Read Tobelo O SAMUEL MADODIHIRAKA 13 Bible Online

O SAMUEL MADODIHIRAKA 13 - Tobelo bible

O SAMUEL MADODIHIRAKA 13

¹O wange moiuku, maöraha o Saul wodadioka o koano,

²ünanga wä iriki o Israeloka manyawa yaribuhu hange; manga hidogoronaino yaribuhu hinoto yogogere dede ünanga o Mikhmasoka deʼ o Betel madaira deʼ ma l̄oku mabuturungoka, mä yaribuhu moi ohi yoiki deʼ o Yonatan aingohaka o nauru o Gibeaika o Benyamin aihöana madairaoka. Maboloi deʼ o kawaha gënanga yahi gumal̄a yolio manga tauika moi-moi.

³Ipaha o Yonatan witoma o Filistinoka manga kapita o Gebaoka, deʼ o Filistin manyawa yoihene mangale o hali gënanga. Daha o Saul wä huloko yawuwu o trompet o berera mata-mataika mangale ya ahoko o Ibrani manyawa hupaya yoparangi.

⁴O Israel ma nyawaika mata-mata yahingahu o Saul witomaoka o Filistinoka manga kapita gënanga deö Filistinoka ma nyawa duru yädohata o Israel manyawa. Hababu gënanga o kawaha yoigo yamoteke o gogahoko mangale ima kodogo deʼ o Saul o Gilgaloka.

⁵O öraha gënanga o Filistin manyawaö imatoumu inoka mangale yaparangi o Israel manyawa; toönanga manga kureta ihi poparangi o ribuhu moruange o nyawa o kudauku yobare-barene yaribuhu butanga, deʼ o tentara kai ma daene manga ngoë o dowongi o ngöto madatekoka. Onanga ima tau o Mikhmasoka o wange mahiwaroko deʼ o Betawen.

⁶Ipaha önanga deʼ majapatioka yaparangi hoko gënanga ma giria o Israel ma nyawaika, hiädono o Israel manyawa naga yogogere o bahaya magoronaka. Utu o Israel manyawa ima ngiunu o aruku magoronaka deʼ o l̄oku mapidahoka, ekola o helewo ma donga-madonga magoronaika, ekola o humu magoronauku deʼ o tonaka mapidahuku,

⁷nagaö yatobongo o Yordan ma Ngairi deʼ yowohama o Gad deʼ o Gilead madairaika. O Saul kao Gilgal okahi, deʼ o kawaha iwinö ninïki yohawana yohaharoka.

⁸ O Saul widamä o Samuel o wange tumidi madekana, ima moteke ai behehongo o Samuel unangika, mä o Samuel kawo mahi adonuahi dika o Gilgaloka, enahioko o Saul ai kawaha mulaenge iwi mal̄a.

⁹Hababu gënanga ünanga wätemo onangika, ”Niaoino o huhuba ituhu-tuhuku deʼ o dame mahuhuba gënanga.”

¹⁰Mä daha ibötino ünanga wadiai, o Samuel woböa. O Saul wibuhuku ünanga womau witabea,

¹¹mä o Samuel wileha, ”Okia Jou Koano nadiaioka?” O Saul wohaluhu, ”Ngohi tämake o kawaha mulaenge ihi mal̄a ngohi, enahioko Bapa noböaua maöraha Bapa nohi tä tantuoka. Ikali, o Filistin manyawa imatoomu inoka o Mikhmasoka.

¹²Daha toma tibanga, uha-uha o Filistin manga tentara kabotino okahi ihi parangi nenangoka o Gilgaloka, ena hioko ngohi togahokuahi ma Jou Ai dora deʼ ai hayanga. Hababu gënanga ngohi ta l̄e o putuhu mangale tohi huba o huhuba gënanga.”

¹³Woihene gënanga o Samuel wïtemo o Saulika, ”Jou Koano ani manarama gënanga duru ibodo. Hohiade Jou Koano nohi ngounu ma Jou Madutu Ai pareta Jou Koanoika, maraioka ma Jou aha wonihi tatapu Jou Koano deʼ Jou Koano ani difauku yodadi o koano o Israelokaika mangale kahi ädo-ädonika.

¹⁴ maöraha nënanga Jou Koano ani pareta aha itedekanokaua. Karana Jou koano nanïkua ma Jou Ai pareta, done ma Jou wi irikoka o nyawa mahomoa wiö igo-igo hupaya wigoraka wodadi ai umati manga koano.”

¹⁵Ipaha o Samuel wamal̄a o Gilgal deʼai dodagi wohi gila-gila o Gibeaika o Benyamin madairaoka. O öraha mahuhutulu gënanga o Saul wä tailako aitentara manga duduono manga ngoë done yaratuhu butanga.

¹⁶Hoko gënanga o Saul deʼ aingohaka o Yonatan, deʼ toönanga manga nyawa ima tau o Gibeaoka o Benyamin madairaka; hode o Filistinoka manyawa ima tau o Mikhmasoka.

¹⁷O öraha genangoli o Filistin manga duduono hange yoö ora-ora o Filistin manga tauoka deʼ ima jobo mangale yoora; o duduono moioka, yoiki manga meta o Ofraika o Syual madairaka,

¹⁸o duduono mahinotoka yameta o Bet-Horon, deʼ o duduono moioli yameta mahiri batingi yohimangika o Zeboim ma Waika deʼ o tonaka makokakaha.

¹⁹O Israel manyawa yongodumu moiua o behi yotü tutuku, karana o Filistin manyawa yahigumal̄aua o Ibrani manyawa yodiai o dia deʼ o kuama.

²⁰Ho, o Israel manyawa kiani yoiki o Filistin manyawaika nako yomau ima gihoro manga pajeko madoto, manga pasolo, manga bahuku deʼ manga gugutuku;

²¹ma hewa enagënanga o tiwi mai teteke o keping moi mangale ima gihoro o bahuku deʼ ihi tiai manga hapi mago gohara, deʼ o tiwi mai teteke o keping hinoto mangale ima gihoro manga pajeko madoto ekola manga pasolo.

²²Hababu gënanga, mawange ima teke parangi o Mikhmasoka gënanga, moiua o Israel ma kawahaino de manga diaka ekola de manga kuamoka, sawaliua o Saul deʼ aingohaka o Yonatan.

²³O Filistin manyawa ihi gogere manga gogoana matau moi mangale yodatoko o Mikhmas mal̄oku moi mahelewo mahoanoka.