Read Tobelo O HIMATOKO 8 Bible Online

O HIMATOKO 8 - Tobelo bible

O HIMATOKO 8

¹Maöraha o Duba ma Ngohaka gënanga yapooteke o segel matumidoka, o horoga idadi irïdi doneho jam mahononga madekana.

²Daha ngohi tämäke o malaekat yatumidi imaokoino ma Jou Madutu aihimangoka, deʼ onanga yahidöaka o trompet o gahumu tumidi.

³ O malaekat womatëngo mahomoa waoino o dupa mangï o gurasi o gahumu moi, waino deʼ womaokoino o huhuba mangï mahimangoka. Iwihidöaka unangika o manyanyi duru kohangöe la wogelenga ma Jou Madutu aiumati mata-mata manga niatika deʼ mangale ihihuba o huhuba mangï o gurasioka wamomäke-mäke o kuruhi imomulia mahimangoka.

⁴Imakinïki de ma Jou Madutu aiumati manga niata, o dupa gënanga magogiria iwango manofo idoa ikokapupu o malaekat aigiamoka womaoko-okoino ma Jou Madutu aihimangoka gënanga.

⁵ Ipaha o malaekat yal̄ë o dupa gënanga, deʼ yönoa de o uku o huhuba mangïinoka, daha ihikaweli o dunia mal̄okuku. O dotoreke ipotoka deʼ o leletongo isawi iloliliara, deʼ idadi o ohu.

⁶Ipaha gënanga, o malaekat yatumidi imahijöika o trompet tumidi gënanga imahidiaioka la yawuwu.

⁷ O malaekat madodihiraka aitrompet wawuwu, o awana o es deʼ o uku imaganu o awunu itiha o duniauku kahagiria. O dunia regu hange youku imata-mataka; hokogenangö o gota-gota regu hange, deʼ moi-moi o momo ma ijo-ijo.

⁸Daha o malaekat mahinotoka aitrompet wawuwu, okianaga moi duru kohaamoko holega-lega hokä o l̄oku itoka-tokara ihi kaweli o ngöto magoronauku. O ngöto o regu hange ingali imadadi o awunu,

⁹deʼ hagala o dodadi o ngötoka o regu hange ihonenge; hoko genangoli okapa-okapa o regu hange ibinaha.

¹⁰ Ipaha o malaekat mahangeoka aitrompet wawuwu, o murumu moi kohaamoko, itoka-tokara hokä o oboro, o dihangoka de itifa, daha yatapal̄u o regu hange ongairi-ongairi de o akere malako-o akere malako.

¹¹ (O murumu gënanga maromanga ma ”Mali”.) O akere o regu hange idadi imali, deʼ o nyawa kamangangöe yohonenge karana yaokere o akere idadioka imali-mali gënanga.

¹² Daha o malaekat maiatoka aitrompet wawuwu. O wange iregu hange, yapoka o regu moi, o mede iregu hange yapoka o regu moi, o murumu-o murumu iregu hange yapoka o regu moi hiädono makuata iregu hange o regu moi macahaya makuata ihihanga. O wange-wangeö i regu hange o regu moi i tararonua deʼ hokogenangö o hutu-hutu iregu hange o regu moi hokogenangoli.

¹³Daha ngohi tamäke moi o totaleo rajawali magogiria ihoho kohagurutil̄e o gitawaino, ngohi toihene ipöaka, ”Bodito! Bodito! Bodito o nyawa mata-mata o duniaka damä maöraha okia o malaekat yaruange mahomoa manga trompet yawuwu!”