Read Tobelo O SAMUEL MADODIHIRAKA 12 Bible Online

O SAMUEL MADODIHIRAKA 12 - Tobelo bible

O SAMUEL MADODIHIRAKA 12

¹Daha o Samuel wätemo o Israel manyawaika mata-mata, ”Ngohi taganapuoka hagala nia gogahoko deʼ tigoraka o koano womatengo nginika.

²Mulaenge o öraha nënanga ünanga aha wini tuda ngini. Nio lega, ngohi nënanga ihi timonoka deʼ ihi dudutuoka. Ngohi duru koha dekanoka tini tuda ngini — maöraha mulaenge kato ma gö ikahi hiädono öraha nënanga. Ma nyonyata enagënanga ahi ngoha-ngohaka mayo koki lago-lagomoka.

³O öraha nënanga, ngohi toma okoino tingini nia himangoka! Nako ngohi todiaioka o howono, nihi kalaki ngohi ma Jou Ai himangoka deʼ ma koano wiö iri-irikoka ai himangoka. Mamoi iböto ngohi tal̄e o nyawa mahomoa manga hapi ekola manga keledai? Mamoi iböto ngohi tini tipu ekola tini tuku ekola tatarima o tiwi o uru mabokumu? Nia hetongo hupaya o kia dika ta l̄e-l̄eoka yakunu tohigilio.”

⁴Hagala o nyawa gënanga yohaluhu, ”Kowali, komaiwahi Bapa nomi tipu ekola nomi tuku ngomi; komaiwahi Bapa nal̄e onagona ö toönanga manga kia naga.”

⁵Daha o Samuel wotemo, ”O wange nënanga ma Jou deʼma koano wi iri-irikoka idadi o hakihi inyata ngohi tahowonua kama huhutuluö ma.” ”Itiai, ma Jou wodadi tongone nanga hakihi,” önanga yo haluhu.

⁶ Daha o Samuel wotemoli, ”Ma Jou wä iriki o Musa deʼo Harun, deʼ yä ao nia ete deʼ nia tohora yohupu o Mesirino.

⁷O öraha nënanga, wahiohi nioiki. Ngohi aha tini kalaki ngini ma Jou Ai himangoka. Niohininga hagala ma Jou Ai hininga mamura wohidö dumu-dumutoka nginika deʼ nia ete deʼ nia tohoraika.

⁸Maöraha o Yakub deʼ ai tau madol̄a yaika o Mesirika, deʼ o Mesir manyawa yatuku önanga, nia ete deʼ nia tohora yogahoko o roriwo ma Jouika, daha wähuloko o Musa deʼ o Harun. O nyawa yahinoto gënanga ya ao nia ete deʼ nia tohora yohupu o Mesirino deʼ yariwo önanga yögogere o bereraka nënanga.

⁹ Mä ipaha önanga iwi wohanga ma Jou, toönanga manga Jou Madutu, hababu gënanga Unanga wamal̄aika önanga waparangi deʼ wahohihanga o Sisera, o Hazar manga tentara manga kapita, deʼ o Filistin manyawa ikali ma koano Moab.

¹⁰ Ipaha önanga ima niata ma Jouika deʼ ima ngaku toönanga manga baradoha; önanga yato, ’Ngomi mi baradohaka karana Ngonaka deʼ mima idulu, ya Jou, deʼ mia huba o gomanga o Baal deʼ o Asytoret madulada. Maöraha nënanga, nomihi halamatoka ngomi, tongomi mia hauturuino, done ngomi aha mima higilaongo Ngonaika!ʼ

¹¹ Ipaha ma Jou wihuloko o Gideon, ipaha o Barak, iböto gënanga o Yefta, deʼ mabobahaka ngohi. Ngomi moi-moi minihi pidiloka ngini nia haturuino, hiädono ngini yakunu niwango deʼ irirïdi.

¹² Maöraha ngini nia make o Nahas o Amon manga koano womau wini parangi ngini, ngini niwi tila ma Jou hokä nia koano deʼ nitemo ngohino, ’Ngomi mio igo o koano womatengo womi pareta ngomi.’ ”

¹³”O öraha nënanga, niwi lega, ünanga nënanga o koano ngini niwi iri-irikoka gënanga. Ngini nigahokoka, deʼ ma Jou winihi döakoka nginika.

¹⁴Niutumu ngini, nako ngini niwi horomati ma Jou, deʼ nima higilaongo Unangika, ikali nihi gihene deʼ nihi ngounu Ai pareta, o kiali nako ngini deʼ nia koano gënanga kahirahi nisetia nia Jou Madutuika.

¹⁵Iidulu yaino, nako ngini niwihi gihenua ma Jou, koaholi nia lawani Ai pareta, maraioka ngini deʼ nia koano ma Jou aha winï lawani.

¹⁶O öraha nënanga, ni ihenoli! Nio hohininga ihö hera-heranga ma amoko ma Jou aha wadiai nia lako mahimangoka.

¹⁷Ngohi aha tomahi böaka ma Jouika, deʼ ngaroka öraha nënanga maöraha ihiwara, ma Jou aha wohi guti o dotoreke deʼ o awana hokä mabobaluhu mangale ahi niata. O öraha gënanga, ngini aha nimamao hoko kia ma amoko nia baradoha ma Jouika karana nigahokoka o koano womatengo.”

¹⁸Daha o Samuel womaniata, deʼ o wange gënanga dika ma Jou wohiguti o dotoreke deʼ o awana. O hoana yongodumu gënanga i dadi iwi modongo ma Jouika deʼ o Samuelika.

¹⁹Daha önanga yotemo o Samuelika, ”Nomi riwo, Bapa, nomi niata mangale ngomi nënanga ani Jou Madutuika, hupaya ngomi uha mihonenge. O öraha nënanga ngomi mia mao mahomoa tongomi mia baradoha mahira, ngomi mibaradohaoli karana migahoko womatengo o koano.”

²⁰O Samuelö wohaluhu, ”Uha nihawana, ngaroka ngini nia diaioka itö totorou gënanga, uha ma Jouoka deʼ nima idulu, mä kahirahi nimahi gilaongo Unangika deʼ nia hininga magahu-gahumu.

²¹Uha nia nïki hagala o gomanga yakunua inï riwo deʼ ini hihalamati ngini, karana deʼ madiai enanga ko iwa.

²²Ma Jou wokobotoka, Unanga aha wini mal̄aua ngini karana Unanga waputuhoka mangale ngini nidadi Ai umati mahirete.

²³Ima korona ahi diri, tanu uha hiädono ngohi tobaradoha ma Jouika karana tini niatua ngini. I idulu yaino ngohiö aha hoko genangika tini dotoko nginika hagala o hali ma oa-oa deʼ ma diai.

²⁴Niwi horomati ma Jou deʼ nimahi gilaongo Unangika deʼ nia setia deʼ nia hininga magahu-gahumu. Niohininga hagala o manarama ma ago-agomo wadö diaioka nginika.

²⁵Mä nako ngini kahoko genangika dika nidiai o baradoha, done ngini deʼ nia koano aha nibinaha.”