Read Tobelo O SAMUEL MADODIHIRAKA 1 Bible Online

O SAMUEL MADODIHIRAKA 1 - Tobelo bible

O SAMUEL MADODIHIRAKA 1

¹Naga o nauru wotengo, airomanga o Elkana, o Efraim aihoanino. Unanga wogogere o Rama makotaka, o Efraim madaeara de mal̄oku mabuturungoka. O Elkana ganga o Yerobeam aingohaka o Elihu aidanongo. Unanga iwohama o Tohu airiadodoto majaga oahali moi o Sufino.

²Elkana toünanga ngoihekata yahinoto, ongo Hana de ongo Penina. O ngo Penina de amingohaka, mä ongo Hana koiwa.

³O taongo ihi geto-getongo o Elkana woiki o Rama de waika laʼ wopuji o Silo mabereaka de wohihuba o huhuba ma Jouika Duru woko Kuaha. Yo dadi o imam o Silo mabereraka enagënanga o Hofni de o Pinehas, o Eli aingoha-ngohaka.

⁴Mahi geto-getongo nako o Elkana wohihuba aihuhuba, ongo Penina de mata-mata amingohaka moi-moi wahidöaka ohidoku moi ohuhuba ohiode maakeme gënanga.

⁵Mä ongo Hana womihidöaka o hidoku moi dika hababu ma Jou womihidöakua ongohaka munangika. Ngaroka hoko gënanga o Elkana duru womihininga ongo Hana.

⁶Ongo Penina salalu mahiri amihininga de momihikauku ongo Hanaika, ngomiufa gënanga, karana ma Jou womihidöakua o ngohaka munangika.

⁷O hali gënanga idadi otaongo ihigeto-getongo; nako önanga yoiki ma Jou Ai Tauika, ongo Penina salalu mahiri ongo Hana amihininga. Ma moi-ma moi ongo Hana moari de moluku mol̄omo karana munanga momi hikauku.

⁸Daha mahigeto-getongo o Elkana, ami rokata, womi leha, ”Yadodoa ngona noari Hana? Yadodoa ngona noluku nol̄omo de hoko genangika dika anihininga ihuha? Koigoungua ngohi iholoi tobaraguna ngonaika ngaro de o ngohaka o nauru yangimoi?”

⁹O wange moiuku önanga yol̄omo iböto ma Jou Ai Tauoka o Silo mabereraka, ongo Hana moma oko o meja yo ö ol̄o-ol̄omoka. O öraha gënanga ma imam Eliö naga ma Joum ai Tauoka, magogiria wogogeruku aikuruhioka o ngorona madatekoka. O ngo Hana moma niata ma Jouika de duru amihininga ihuha ikali moari hinga dakö imihö howo-howo.

¹¹ Ipaha ongo Hana mohi demo o jaji, mato, ”Jou Duru noko Kuaha, nohitailako nohidodiai ngonigilaongo nënanga! Nolega tongohi ahihuha. Nohihininga ngohi de uha nohi wohanga ngohi! Nako Ngona nohihi döaka ngohino ongohaka onauru womatengo, ngohi tojaji aha tihidöaka ünanga Ngonaika hiadono aiwowango mabaha. Ngohi tojajiö aitadauru ahatatobikua.”

¹²Duru koha dekana ongo Hana moma niata de o Eli wo lega-lega ami uru ongo heka gënanga.

¹³Ongo Hana moma niata amihininga magoronaka, hoʼduga-duga ami urumakai ikelu-kelu, mä ami ilingi woihenua. Hababu gënanga o Eli watobote munanga imidaluku.

¹⁴Daha o Eliö wotemo munangika, ”Kiaka hamake nenangoka ngona ini daluku! Ibötohi nokeroli o anggur!”

¹⁵Mä ongo Hana mo haluhu, ”Ngohi ihidalukua, Bapa, ngohi hakali-kali tokerua o angguru! Ngohi ahinganono itoaka, deʼ magogiria toma niata tohi ade-ade hagala ahihangihara ma Jouika.

¹⁶Uha ngohi nënanga nohipulono ongoheka o huhutu taninïki. Ngohi tomaniata hokonënanga karana tongohi ahininga duru ihuha.”

¹⁷Daha o Eli wato, ”Nako hoko gënanga nolio de anihalamatoka. Tanu o Israeloka manga Jou Madutu watarima anigogahoko.”

¹⁸Ongo Hana mohaluhu, ”Tanu ngohi tamake obarakati Bapa.” Ipaha munanga moiki, daha mol̄omo; deʼ munanga ami hininga ihuhaoka uaoli.

¹⁹Yarehino mawange o Elkana de aitau madol̄a yomomiki yo ngoru-ngorumu, de yopuji iböto ma Jouika, önanga yolio o Ramaika. O Elkana ima roëhe moi de ongo Hana, ngoi hekata gënanga de ma Jou watarima ongo Hana aminiata.

²⁰Ongo heka gënanga ongohaka mohiao de mohi dadi o ngohaka o nauru. Munanga mihi romanga o Samuel, mato, ”Ngohi tigahokoka ma Jouino.”

²¹Maöraha yadonoka o Elkana de aitau madol̄a yoikoli o Silo mabereraika hupaya ihi huba manga huhuba o taongo ihigetongo ma Jouika. Mahomoa de gënanga o Elkana wojajioka mangale wohihuba o huhuba wodö dinga-dingakoka.

²²Ma moi nënanga ongo Hana monïkua. Mitemo amirokatika, ”Damä o huhu tihi pidiloka, ahangohi tingotaka o Samuel ma Jou ai Tauika de ünanga ahawogogere dokengoka hiädono aingango mabaha.”

²³O Elkana wohaluhu, ”Kayaoa, nadiai okia ngona napulono yaoa; nogogogere o tauoka hiädono yadono maöraha ngona nihipidili o huhu tongone nanga ngohaka. De tanu ma Jou wadiai ani jaji idadi inyata.” Ho, o ngo Hana mogogogere otauoka hiädono yadono maöraha amingohaka mihipidili o huhu.

²⁴O Samuel mihipidili ohuhu iböto, ngoi ayo mingotaka ünanga ma Jou Ai Tauika o Silo mabereraka. O öraha gënanga ünanga duru kawo etekohi. O ngo Hana moao oli o hapi manauru o dutu moi ma umuru o taongo hange, o gandum o kilo ngimoi, de moi o kadu-kadu madol̄a o angguru ioma-omanga.

²⁵O hapi gënanga yatoaka, daha o Samuel iwingotaka o Eli ika.

²⁶Ongo Hana mitemo o Eli ika, ”Nohihi apongo, Bapa. Bapa kano hihiningahi Bapa ngohino? Ngohi mangoheke mamoi iböto Bapa nohi make toma oko nenangoka, magogiria toma niata ma Jouika.

²⁷O ngohaka neunanga ngohi togaho-gahoko ma Jouino. Ahiniata wa tarimaka,

²⁸de karana gënanga o ngohaka nënanga tihilapahi mangale wodadi toma Jou hiädono aiwowango mabaha.” Ipaha gënanga önanga yopuji ma Jouika.