Read Tobelo O SAMUEL MADODIHIRAKA 14 Bible Online

O SAMUEL MADODIHIRAKA 14 - Tobelo bible

O SAMUEL MADODIHIRAKA 14

¹O öraha moiuku o Yonatan witemo o goduruika waö ao-ao ai daë, ”Ika, ngone hoiki o Filistin manga gogoana matauika dokena mahonongaka!” Mä ünanga womahi demoua ai amaika.

²O öraha gënanga o Saul naga magogiria o delima mautu ma timi uku o Migronoka, ikurutikaua deʼ o Gibea. O kawaha iwinö ninïki done yaratuhu butanga manga ngoë.

³(Ma imam woö ao-ao o efod enagënanga o Ahiya o Ahitub ai ngohaka, enagënanga o Ikaboa ai danongo o Pinehas aingohaka, deʼ o Pinehas o Eli aingohaka, ma Jou Ai imam o Siloka.) O kawahaö ihi örikua o Yonatan woikoka gënangika.

⁴Mangale wadono o Filistin manyawa yogoa-goana manga tau gënanga, o Yonatan kiani wanonu ol̄oku marihoana moi o helewo maroreredenge hinoto mabilatuoka, moi-moi ihi romanga o Bozes deʼ o Sene.

⁵O helewo o nuha o koremieuku idaduoka yohimangika o Mikhmas deʼ o korehara il̄e idaduoka yohimangika o Geba.

⁶Daha o Yonatan wïtemo o goduruika gënanga, ”Naino ngone hoiki o Filistin manyawa o kafiroka gënanga manga gogoana matauika. Boteka ma Jou womau wonariwo ngone. Hababu ma Jou wakunu wonahi döaka o utumu yaoa deʼ o nyawa howoë-woë yaoa deʼ o nyawa hohutu-hutulu.”

⁷O goduru gënanga wohaluhu, ”Okia dika Tuanga nomau nadiai, ngohi torimoi.”

⁸”Kayaoa,” o Yonatan wato. ”Maöraha hotobongo, ngone aha homahi matoko nanga diri o Filistin manyawaika gënanga.

⁹Nako önanga ina huloko ngone homa togumu deʼ hotamä hiädono önanga yoboa ngoneino, done ngone aha kahirahi hogogere genangoka dika deʼ ngarouha hotobongo.

¹⁰Mä nako önanga ina huloko haika onangika, ngone aha hoiki dokengika, karana gënanga manonako ma Jou wahi lapahioka önanga ngoneino.”

¹¹Maöraha önanga yahinoto imahi matoko manga diri o Filistin manyawaika yogoa-goana matauoka gënanga, o Filistin manyawa yotemo, ”Nia legahi, naga o Ibrani manyawa yohupu o pida-pidahino o ngï önanga ima ngiu-ngiunikaka!”

¹²Ipaha önanga iwi böaka o Yonatanika deʼ ai gilaongika, ”Nidoa nengil̄e hupaya ngomi minihi matoko okianaga moi nginika!” Daha o Yonatan wïtemo o goduruika gënanga, ”Nohi nïki ngohi, karana önanga ma Jou wahilapahioka o Israel okaika.”

¹³O Yonatan woma tahe waka il̄e deʼ o goduru gënanga winïkino. Maöraha o Yonatan womahi dobe, wä gohara o Filistin manyawa yakoki otaka, ai poretoko magogiria o goduru gënanga wä toma önanga.

¹⁴O parangi madodihiraka magoronaka gënanga, o Yonatan deʼo goduru gënanga yätoma o nyawa done yamonaoko madaira ma amokika o metere o ribuhu hinoto deʼ o ratuhu motoa.

¹⁵Idö dadadi gënanga o Filistin manyawa yoruaëuku manga tauoka deʼ o tonaka malua-luasoka. O Filistin makawaha mata-mata deʼ manga gogoana matau ikali o doomu-doomu yoö ora-ora ma idadi yohawana; o duniaö mai hahara deʼ idadi o gigoro kohagiria.

¹⁶O öraha gënanga o Saul aitentara yogö goa-goana o Gibeaka o Benyamin madairaka, yämake o Filistin manyawa ima popäta yakaika yakaino deʼ duru imahi orikokaua.

¹⁷Daha o Saul wätemo ai nyawaika, ”Niä etongo o tentara deʼ niä tailako onagona koya iwa.” Onanga yadiai o pareta gënanga daha ihi öriki o Yonatan deʼ o goduru wa ö ao-ao ai daë koya iwa.

¹⁸O Saul witemo ma imam Ahiaika, ”Naoino o Efod gënanga.” (O öraha gënanga o Ahia wao o Efod gënanga o Israel manyawa manga himangoka.)

¹⁹Maöraha o Saul wïtemo magogoria ma imamika gënanga, o gigoro iholoi idogo o Filistin manyawa manga tau magoronaka, hiädono o Saul wïtemo ma imamika gënanga, ”Ngone hakunokaua mangale hogahoko o hidumutu ma Jouino!”

