Read Tobelo O SAMUEL MADODIHIRAKA 10 Bible Online

O SAMUEL MADODIHIRAKA 10 - Tobelo bible

O SAMUEL MADODIHIRAKA 10

¹Ipaha o Samuel wal̄e o boto madol̄a o zaitun maminya, daha o minya gënanga wihituagi o Saul ai häekuku, deʼ wiame o Saul deʼ wato, ”Ma Jou woni tedeoka mangale nodadi Ai umati o Israeloka manga koano. Ngona aha näpareta Ai umati deʼ nagoana önanga manga haturu-haturuino. Nenanga manonako ngonaika ma Jou woni irikoka ngona nodadi o koano mangale Ai umati.

²Ngona nohi mal̄a ngohi ipaha o wange nënanga, ngona aha nimakamake deʼ o nauru yahinoto itigioka o ngo Rahel ami jere o Zelsahoka o Benyamin ai dairaoka. Onanga aha yotemo ngonaika, hoko nënanga: Hagala o keledai nolö lingi-lingiri gënanga yamakeoka. O öraha nënanga ani ama wohawaterokaua mangale hagala o aiwane gënanga, mä hoko genangika woleha o kia kiani wadiai hupaya woni make ngona.”

³O Samuel wotemoli, ”Genangika ngona notagi gila-gila hiädono o gota mautuika o puji mangï o Taboroka. Dokengoka ngona aha nimakamake deʼ o nyawa o nauru yaruange manga gogiria yameta o Betelika mangale ihi huba o huhuba ma Jouika. Womatengo waduhu-duhu o kabingi mangohaka hange, wotengoli waoino o roti o gahumu hange, deʼ womatengoli waoino o kadu-kadu o aiwani makai madol̄a o angguru.

⁴Onanga aha ihi döaka manga tabea ngonaika deʼ ngona aha inihidöaka o roti o gahumu hinoto kokiani ngona natarima.

⁵Iböto gënanga ngona kiani noiki ma Jou Madutu Ai doporonika o Gibeaka, o Filistinoka manga tau mangïoka. O ngoranoko yowö woha-wohama o kotaika, ngona aha nimakataga deʼ o nabi o duduono moi youti o huhuba madoporonoka deʼ yauku. Onanga yoselo-selo, deʼ ima pöa-pöaka, o damunu, de o hitar, o sulingi deʼ o kecapi.

⁶O öraha genangoli ngona aha ini kuaha ma Jou Ai Womaha deʼ ngona aha na nïki manga selo deʼ toönanga manga böaka gënanga, daha ngona inihidöaka o biaha mahungi hiädono nodadi o nyawa mahomoa.

⁷Nako mata-mata gënanga idadi, nadiai dika namao yaoa, karana ma Jou Madutu woni tomoteke.

⁸Iböto gënanga ngona kiani noiki o Gilgalika deʼ notamä dokengoka o wange tumidi. Damä ngohi toboa mangale tohi huba o huhuba ituhu-tuhuku deʼ o dame mahuhuba, ikali tonihi ngahu ngonaika o kia kiani ngona nadiai.”

⁹De majapatioka o Saul wimal̄a o Samuel, o Saul watarima o biaha mahungi ma Jou Madutuino. De hagala ohali o Samuel wo hi ngahu-ngahu unangikaö idadi o wange genangö.

¹⁰Maöraha o Saul deʼ wilö leleani ima hiädono o Gibeaika, önanga imakamake deʼ o nabi o duduono moi. O öraha gënangö o Saul iwi kuaha ma Jou Madutu Ai Womaha, deʼ ünanga wanïki toönanga manga selo de o nabi manga boäka gënanga.

¹¹Hagala o nyawa iwi nako-nako mahiraino, yamake ai kalakuanga gënanga, daha ima keleha moi de moika, ”O kia idadioka deʼ o Kish aingohaka gënanga? Boteka o Saulö wodadi o nabi?”

¹² Daha womatengo wogö gogere genangoka woleha, ”Sarakia deʼ o nabi-nabi ma homoa gënanga — i moteke ngini o naguna toönanga manga ama?” Genangala matiti madodihiraka o demo ma ade nënanga, ”Boteka o Saulö wodadi o nabi?”

