Read Tobelo O NGO RUT 2 Bible Online

O NGO RUT 2 - Tobelo bible

O NGO RUT 2

¹O ngo Naomi tomunanga ami riadodoto womatengo ami rokata wohone-honengino, o Elimelekh. O nyawa wokaya deʼ iwi nako. Ai romanga o Boas.

² O wange moiuku o ngo Rut mato o ngo Naomiika, ”Ayo, ngohi toparamisi tomau o dumuleika hupaya totoraka o gandum boteka itifauku manga giamoka yoö utu-utuku. Ngohi tamao maraioka nagaö dika o nyawa aha ihihi gumal̄a ngohi todiai o hali gënanga.” ”Kayaoa, ngohaka!” o ngo Naomi mohaluhu, ”noiki!”

³Daha o ngo Rut moiki o dumuleika deʼ motoraka o gandum ma nïki yoö utu-utuku. Ima daenika munanga moiki o Boas ai dumuleika.

⁴Itedekanua ipahaika o Boas woboa o Betlehem deʼ waino deʼ watabea yoö utu-utukika, wato, ”Tanu ma Jou naga dede ngini.” Yoö utu-utuku yohaluhu, ”Tanu ma Jou wonihi barakati Bapa.”

⁵Daha o Boas wileha ma Mandorika, ”O ngoheka nagona gënanga?”

⁶Ma mandor gënanga wohaluhu, ”Munanga o Moab manyawa ma ngo heka, daha moboaino ima nïki o ngo Naomi o Moab mabereraka deʼ yaino.

⁷Momahi demo ngohino hupaya tomi higumal̄a mänïki youtu-utuku manga poretino mangale motoraka o gandum itifa-tifauku. Kao ngoruminohi munanga hoko genangika momanarama, deʼ öraha nënanga dahaö momatogumu öraha mahuhutulu momahi batongo o tau-tauoka.”

⁸Daha o Boas womitemo o ngo Rutika, ”Beika noihenohi. Ngaro uha ngona noiki notoraka o gandum o nyawa mahomoa manga dumuleoka. Notoraka dika nenangoka nima kinïki deʼ tongohi ahi ngongoheka yomomanarama. Natailako nohi dodiai o kiaika önanga yoiki youtuku. Salalu nanïki önanga deʼ uha nokurutika dede önanga. Nako ngona ani kiriti madudungu, noma l̄ë dika o akere o rube-rubeoka yoguhe ukuoka o nau-nauru yomö momanarama. Ngohi tahi pareta hupaya önanga uha inihö hiagaga.”

¹⁰Moihene gënanga, o ngo Rut momahi tudukuku o Boas ai himangoka deʼ motemo, ”Bapa, ngohi topatutua tatarima ani manarama hoko gënanga marahai ngonaino Bapa. Ngohi nënanga o nyawa maporetino deʼ ipatutua tamake ani horomati Bapa!”

¹¹O Boas wohaluhu, ”Ngohi toihenoka mangale hagala moi-moi ngona nadiaioka ngoni hunungika maöraha ani rokata wohonenge ipahaino. Ngohi tohi öriki ngona namal̄aka ani dimono deʼ ani berera mangale noboa nenangoka nimako gogere moi deʼ o nyawa ngona nänakouahi.

¹²Tanu ma Jou wabalahi hagala ani oa-oa. Tanu ngona natarima o kia ipö patu-patutu ma Jou wonihi döaka ngonaika, o Israeloka manga Jou Madutu, karana ngona noboaka mangale noma hohongo Unangika!”

¹³O ngo Rut mohaluhu, ”Bapa igoungu yaoa ngohino, ngaroka ngohi mimaka daenua deʼ ani nyawa Bapa yomomanarama. De ani demo mahailoa Bapa duru yalaru tongohi ahi hininga.”

¹⁴Maöraha mangale o ngol̄omo maöraha, o Boas womitemo o ngo Rutika, ”Naino nol̄omo. Nenanga o teongo.” O ngo Rutö mol̄omo ima kinïki deʼ yoö utu-utuku. O Boasö womihi döaka munangika o gandum ibobobäta deʼ o ngo Rut mol̄omo hi adono imi punuhu. Mol̄omo iböto kanaga ohi mahou.

¹⁵Ipaha o ngo Rut moikoli motoraka o gandum. Munanga moikoka o Boas wätemo yoö utu-utukika, ”Nako munanga matoraka o gandum ilö liko-liko inoka mal̄aika dika. Uha nimidiai munanga imi mal̄eke ekola nimi ngamo munanga. Kayaoa ngini nihangaja nia rahuku mahutu-mahutu nia liko-likoino gënanga, deʼ nia tifauku munanga matoraka.”

¹⁷O ngo Rut gila-gila dika motoraka o gandum o dumule okahi adono o bimaoa. Iböto munanga ma poha-poha o gandum ma roëhe gënanga mangale marero mamui-mamui magoselaka, inyata munanga matoomuoka done o kilo ngimoi.

¹⁸Ipaha munanga molio o kotaika deʼ ma ao ami hasili matö tora-torakino gënanga deʼ mohi matoko ngomi hunungika hokokia ma amoko motoraka. De munangö mohi döaka ngomi hunungika gënanga o inomo mamo mata-mataua maöraha mol̄omo.

¹⁹O ngo Naomi momitemo munangika, ”O kiaka ngona namake mata-mata gënanga? Tonagona manga dumule ngona nomanarama o wage nënanga? Tanu ma Jou Madutu wahi barakati o nyawa yododiai o oa-oa ngonaika gënanga!” O ngo Rut momi ade-ade o ngo Naomika mangï o gandum ma dumule munanga motö tora-toraka gënanga ganga madutu o nauru womatengo ai romanga o Boas.

²⁰ O ngo Naomi mato, ”Ngohaka, o nyawa gënanga tongone nanga dutu mahirete kohamidigi.” ”Unangala kiani wona tagongo mangale ngone. Tanu ma Jou wihi barakati ünanga. Ma Jou salalu wohi tatapu Ai jaji, yaoa o nyawa yowango-wangohi yaoa o nyawa yohone-honengoka.”

²¹Ipaha o ngo Rut motemoli, ”Ayo, o nyawa gënanga wotemoli, ngohi yakunu gila-gila totoraka o gandum mimaki nïki deʼ ainyawa yomomanarama hiädono ai dumule mahasili iutuku iböto mata-mata.”

²²”Iya, ngohaka,” o Naomi momi baluhu o ngo Rutika, ïgoungu iholoi yaoa ngona nomanarama nimaki nïki deʼ o ngongoheka yomomanarama o Boas ai dumuleoka. Hababu, nako ngona noiki o nyawa mahomoa manga dumuleika, ngona yakunu inihö hiagaga dokengoka!”

²³Hababu gënanga, o ngo Rut kahirahi manïki o ngongoheka yomomanarama o Boas ai dumuleoka. Munanga motoraka o gandum dokengoka hiädono o gandum mata-mata iböto iutuku — yaoa o gugutuku madodihiraka, yaoa o gugutuku mabobahaka. De ma dekana gënanga o ngo Rut mogogere deʼ ngomi hunungu.