Read Tobelo O HIMATOKO 6 Bible Online

O HIMATOKO 6 - Tobelo bible

O HIMATOKO 6

¹Ipaha gënanga ngohi tamäke o Duba ma Ngohaka gënanga yapooteke o segel madodihiraka o segel tumidi mahidogoronaka gënanga. Daha ngohi toihene o dodadi iata mahidogoronaka gënanga moi itemo, ”Naino!” Mailingi gënanga hokä o dotoreke mailingi.

² Ngohi tömälega, daha tamäke moi o kuda magare-garehe. Wobare-barenuku womajoika moi o toimi mal̄eha, deʼ unangika iwihidöaka moi o makota. Unanga wohihira hokä womatëngo woö utu-utumu woiki waora o utumu.

³Ipaha o Duba ma Ngohaka gënanga yapooteke o segel mahinotoka, deʼ ngohi toihene o dodadi mahinotoka itemo, ”Naino!”

⁴ Daha o kuda mahomoa moi ihupuoli. O kuda gënanga marupa madoka-dokara. Wobare-barenuku iwihidöaka o kuaha mangale wahihanga o dame o dunia mahimangoka, laʼ o nyawa imakotoma. Unanga iwihidöaka moi o oworo koha amoko.

⁵ Daha o Duba ma Ngohaka gënanga wapooteke o segel mahangeoka. Deʼ ngohi toihene o dodadi mahangeoka itemo, ”Naino!” Ngohi tomalega, tamäke o kuda madaro-daromo moi. Wobare-barenuku aigiamoka wasöino o didibanga o habi moi.

⁶Deʼ ngohi toihene okianaga moi hohigihe-gihene hokä o ilingi ipöaka o dodadi iata mahi dogoronaino gënanga. O ilingi gënanga itemo, ”O gandum maoa-oa o litere moi maija o hewa o wange moi, deʼ marupa mahomoa o litere hange maija o hewaö o wange moi. Mä uha niabodito o zaitun mautu-mautu de o angguru madumule!”

⁷I paha o Duba ma Ngohaka gënanga yapooteke o segel maiatoka. Deʼ ngohi toihene o dodadi maiatoka itemo, ”Naino!”

⁸ Ngohi tomalega, daha tamäke o kuda moi kama mule-mule. Wobare-barenuku airomanga o Honenge. Ai poretino, ünanga iwinïkino imahi tigi-tigiha o Honenge ma Alami. O dunia regu iata makuaha nënanga yahilapahi onangika, laʼ onanga yakunu yotoma itilakuru o parangi, itilakuru maöraha o habirokata, itilakuru o panyake itagi deʼ i tilakuru o aiwani ihohatera.

⁹Ipaha gënanga o Duba ma Ngohaka gënanga yapooteke o segel mamotoaka. Ngohi tamäke o huhuba mangï matimioka naga o nyawa yohone-honenge manga jiwa yätoma karana önanga ihikuata ma Jou Madutuino aibehehongo itilakuru toönanga manga hakihi.

¹⁰Onanga imapöaka de manga ilingi kohakuatil̄e, ”Ya Jou noko Kuaha, notebini deʼ notiai! Hokokiaohi madekana daha Ngona natailako o dunia manyawa deʼ nähukumu önanga karana ngomi imitomaka?”

¹¹Onanga yahidöaka o juba magare-garehe imateke momeleko. Daha önanga yahuloko imahibatongo öraha mahuhutulohi, hiädono magegetongo itiaioka manga dodiawo o parangi moi deʼ manga roriadodoto aha yatoma hokä önanga.

¹² Daha ngohi tamäke o Duba ma Ngohaka gënanga yapooteke o segel mabutangaka. Idadi o ohu kohakuata. O wange idadi itaromo hokä ngöere madaro-daromo madodorou, deʼ o mede idadi itokara hokä o awunu.

¹³ O murumu-o murumu iotaka o dihanguku o dunia mal̄okuku, hokä o ara mahohoko iomukuahi iotaka mautuoka, maöraha o hidal̄oko ikua-kuata yagiwi.

¹⁴ O dihanga imahihanga hokä o karatahi yalulu, deʼ mata-mata o l̄oku deʼ o nühu ihi tingaka mangïoka.

¹⁵ Daha o dunia makokoano, yolago-agomo, o kokapita, o nyawa yokaya-kaya deʼ o nyawa yokokuaha deʼ o nyawa mahomoahi, iyaoa o gilaongo iyaoa o nyawa yololapahioka, mata-mata manga diri yaiunu oaruku-oaruku magoronaka deʼ o l̄oku mahelewo madonga-dongaika.

¹⁶ Onanga yopöaka o l̄oku-o l̄okuika de o helewo-o helewoika gënanga, ”Nomi bänga ngomi! Nomi ngiunoka ngomi ünanga Ai lolegaka Wogogogeruku o kuruhi imomulia mal̄okuoka, deʼ aidohata o Duba ma Ngohakino gënanga!

¹⁷ Ma Jou aigangamo mawange iamo-amoko iböaka, örahanënanga önanga yakopoa manga gangamo, deʼ o nyawa moiuaö yakunu imatumungu toönanga manga himangoka!”