¹³O Saul woselo-selo deʼ wopöa-pöaka ibotino, ünanga woiki o huba mangï ika o doporono ma l̄oku oka.

¹⁴O Saul ai pepe wimake ünanga deʼ wilö leleani, daha wo leha onangika, ”Ngini o kiaka deʼ niaino?” o Saul wohaluhu, ”Mia lingiri o keledai ihihihangoka gënanga, deʼ maöraha ngomi mia makeua, ngomi mi oiki miwi ädono o Samuel.”

¹⁵”De okia wini temo nginika?” ai pepe woleha.

¹⁶O Saul wohaluhu, ”Unanga womihi ngahu hagala o aiwani gënanga imakeoka.” Mä o Saul wo ade-adeua ai pepeika, o Samuel witedeoka ünanga wodadi o koano.

¹⁷O Samuel wä ahoko o Israeloka ma kawaha hupaya ima toomu o Mizpaoka,

¹⁸deʼünanga wätemo onangika, ”Nenanga wotö temo-temoka ma Jou, o Israeloka manga Jou Madutu, ’Ngohi tini aoka ngini nihupu o Mesirino deʼ tini hilapahioka ngini o Mesir manyawa manga kuahaino deʼ hagala o hoana mahomoa ini tö tuku-tuku ngini.

¹⁹Ngohi tinihi pidiloka ngini o hangiharaino deʼ nia tago-tagongo, maöraha nënanga ngini nihitila Ngohi, nia Jou Madutu, karana ngini nigahoko hupaya Ngohi titumutu wotengo o koano nginika. Aa, kayaoa nima toomu Ahi himangoka, nia Jou, imamoteke nia hoana deʼ nia ahali.’ ”

²⁰Daha o Samuel wähuloko mata-mata yotagi manga himangika deʼ o Benyamin aihöana yakorona o ngongiriki.

²¹Maöraha hagala manga tau manyawa o Benyamin aihöana ma goronaka gënanga yähuloko yoiki manga himangika, daha o Matri ai tau madol̄a yakorono o ngongiriki. Ma baha ai tau manyawa magoronaka manau-nauru yoiki mahimangika, deʼ o Saul o Kish ai mgohaka iwi daene o ngongiriki. Daha önanga iwi lingiri o Saul, mä ünanga koiwiwa.

²²Hababu gënanga hagala o nyawa iwi leha ma Jouika, ”Ya Jou, boteka o nyawa gënanga nagaka nenangoka?” Ma Jou wohaluhu, ”O Saul woma ngiuinika o kia honanga ma pakakaha maporetoka.”

²³Daha deʼ majapatioka önanga iwi ngoho o Saul genangino, deʼ iwiao o kawaha manga hidogoronaika. Daha o Saul woma okoino toönanga manga hidogoronaka deʼ ünanga iholoi wo kurutil̄e; o nyawa mahomoa duga-duga hiädono ai belakaino.

²⁴Ipaha o Samuel watemo o kawahaika, ”Ne unanga manyawa ma Jou wi iri-irikoka, koiwa homa ketero tongone nanga hidogoronaka mata-mata.” O hoana mata-mata gënanga ima ulili, ”Nowango koano!”

²⁵Ipaha o Samuel wahi tararono o hoanika gënanga mangale o koano mahaku deʼ mamanarama, deʼ yatulihi o buku magoronaka deʼ yagogono o ngï itebi-tebini magoronaka. I böto gënanga o Samuel wähuloko o hoana mata-mata gënanga yolio manga tauika moi-moi.

²⁶O Saulö wolio ai tauika o Gibea mabereraika, ima kinïki o nyawa yamuruono naga yonau-nauru deʼ yobobarani deʼ wagögarakioka ma Jou manga hininga.

²⁷Mä o nyawa madorou yamuruono naga yotemo, ”Kiaka yakunu o nyawa nënanga aha wobaraguna mangale ngone?” Onanga iwi hikauku o Saul deʼ iwihidöakua o ngongike unangika. Mä ünanga womadiai hokä wohi orikua.