Read Tobelo O NGO RUT 3 Bible Online

O NGO RUT 3 - Tobelo bible

O NGO RUT 3

¹O öraha muruono naga ipaha, o ngo Naomi momitemo o ngo Rutika, ”Ngohi kiani tohi dailako hupaya ngona yakunu nokawingoli deʼ noutumu.

²Koigoungua, ngona nimaki nïki nimanarama de o ngongoheka o Boas ai dumuleoka? Aa, o Boas gënanga tongone nanga dutu. Hoʼ, noihene! O hutu nënanga ünanga aha woiki wohidoro ai gandum ai dumuleoka.

³Noma ohiki öraha nënanga, nomahi pake o minya mabö bou-bounu deʼ nomahinoa ani pakeanga duru mahohailoa. Daha noiki o ngï ika kiaka o Boas magogiria womanarama wohidoro o gandum magobeoka. Notamä genangoka hiädono ünanga wol̄omo deʼ wokere wamal̄a, mä uha hiädono ünanga wohi öriki ngona naga genangoka.

⁴Nilega-lega woiki kiaka ünanga woma idu. Nako ünanga woma iduoka, noiki unangika deʼ napä ai gal̄oko, noma rubaiha ai l̄ouoka nomahi tigi-tigika. Damä ünanga aha wonihi ngahu ngonaika, okia kiani ngona nadiai.”

⁵”Kayaoa, Ayo,” o ngo Rut mohaluhu, ”ngohi aha tadiai mata-mata mangale no tö temo-temo Ayo.”

⁶Daha o ngo Rut moiki o nyawa yomö momanarama yahidoro o gandum magobeoka mangï ika. Doke ngoka munanga madiai mata-mata mangale ngomi hunungu momihö hulo-huloko.

⁷O Boas wol̄omo deʼ wokere iböto, ünanga wamao yaoaka deʼ ai hininga isosanangi. Daha ünanga woiki woma idu o gandum madoomu madatekoka. De komo ilingua o ngo Rut maika deʼ ma helenga o Boas ai gal̄oko, ipaha moma rubaiha ai l̄ouoka momahi tigi-tigika.

⁸O hutu goronaika itodokanino o Boas womomiki deʼ womau woma ngidulu ai roëhe. Unanga iwi todokana womi make naga o ngoheka momatengo moma idu momahi tigi-tigika ai l̄ouika.

⁹”Onagona ngonaë?” womileha. ”Ngohi o ngo Rut, Bapa!” o ngo Rut mohaluhu. ”Bapa ganga tongomi mia dutu itö tigi-tigi kiani natagongo mangale tongohi ahi wowango. Noigo Bapa nohil̄ë ngohi todadi ngoni hekata Bapa.”

¹⁰O Boas wato, ”Tanu ma Jou wonihi barakati ngona, ngohi ora.” ”Hohi totero deʼ okia ngona nodiaioka ngoni hunungika, mangale ani manaramaöraha nënanga ihi dumutu ani dora iholoi ilamokoli. Ngona yakunu dika noma lingiri o rokata magö-gö o nyawa yokö kaya-kaya manga hidogoronaka ekola o nyawa mihikiniö, mangona nodiaiua hoko gënanga.

¹¹Hababu gënanga, uha noha watere, Rut. Mata-mata ngona nogö gaho-gahoko gënanga aha ngohi tadiai; hababu o nyawa mata-mata o kotaka nënanga ihi orikioka ngona ganga o ngoheka momatengo ani hininga maoa-oa.

¹² Igoungu itiai, ngohi kiani tomahi tagongo mangale ani wowango, hababu ngohi nenangala ani dutu itö tigi-tigino. Mä kanagahioli womatengo mahomoa kiani womahi tagongo mangale ani wowango. De ünanga ganga tongohi ahi dutu iholoi itigi.

¹³O hutu nënanga ngona nomagö gogerohi dika nenangoka. Yarehe o ngorumino ngohi aha tileha bote ünanga womau wadiai womahi tagongo gënanga mangale ngona ekola kowali. Nako ünanga womodeke, kayaoa; mä nako ünanga woluku, ngohi tojaji deʼ ma Jou wowango-wango, ngohi aha tadiai tomahi tagongo gënanga. Oraha nënanga noma iduoka dika nenangoka hiädono o ngorumino.”

¹⁴Daha o ngo Rut momaidu genangoka o Boas ai l̄ouoka momahi tigi-tigika. Yarehe mangorumino kai hohü hutuohi, o ngo Rut momomikoka hupaya o nyawa uha imi make. Hababu o Boas woluku o nyawa ima tengö ihi öriki o ngo Rut maika o ngïika gënanga.

¹⁵O Boas womi temo o ngo Rutika, ”Naikuku ani salendang deʼ nahoheika nenangoka.” Daha o ngo Rut maiki ami salendang deʼ mahoheika. O Boas wogopoa o gandum o salendanguku gënanga done hokilo monaoko. Daha ünanga wo mi goraka o ngo Rut ami belekail̄e. Iböto gënanga o Boas woiki o kotaika.

¹⁶O ngo Rut momahi adonika o tauoka, ngomi hunungu momi leha, ”Sarakia idadi ngohaka?” Daha o ngo Rut moade-ade mata-mata o Boas wadodiaioka munangika.

¹⁷”De,” o ngo Rut motemo mohi gila-gila, ”koaholi ünanga wohihi döaka o gandum nënanga mata-mata ngohino, hababu wato ngohi yakunua tolio Ayoika deʼahi giama mahomoa.”

¹⁸Daha o ngo Naomo mato, ”Nodamä dika, ngohaka, hiädono ngona namake sarakia o hali nënanga damä mabobahaka. O Boas aha woma rïdua nako o perkara nënanga wabötuahi o wange nënanga.”