Read Tobelo O HIMATOKO 5 Bible Online

O HIMATOKO 5 - Tobelo bible

O HIMATOKO 5

¹ Ipaha ngohi tamäke o buku moi iluluino to Unanga Ai giamoka wogogogeruku o kuruhi imomulia gënanga. O buku gënanga iömanga de o dulihi arihohononga deʼ ihisapu de o segel o gahumu tumidi.

²Daha ngohi timäke o malaekat womatëngo wonau-nauru wopöa-pöaka de aiilingi maamokil̄e, ”O nagona ipatutu yawedere o segel-segel nënanga deʼ yahelenga o buku nënanga?”

³Mä yaoa o horogaka, yaoa o duniaka, ekola ngaroka o dunia matimioka hamäkeua o nyawa moiö yakunu yahelenga o buku gënanga, deʼ yolega magoronaika.

⁴Ma ngohi toari hadangö ihihöhowo-howo hababu o nyawa moiö de koiwa ipatutu yahelenga o buku gënanga, deʼ yolega magoronaika.

⁵ Daha womatëngo o tutuda-o tutuda manga hidogoronaka gënanga wohitemo ngohino, ”Uha noari! Nolega! O singa o ahali de o hoana o Yehudaino, o Daud wolamo-amoko aidifauku, woutumoka. Unanga wakunu wapooteke o segel tumidi deʼ wahelenga o buku gënanga.”

⁶ Ipaha ngohi tamäke o Duba ma Ngohaka moi imaokoino o kuruhi imomulia gënanga mahidödogoronaka, ihigilolitino o dodadi iata deʼ o tutuda mata-mata gënanga. O Duba ma Ngohaka gënanga hapulo-pulono hokä haluitoka mangomahino. To ënanga matataduku tumidi deʼ malako tumidi: enagënanga o womaha tumidi ma Jou Madutuino yahulokoka o duniaika ingodumu.

⁷Ipaha o Duba ma Ngohaka gënanga itagi yaika deʼ yal̄ë o buku iluluino gënanga o nyawa aigiama manirakoka wogogogeruku o kuruhi imomulia mal̄okuoka.

⁸ O Duba ma Ngohaka gënanga idiai hokogënanga magogiriaka, yatilabukuku mahimangoka o dodadi iata deʼ o tutuda-o tutuda yamonaoko de yaruata. Onanga moi-moi yasöika o kecapi deʼ o belu-belu o gurasi madol̄a o manyanyi, enagënanga ma Jou Madutu aiumati manga niata.

⁹ Onanga yonyanyi o lugo mahungi moi: ”Ngona i patutu nal̄ë o buku gënanga deʼ napooteke masegel-segel. Hababu Ngona initomaka, deʼ de Ani honenge, o nyawa hagala o hoanino, o bahasa, o negara deʼ o hoana de o berera ini ijaka mangale ma Jou Madutu.

¹⁰ Ngona nahidadioka önanga o hoana moi o imam-imam noma dinga-dingakoka, hupaya önanga iwileleani tongone nanga Jou Madutu, deʼ yopareta o dunia mal̄okuoka.”

¹¹ Ipaha ngohi tamäkeoli. Ngohi toihene o malaekat mailingi maribu-ribuhu deʼ masäna iribu-ribuhu mangöe. Onanga imaoko yakiloliti o kuruhi imomulia deʼ o dodadi iata de o tutuda-o tutuda gënanga.

¹²Deʼ onanga yonyanyi de manga ilingi makuatil̄e, ”O Duba ma Ngohaka yalui-luitoka mangomahino gënanga, ipatutu mangale yatarima o kuaha; o kaya, o barija deʼ o kuata; ünanga ipatutu iwihoromati, iwihimulia deʼ iwihigögogiriri!”

¹³Daha ngohi toihene hagala o dodadi o dihangoka, o duniaka, o dunia matimioka deʼ o ngöto magoronaka — de madipoko, hagala o dodadi o alami madol̄a nënanga — i nyanyi, ”Unanga wogogere o kuruhi imomulia mal̄okuoka, deʼ o Duba ma Ngohaka ikokurutil̄e gënanga, ganga iwihigögogiriri deʼ iwihohoromati de womulia deʼ wokuaha mangale kahi ado-adonika!”

¹⁴Ododadi iata gënanga yohaluhu, ”Amin!” Deʼ o tutuda-o tutuda genangö yatilabuku deʼ iwi huba.