Read Tobelo O SAMUEL MADODIHIRAKA 16 Bible Online

O SAMUEL MADODIHIRAKA 16 - Tobelo bible

O SAMUEL MADODIHIRAKA 16

¹O öraha muruono naga ipaha ma Jou wïtemo o Samuelika, ”Hoko kiahi madekana ngona ani hininga ihuha mangale o Saul? Koigoungua ünanga kotinako okaua hokä o Israeloka manga koano? O öraha nënanga, nal̄e o zaitun maminya de noiki o Betlehemika, womatengoika ai romanga o Isai, karana ai ngoha-ngohakino womatengo Tiirikoka wodadi o koano.”

²Mä o Samuel woleha, ”Sarakia ngohi kiani tadiai? Nako o hali gënanga o Saul woihene, maraioka wohi toma ngohi.” Ma Jou wohaluhu, ”Nao o hapi magö o dutu moi, deʼ natemo o kawahaika ngona naika dokengika mangale nohi huba o huhuba ma Jouika.

³Daha niahoko o Isai o huhuba madatorika gënanga. Damä aha tonihi ngahu okia kokiani nadiai. Manyawa Tonihi mato-matoko ngonaika, kiani nitede wodadi o koano.”

⁴O Samuel wadiai hokä ma Jou wotö temo-temoka. Maöraha ünanga womahiädono o Betlehemoka o kota matutuda-tutuda iwi tarima deʼ manga dodokana deʼ yoleha, ”Boteka Bapa naino nomilega nomigao o halamati?”

⁵O Samuel wohaluhu, ”Ia, itiai. Ngohi toböa mangale tohi huba o huhuba ma Jouika. Mangale gënanga nihi tebini nia diri hupaya yakunu nia nïki o huhuba madatoro gënanga.” O Isai deʼ aingoha-ngohakö yähuloko ihi tebini manga diri moi-moi, deʼ yä ahoko o huhuba madatorika gënanga.

⁶Maöraha önanga imatoomu inoka deʼ o Samuel wïmake o Eliab o Isai aingohaka, woma pikiri, ”Marai neünanga aha ma Jou aha wi iriki.”

⁷Mä ma Jou wïtemo o Samuelika, ”Uha ani hininga yatauru mangale ai rupa mahailoa deʼ ai roëhe ma gurutil̄e; ünanga Ti maua. Ngohi tatakihiriua hokä o nyawa yatakihiri. O nyawa ya pulono manga rupa, mä Ngohi tapulono manga hininga.”

⁸Ipaha o Isai wïahoko o Abinadab, aingohaka, daha wïhuloko wï himanga o Samuel. Mä o Samuel wato, ”Unangö ma Jou wï irikua.”

⁹Daha o Isai wïhuloko o Syama woiki mahimangiha, mä o Samuel wotemo, ”Unangö ma Jou wï irikua.”

¹⁰Hoko gënanga o Isai wähuloko aingohaka yatumidi ima tengo-tengo iwi himanga o Samuel, mä o Samuel wïtemo unangika, ”Onanga ma Jou wä irikua.”

¹¹Daha o Samuel wïleha unangika, ”Duga-duga nënanga ani ngoha o nau-nauru mata-mata?” O Isai wohaluhu, ”Nagaohi womatengo, madodoto makiditoko, mä ünanga magogiria wogoana o duba.” O Samuel wato, ”Nia huloko iwi ahoko ünanga, karana ngone aha hol̄omua nako ünanga woböa uahi.”

¹²Daha o Isai wähuloko iwi ahoko o ngohaka gënanga. Inyata ünanga o goduru womatengo wohailoa deʼ wotumuloa, deʼ ai lako irahai. Daha ma Jou wïtemo o Samuelika, ”Neunanga; nitede ünanga!”

¹³Dema dataitoka o Samuel wal̄e o zaitun maminya gënanga deʼ witede o Daud deʼ madatoro o minya wihi tuagi ai ria-riaka manga himangoka. Maöraha gënanga dika o Daud iwi kuaha ma Jou ai Womaha. Mulaenge o wange gënanga deʼ ihikaika iwi tomoteke ma Jou Ai Womaha. Ipaha o Samuel wolio o Ramaika.

¹⁴Mä o Saul iwi mal̄aka ma Jou Ai Womaha, o öraha gënanga ma Jou wahuloko o womaha madorou iwi hangihara ünanga.

¹⁵Hababu gënanga o Saul ai gogilaongo iwi temo unangika, ”Ngomi mihi öriki ma Jou wahuloko o womaha madorou ini hangihara Jou Koano.

¹⁶Nako Jou Koano nomodeke, ngomi sadia milingiri womatengo wososawaro wohigogule o kecapi. Maöraha Jou Koano ini hangihara o womaha madorou, o nyawa gënanga yakunu wohigogule ai kecapi, deʼ Jou Koano aha namao nosanangi oli.”

¹⁷Daha o Saul wahi pareta onangika, ”Nilingiri womatengo wososawaro wohigogule o musik, deʼ niwiaoino ünanga.”

¹⁸Yoihene gënanga ai gilaongo womatengo wato, ”O Isai o Betlehem makota manyawa toünanga aingohaka o nauru womatengo wosawaro wohigogule o musik. Unanga wobö barani deʼ o tentaraoka womatengo ma oa-oa. Ikali ünanga wokuata deʼ wosawaro wotemo-temo, deʼ ma Jou salalu wiriwo.”

¹⁹Daha o Saul wahidingoto ai huhuloko o Isaika yao o behehongo nënanga, ”Nihuloko ani ngohaka o Daud wogö goa-goana hagala ani duba gënanga wohihimanga ngohino.”

²⁰Ipaha o Isai wohidiai o keledai o dutu moi, daha wohi barene o kabingi o dutu moi, o roti deʼ o kadu-kaduö ai wani ma kai madol̄a o angguru ioma-omanga. Mata-mata gënanga wohi döaka o Daudika hupaya wohi huba o Saulika.

²¹Hoko gënanga o Daud waika o Saulika deʼ wodadi wilö leleani. O Saul duru wihayanga ünanga deʼ wï goraka wodadi ai dae woao-ao.

²²Ipaha o Saul wohi dingoto o behehongo o Isaika, ”Ngohi ti igo o Daudika. Nihi gumal̄a ünanga tatapu wogogere nenangoka deʼ wohileleani ngohi.”

²³Mulaenge gënanga, o Saul iwi dotoböa o womaha madorou gënanga, o Daud wal̄e ai kecapi deʼ wohigogule. Daha o Saul wamao worïdi deʼ wotumuloa oli, karana iwi mal̄a o womaha ma dorou gënanga.