeruku o kuruhi imomulia gënanga, daha iwihuba Unanga wowango kahiado-adonika. Ipaha önanga ihikaweli manga makota-makota o kuruhi imomulia mahimangika gënanga de yotemo,

¹¹”Ya Jou, yamia Jou Madutu! Ngona dika ipatutu natarima o higiriri, o horomati deʼ o kuaha. Hababu Ngonala hagala moi-moi madodadi, deʼ tongona Ani mau ö hagala moi-moi gënanga idadioka deʼ i wango.”