²⁰Daha o Saul deʼ ainyawa kamamoi yoiki o parangi mangï ika. Genangoka önanga yämake o Filistin manyawa manga hidogoronaoka iruaëuku; önanga ima teke parangi deʼ imako toma.

²¹O Ibrani manyawa yogö gogere o Filistin manyawa manga dairaka, deʼ yanoni nïkoka deʼ toönanga manga tentara, ima idulu toönanga manga dihira daha imako dogo o Saul deʼ o Yonatan.

²²Ikali o Israel manyawa imangö ngiu-ngiunika o Efraim ma dö doporonoka, yoihene o Filistin yokoki piringanoka, ya nïki imahi dogo deʼ yaparangi o Filistin manyawa gënanga.

²³Onanga ima teke parangi o ngekomo magurutu hiädono ya tilakuru o Bet-Awen. Ma Jou wahihalamati o Israeloka o wange gënanga.

²⁴O wange gënanga o Israeloka manyawa yabole magoronaka karana yahahini, hababu o Saul wokobotoka hoko nënanga, ”Yakorona o lolai o nyawa o kia yaol̄omo o wange nënanga nako ahi hininga madohata tabalahi uahi ahi haturuika.” Karana gënanga o nyawa moiuaö yo l̄omo o wange gënanga.

²⁵Ipaha önanga mata-mata imahi ädono o hongana moioka deʼ yamake o ohungu magula duru koha ngoë,

²⁶mä moiuaö ya ol̄omo okianaga moi o ohungu magulaino gënanga, karana yohawana yadaëne o lolai o Saul wohi dö demo-demoka.

²⁷Mä o Yonatan wohi orikua ai ama wahi huhaka o kawahaika deʼ o lolai gënanga; hababu gënanga ai diki-diki woma gao-gaoino wohi doakil̄e, deʼ wohi topoko o ohungu magula ma iguto magoronaika, daha wa l̄e o ohungu magula gënanga deʼ wa ol̄omo. De majapati ünanga wamao ai roëhe yauwini deʼ idogo wokuata.

²⁸Ipaha womatengo o tentaraka witemo unangika, ”Ngomi mata-mata mikoki kuatokaua karana imi hahini. Mä ani ama Tuanga womihi huhaka ngomi deʼ o koboto, ’Yakorona o lolai o nyawa yol̄omo o wange nënanga.’ ”

²⁹O Yonatan wohaluhu, ”Igoungu ahi ama ai manarama gënanga ikiria okaholi tongone nanga hoanika! Nio lega, ahi roëhe o öraha nënanga iholoi yaoa o ohungu magula ta ol̄omo ipahaino.

³⁰Hohiade o wange nënanga o kawaha yahigumal̄a yol̄omo o inomo yaö ora-oraino maöraha yahohihanga manga haturu, maraioka iholoi yowoë o Filistin manyawa ngone yakunu hä toma!”

³¹O wange gënanga o Israel manyawa yahohihangoka o Filistin manyawa ima teke parangi o ngekomo magurutu ipahaino o Mikhmas deʼ yaino hiädono o Ayalonika. Mä iböto gënanga önanga hoko gënanga yäbole,

³²hiädono önanga ima teke jai-jai ya l̄e okia honanga ya ora-oraino yamö make-make manga haturuino; önanga ya l̄e o duba deʼ o hapi daha kamangïoka dika gënanga deʼ yatoaka, deʼ gila-gila yaol̄omo ma akeme kanagaohi deʼ ma awunoka.

³³ Daha ihi ngahu o Saulika hoko nënanga, ”Jou Koano, o kawaha yobaradohaka ma Jouika karana yaol̄omo o hiode ma akeme kadema awunoka.” ”Ngini nisetiaua!” o Saul wopöaka. ”O helewo moi ma pako-pako nia luluino nenangino.”

³⁴Ipaha wotemoli o nyawa yoao-aoika o abari gënanga, ”Ngini nima hikabarihi o kawaha manga hidogoronaika deʼ nia huloko yaoino manga hapi deʼ manga duba, hupaya hatoaka o helewo mal̄okuoka nënanga deʼ yaol̄omo nenangoka; deʼ hoko gënanga önanga ya ol̄omua o hiode ma akeme deʼ ma awunoka de yobaradoha oka uaoli ma Jouika.” O hutu gënanga dika o kawaha mata-mata yao manga aiwani yaora-oraino deʼ yatoaka genangoka.

³⁵Daha o Saul wohi goko o huba mangï ma Jouika; gënanga o huhuba mangï madodi hiraka wohigö goko-goko.

