Read Tobelo O HIMATOKO 9 Bible Online

O HIMATOKO 9 - Tobelo bible

O HIMATOKO 9

¹Daha o malaekat mamotoaka aitrompet wawuwu, deʼ ngohi tamäke o murumu moi itiha o dihangoka deyauku o duniauku. O murumu gënanga ihidöaka o honenge mawai makusi.

² O murumu gënanga yahelenga o honenge mawai gënanga, daha ihupu o nofo magoronail̄e hokä o rikana maago-agomino inofo. O wange deʼ o gitawa idadi ihuhutu mangale o wail̄e gënanga manofo.

³ Daha o nofo magoronaino gënanga ihupu okähoho-okähoho iuti o duniauku. Okähoho-okähoho gënanga ihidöaka o kuaha imatero hokä ihidöaka o kokakatamika.

⁴ Yoduhunu ënanga yabinaha o momo, ekola o gota-gota, ekola o dadatomo-o dadatomo mahomoa. Enanga duga-duga yakunu yaparangi o nyawa manga bimaoaoko koiwa o segel manonako ma Jou Madutuino.

⁵O kähoho-o kähoho gënanga ihigumal̄aua yatoma o nyawa geönanga, mä duga-duga yähangihara önanga o mede motoaino madekana. Mahiri, idadi hababu mangale o kähoho-o kähoho gënanga yahangihara, hokä imatero mahiri idadi hababu mangale o kokakatama mabiha.

⁶ O mede motoa madekana gënanga, o nyawa gënanga ihidailako laʼ yohonenge, mä onanga yakunua yohonenge; onangö yoigo yohonenge, mä o honenge i kurutika dede önanga.

⁷ O kähoho gënanga marupa hokä o kuda imahidiai laʼ iparangi. To ënanga mahäekoka okianaga moi holega-lega hokä o makota o gurasi. To ënanga mabiono hokä o nyawa mabiono.

⁸ To ënanga matadauru hokä o ngoheka manga tadauru deʼ to ënanga maingiri hokä o singa maingiri.

⁹ To ënanga ma alu ihitamunu de okianaga moi yodangadeika o baju o behi. Toënanga magahuhu maruruhu hokä o kuda de makereta o doomu moi maamo-amoko mailingi magogiria yongohama o parangi magoronaika.

¹⁰To ënanga mabikini deʼ mabiha hokä o kokakatama. Deʼ toënanga mabikini magoronaka gënanga igogere to ënanga makuata la yahangihara o nyawa o mede motoaino madekana.

¹¹To ënanga de manga koano yapareta ënanga, deʼ o koano gënanga enagënanga o malaekat wogöa-göana o honenge mawai. Maromanga de o Ibranioka manga demo enagënanga o Abadon; deʼ o Yunanioka manga demo o Apolion (mamangarati ”Yakokilianga”).

¹²O bodito mahira ipahaka. Ipaha gënanga naga o bodito hinotoli kiani iböa.

¹³ Ipaha o malaekat mabutangaka aitrompet wawuwu. Ngohi toihene o ilingi iböa o huhuba mangï o gurasi malibuku iatoka deyaino kiaka naga ma Jou Madutu aihimangoka.

¹⁴O ilingi gënanga itemo o malaekat mabutangaika gënanga, ”Nähohe o malaekat iata yaliko-likoika gënanga o Efrat ma Ngairoka!”

¹⁵O malaekat iatö gënanga ihohe. Onanga yahidiaioka yodingakika mangale o jam, o wange, o mede de o taongo gënanga la o nyawa o regu hange o umati o nyawa yongodumu, yatoma o regu moi.

¹⁶Ngohi ihihingahu magegetongo manga duduono yokokuda-kuda gënanga ganga yajuta o ratuhu hinoto manga ngöe.

¹⁷De o lolega magoronaka, ngohi tamäke o kuda-o kuda gënanga deyö bare-barenuku. Yobare-barene imahi noauku o baju o behi marupa mamodokara hokä o uku, mamibihi hokä o nilam mahelewo deʼ mamogurati hokä o walira. Mahäeke o kuda-o kuda gënanga hokä o singa mahäeke, deʼ mauruhi ihupu o uku, o nofo deʼ o walira.

¹⁸Umati o nyawa o regu hange yätoma o regu moi de o huha gënanga, enagënanga o uku, o nofo, de o walira ihupu-hupu o kuda mauruiha gënanga.

¹⁹O kuda-o kuda gënanga makuata igogere mauruoka de mabikinokaö. Mabikini-mabikini hokä o dodiha de mahäekoka. O kuda-o kuda de mabikini gënanga, yähangihara o nyawa.

²⁰ Mä umati o nyawa mahou yätomaua de o huha-huhaö gënanga, yamal̄aikauaoli toönanga mahirete manga giama mamanarama. Onanga imatogumua yahuba o womaha-o womaha madorou deʼ o gomanga-o gomanga o gurasi, o haäka, o tabaga, o helewo deʼ o gota yakunua imahiöriki ekola imahihene, ekola imadagiö.

²¹Onanga yamal̄aua toönanga manga manarama itotorou, enagënanga, o doma ima popipidoro, o howono, deʼ o dohiki.