Read Tobelo O SAMUEL MADODIHIRAKA 15 Bible Online

O SAMUEL MADODIHIRAKA 15 - Tobelo bible

O SAMUEL MADODIHIRAKA 15

¹ O wange moiuku o Samuel wïtemo o Saulika, ”Ma Jou wohi huloko ngohi toni tede Jou Koano mangale nodadi Ai umati o Israeloka manga koano. Hababu gënanga, Jou Koano kokiani nohi gihene ma Jou Duru woko Kuaha Ai pareta.

² Unanga aha Wahukumu o Amalek manyawa, karana toönanga manga ete deʼ manga tohora yalawani o Israel manyawa maöraha o Israel manyawa o Mesir de yaino.

³Ho, noiki deʼ naparangi o Amalek manyawa deʼna wedere hagala toönanga manga kia honanga. Uha namal̄aika okianaga moiö; nä toma mata-mata o nau-nauru, o ngo heka, o ngoha-ngohaka deʼ o ngohaka magil̄au; o hapiö, o duba, o unta deʼ o keledai.”

⁴Daha o Saul wahidiai aitentara de wä etongo o Telaimoka; naga yaribuhu o ratuhu hinoto o tentara o Israelino deʼ ya ribuhu ngimoi o Yehudaino.

⁵Iböto gënanga o Saul woiki ima kinïki deʼai nyawa o Amalek manga kotaika deʼ yangiunika manga haturu o ngairi ma honengoka.

⁶Unangö wohi dingoto o behehongo o hohininga o Keni ma nyawaika wato, ”Nioiki deʼ niä mal̄a o Amalek manyawa, hupaya uha ngini tinihi dobinaha kamamoi dede önanga, hababu mahira nia ete deʼ nia tohora ihi dumutoka manga jako ima teke dodiawo o Israel manyawaika maöraha o Israel manyawa o Mesir deʼ yaino.” Daha o Keni manyawa genangoka deʼ ima jobo.

⁷I böto gënanga o Saul imateke parangi deʼ o Amalek ma nyawa, deʼ yä utumoka önanga o ngekomo magurutu o Hawila deʼ yaino hiädono o Syurika o Mesir o wange mahiwaroko.

⁸O Amalek manga kawaha deʼ manga tentara mata-mata o Saul wä tomaka. Mä o Agak o Amalek manyawa ma koano o Saul deʼ aitentara iwi tagoko deʼ iwi mal̄aika kai ngango, hoko genangö o hapi deʼ o duba duru ma oa-oa, o hapi mangohaka deʼ o duba ma ngohaka duru maboburere, deʼ hagala moi-moi irö roragane; duga-duga o aiwani ibö baragunaua deʼ irö roraganeua dika yabinaha.

¹⁰Daha ma Jou wïtemo o Samuelika,

¹¹”Ngohi toma toduba o Saul tigorakoka wodadi o koano, hababu ünanga ngohioka deʼ woma iduloka, deʼ wadiaiua Ahi pareta.” O Semuel aihininga ihuha de ohutu moi wahaiwati kie unanga woma todu ba Ma Jouika

¹²Yarehino mawange, o ngoru-ngorumino, o Samuel woma jobo womau ima make deʼ o Saul. Unangika iwihingahu o Saul woikoka o Karmel makotaika mangale wohi goko dokengoka o helewo o hohininga mangale ai diri, daha wogila-gila o Gilgalika.

¹³Maöraha o Samuel ima make deʼ o Saul, o Saul wïtemo unangika, ”Tanu ma Jou wonihi barakati Bapa! Ngohi tadiaioka ma Jou Ai pareta.”

¹⁴Mä o Samuel wïleha, ”Nako hoko gënanga, yadodoa to ihene o hapi ipöa-pöaka deʼ o duba ipöa-pöaka?”

¹⁵O Saul wohaluhu, ”O aiwani-o aiwani gënanga ngomi mia oraino o Amalek ma nyawaka. O duba deʼ o hapi duru ma oa-oa o kawaha ya l̄eoka mangale ihihuba hokä o huhuba Ama ani Jou Madutuika. Mä maboloi ngomi mia binahaoka kama moiuku.”

¹⁶Woihene gënanga o Samuel wato, ”Notamä mahuhutulohi ngohi aha tonihi ngahu okia ma Jou Madutu wotemoka ngohino kangano mahutu.” ”Nahetongo dika,” o Saul wato.

¹⁷O Samuel wato, ”Koigoungua Jou Koano no dadioka hupaya o Israeloka manga hoana matutuda, ngaroka Jou Koano napulono ani diri ibaragunaua? Jou Koano, ma Jou woni irikoka mangale nodadi o Israeloka manga koano,

¹⁸ikali ma Jou woni huloko Jou Koano näbinaha o Amalek manyawa yatotorou gënanga Jou Koano woni huloko näparangi nalawani önanga hiädono önanga namata-mataka.

