Read Tobelo O SAMUEL MADODIHIRAKA 11 Bible Online

O SAMUEL MADODIHIRAKA 11 - Tobelo bible

O SAMUEL MADODIHIRAKA 11

¹Ipaha o Nahas, o Amon manga koano, watoomu aitentara daha ihi giloliti o Yabes makota Gileat madairaoka. O Yabes manyawa ihihimanga manga gogahoko nënanga o Nahasika, ”Nodiai o jaji dede ngomi, done ngomi aha minihi gihene ngonaika.”

²O Nahas wohaluhu, ”De madodagi nënanga ngohi tomau todiai o jaji, ’Nia lako maniraka moi-moi aha tatubalenge hokä o hikauku o Israelika mata-mata!ʼ ”

³Ipaha o Yabes makota matutuda-tutuda yohaluhu, ”Ngomi migahoko öraha o wange tumidi madekana, hupaya ngomi iyakunu mia hidingito mia huhuloko o Israelika matonaka ingudumu. Nako moiua yomau imi riwo ngomi, done ngomi aha mimaike ngonaika.”

⁴Hoko gënanga hagala o huhuloko gënanga ima hiädono o Gibeaika, o Saul ai gogere mangï. Maöraha önanga ihi ädono oabari gënanga, o kawaha yoari karana manga nganono itoaka.

⁵O öraha gënanga o Saul daha wolio ai dumuleino deʼ wao ai hapi. Unangö woleha, ”Naga o kia? Yadodoa o nyawa mata-mata yoari?” Daha iwihi ngahu unangika o abari o huhuloko yoö ao-ao o Yabesino gënanga.

⁶Woihene gënanga, o Saul iwi kuaha ma Jou Madutu Ai Womaha.

⁷De duru wongamo, ünanga wal̄e o dutu hinoto o hapi daha walui-luiti idadi maluiti koha ngoë. Ipaha walui-luiti gënanga wohi dingoto o Israelma tonaka mata-mataika de wopareta hoko nënanga, ”Onagona yoikua yoparangi yanïki o Saul de o Samuel, hagala ai hapi aha talui-luiti hoko nënangoli!” O Isrel manyawa yohawana okia ma Jou yakunu wadiai, daha mata-mata o nyawa, koiwala yoikua ima hidiai yoiki ima kinïki yoiki yoparangi.

⁸Onanga yätoomu deʼ yaetongo o Bezekoka: Naga o Israeloka manyawa yaribuhu o ratuhu hange deʼ o Yehuda manyawa ya ribuhu moruange.

⁹Iböto gënanga yahi ngahu Yabesino mahuhulokika hoko nënanga, ”Nia hetongo o Yabes ma nyawaika, yarehe o ngorumino o wange ikorona uahi, önanga aha yamake o roriwo.” Maöraha o Yabes manyawa yatarima o behehongo gënanga, önanga duru yosanangi.

¹⁰Onanga yato o Nahasika, ”Yarehe ngomi aha mimaike deʼ yakunu ani hininga mahuka nomidiai.”

¹¹Yarehino, o ngoru-ngorumino, o Saul ainyawa waregu idadi o duduono hange. De maöraha ibatingi önanga yongohama o Amon manyawa manga tau mahi dogoronaika gënanga daha yäparangi önanga. O wange ikorona uahi, o Saul aitentara yaho hihangoka manga haturu. O Amon manyawa ya aku-akunu yootana, hohahi kokabarihi hiädono koiwa naga o nyawa yahinoto yakunu yoara ima nïki.

¹²Ipaha o Israel manyawa iwi leha o Samuelika, ”O nyawa kiaka kangano yobarani yotemo o Saul ipatutua wodadi tongone nanga koano? Kokiani Bapa nahi lapahi ngomino, hupaya ngomi mia toma.”

¹³Mä o Saul wato, ”Kanima tengö yakunua ini toma o wange nënanga ma Jou wahihalamatoka o Israel manyawa.”

¹⁴Daha o Samuel watemo önangika, ”Niaino ngone mata-mata hoiki o Gilgalika deʼ hitede o Saul hokä tongone nanga koano.”

¹⁵Hoko gënanga önanga mata-mata yoiki o Gilgalika, deʼ o puji mangï oka gënanga o Saul iwi tede hokä o koano. Onanga ihi huba o dame mahuhuba, deʼ o Saul ima kinïki o Israel manga hoana ingodumu ihi mulia idö dadadi gënanga.