³⁶Ipaha o Saul wätemo ai nyawaika, ”Niaino ngone ha parangi o Filistin manyawa o hutu nënanga daha hä ora önanga hiädono o ngorumino deʼ hatoma önanga mata-mata.” Onanga yohaluhu, ”Kayaoa Jou Koano nadiai okia Jou Koano napulono ya oa.” Mä ma imam watemo, ”Niaino ngone hogahoko iholoi i hira o hidumutu ma Jou Madutino.”

³⁷Daha o Saul woleha ma Jou Madutuika, ”Kai yakunu ngohi taparangi o Filistin manyawa? Boteka önanga aha Nahi lapahi o Israeloka manga giama mahoatika?” Mä o wange ma Jou Madutu wi baluhua.

³⁸Hababu gënanga o Saul wätemo o kawaha manga tutuda-tutudaika, ”Niaino mata-mata nenangino deʼ nia tailako o baradoha okia hadiaioka o wange nënanga.

³⁹Ngohi tojaji deʼ ma Jou wowango-wango, wohi döakoka o utumu o Israelokaika, o nyawa yowango-wango aha yahukumu yohonenge, ngaroka ünanga ganga ahi ngohaka o Yonatan.” Mä moiuaö yobarani iwi baluhu.

⁴⁰Daha o Saul wätemo o Israel ma kawahaika mata-mata, ”Ngini mata-mata nima oko mahonongaka nënanga.” Onanga yohaluhu, ”Jou Koano nadiai dika okia Jou Koano napulono yaoa.”

⁴¹ Ipaha o Saul woma niata, ”Jou, o Israeloka manga Jou Madutu, yadodoa o wange nënanga ngona nohi baluhua ngohi? Jou, nohi baluhu ngohi itilakuru hagala o helewo madebi-debini nënanga. Nako o howono gënanga naga ngohioka ekola o Yonatanoka, nohi baluhu deʼ o Urim mahelewo, mä nako o howono gënanga naga ani umatoko o Israel, nohi baluhu deʼ o Tumim ma helewo.” Daha ma Jou wohaluhu watumutu o Yonatan deʼ o Saulika; deʼ hoko gënanga o kawaha ihi nyata o kawaha yahowonua.

⁴²Daha o Saul wotemo, ”Ya Jou, nohi tantu ngohi deʼ o Yonatan mia hidogoronaka.” Done o Yonatan ihi nyata wahowono.

⁴³Daha o Saul witemo o Yonatanika, ”Okia ngona nadiaioka?” O Yonatan wohaluhu, ”Ngohi taol̄omoka o ohungu magula ma huhutulu ta l̄e deʼ ahi diki-diki mabarene; ngohi toma sadia mangale tohonenge.”

⁴⁴O Saul witemo unangika, ”Tanu ma Jou Madutu wohi hukumu ngohi nako ngona Yonatan, toni hukumua nohonenge!”

⁴⁵Mä o kawaha yotemo o Saulika, ”Kokiani o Yonata iwi hukumu wohonenge? Ena hiioko ünanga wona gao o utumu maamoko nënanga? Kowali! Ngomi mijaji deʼ ma Jou wowango-wango, o Yonatan yakunua ihihanga ai tadauru o ngai moi ai häekoka. Karana deʼ ma Jou Ai roriwo, ünanga wamakeoka o utumu o wange nënanga.” Hoko gënanga o Yonatan o kawaha iwi hihalamati o hukumanga o honengino.

⁴⁶Iböto gënanga o Filistin manyawa yolio toönanga manga dairaika mahirete karana o Saul waginikokaua önanga.

⁴⁷O Saul wodadioka o Israel manga koano, ünanga woparangi okiaika honanga walawani hagala o Israeloka manga haturu, enagënanga o Moab manyawa, o Amon manyawa, deʼ o Edom manyawa, o Zoba maberera makokoano, deʼ o Filistin manyawa. Kiaka ö ünanga woparangi, salalu ünanga wamake o utumu.

⁴⁸Unanga woparangi deʼ ai barani deʼ wonauru deʼ wä hihangoka o Amalek manyawa, ikali wahilapahi o Israel manyawa yoö ora-ora manga kuahaino.

⁴⁹O Saul ai ngoha-ngohaka o nauru enagënanga o Yonatan, o Yiswi, deʼ Malkisua. Ngoi ora o riaka ami romanga o ngo Merab, deʼ mahinotoka ami romanga o ngo Mikhal.

⁵⁰Ngoi hekata ami romanga o ngo Ahinoam, o Ahimas ngoi ora; aitentara manga baluhu ganga o Abner o Ner aingohaka enagënanga o Saul ai pepe.

⁵¹O Kis o Saul ai ama, deʼ o Ner o Abner ai ama, ganga o Abiel ai ngoha-ngohaka.

⁵²Madekana o Saul wowango salalu woparangi deʼ duru koha giria walawani o Filistin manyawa. Hababu gënanga, nako o Saul wamake yopoputurungu ekola yobobarani, ünanga deʼ ma japati wahi dadi aitentara manyawa.