¹⁹Yadodoa Jou Koano nohi ngounua ma Jou Ai pareta? Yadodoa Jou Koano nirame-rame nia l̄e o kia honanga iö ora-ora de hoko gënanga Jou Koano nadiai ma Jou womatoduba?”

²⁰O Saul wohaluhu, ”Ngohi tohi motekoka ma Jou Ai pareta, deʼ toiki toparangi ima moteke deʼ Ai huhuloko ngohino; o Agak o Amalek manga koano titagoko deʼ o Amalek manyawa mata-mata tä tomaka.

²¹Mä ahi nyawa yatomaua o aiwani mata-mata; önanga yairikoka o duba deʼ o hapi duru mäö oa-oa yaora-ora ma hasilino gënanga mangale ihihuba o Gilgaloka hokä o huhuba ani Jou Madutuika.”

²²Mä o Samuel wato, ”Kiaka ma Jou iholoi woigo, o momoteke ekola o huhuba ihihö huba-huba? O momoteke ma Jouika iholoi yaoa ngaro deʼ o huhuba ihihö huba-huba. O hingounu iholoi yaoa ngaroka deʼo duba mahaki.

²³Hababu yotomotekua ma Jouika kaima tero manga dorou yododiai o gumatere, deʼ manga hininga iedenge kai tero manga dorou hokä yahuba-huba o gomanga. Karana Jou Koano nalawanoka ma Jou Ai pareta, done ma Jouö wonihi goungokaua Jou Koano hokä o koano.”

²⁴Woihene gënanga o Saul woma ngaku o Samuelika wato, ”Igoungu ngohi tobaradohaka. Ngohi tatilakuru ma Jou Ai pareta deʼ tahaduliua anihi matoko Bapa. Ngohi tamodongo ahi nyawa daha tohimoteke toönanga manga gogahoko.

²⁵maöraha nënanga, ngohi togahoko Bapaika, nohi apongo ahi baradoha deʼ holio homa nïki dede ngohi o Gilgalika, hupaya ngohi yakunu tipuji ma Jouika.”

²⁶Mä o Samuel wohaluhu, ”Ngohi toluku tolio homa nïki dede ngona Jou Koano. Jou Koano nalawanoka ma Jou Ai pareta, deʼ öraha nënanga Unanga woni nakokaua Jou Koano hokä o Israeloka manga koano.”

²⁷Daha o Samuel woma idulu womau woma jobo, mä o Saul wi tumungu ünanga deʼ wasö ai juba, hiädono o juba gënanga ikakihi.

²⁸Daha o Samuel wïtemo unangika, ”O wange nënanga ma Jou wakakihoka o Israeloka mapareta ngonaino Jou Koano, deʼ wahi döaka o nyawa mahomoaika iholoi yaoa ngaro deʼ ngona Jou Koano.

²⁹Duru womo Mulia o Israeloka manga Jou Madutu woelukua deʼ wangaliua ai dibanga, karana Unanga o nyawaua.”

³⁰O Saul wohaluhu, ”Ngohi tobaradohaka. Mä Bapa nohi riwo, holio homa nïki dede ngohi hupaya ngohi takunu tipuji ma Jou ani Jou Madutuika. De hoko gënanga Bapa nohi horomati ngohi ahi hoana manga tutuda-tutuda manga himangoka deʼ o Israeloka yongodumu manga himangoka.”

³¹Daha wolio o Samuel ima nïki dede ünanga o Gilgalika, deʼ o Saul wipuji ma Jouika.

³²Ipaha o Samuel wä pareta, ”Niwiaoino nenangino ma koano Agag,” o Agag waika unangika, deʼ ai nganono ioma-omanga karana ünanga wapikiri, ”O bahaya o honenge iwi tilakuroka.”

³³Daha o Samuel wïtemo, ”Hokä ani oworo yadiaioka o ayo manga ngoë manga ngohaka yohihanga, hoko genangaoli ngoni ayo ami ngohaka ihihanga.” Daha o Samuel wïtetoro o Agag o huba mangï mahimangoka o Gilgaloka.

³⁴Ipaha gënanga o Samuel woiki o Ramaika, deʼ ma koano Saul wolio ai tauika o Gibeaoka.

³⁵Hiädono ai wowango mabaha, o Samuel koima makeokaua deʼ o Saul. Mä o Samuel ai hininga ihuha karana ma Jou woma toduba wï gorakoka o Saul wodadi o Israeloka manga koano.