Read Tobelo O SAMUEL MADODIHIRAKA 17 Bible Online

O SAMUEL MADODIHIRAKA 17 - Tobelo bible

O SAMUEL MADODIHIRAKA 17

¹O öraha moiuku o Filistin manyawa yatoomu manga tentara mangale yoiki yoparangi. Onanga yatatoro manga duduono o Soko makotaka, o Yehuda madaira magoronaka, deʼ ihi goko manga tau o Sokho deʼ o Azeka mahi dogorona itigika o Efes-Damim.

²O Saul deʼ o Israeloka ma nyawaö ima toomu deʼ ima tau o Ela ma Waioka; önanga kaimahi dodiai mangale yä himanga o Filistin manyawa manga parangi.

³Hoko gënanga o Filistin manyawa manga duduono imaoko o doporono moioka deʼ o Israeloka manyawa manga duduono o doporono mahomoaka, deʼ manga hidoronaka naga moi o wai.

⁴Daha womatengo woö igo-igo ima kangamo ai romanga o Goliat, o Gat makotaino o Filistin manga tauino wohupu mangale wä gaho-gahoko o Israeloka manyawa. Ai gurutil̄e done o metere hange,

⁵deʼ ünanga womahi tamunuku o sapeo o tabaga deʼ ai baju wohi poparangi o tabaga maduboho done o kilo moritoa deʼ tumidi.

⁶Ai l̄ou wohi tamunoko deʼ o l̄ou madadamunu o tabagaino, deʼ ai belekaka ünanga womahi mokuino o kuama o tabaga.

⁷Ai kuama maotini kaima tero mapako deʼ o pakeanga yodo diai ma pa kakaha maliate deʼ ai kuama madoto done hokilo tumidi madubuho. O tentara womatengo ai himangoka wohihira deʼ wao ino ai dadatoko.

⁸O Goliat woma togumu daha waböaka o Israel manga tentaraika, ”O kia magogiria ngini nidiai genangoka? Ngini nimau nimi parangi? Ngohi o Filistinoka womatengo, hei o Saul ai go gilaongo! Niwi iriki womatengo tingini niahi dogoronaka wo nau-nauru wouti hupaya wohiparangi wohilawani ngohi.

⁹Nako mima dengo-dengo o parangi magoronaka gënanga, ngohi wohi toma, sadia ngomi midadi nia gilaongo, mä nako ngohi toutumu deʼ titoma, ngini aha nidadi tongomi mia gilaongo.

¹⁰O öraha nënangaö tini gaho-gahoko o Israeloka nia tentara; niwi iriki womatengo mangale mima dengo-dengo wohi lawano ngohi!”

¹¹Maöraha o Saul deʼ ainyawa yoihene wagaho-gahoko gënanga, önanga yatodokana deʼ idadi duru yohawana.

¹²O Daud ganga o Isai aingohaka o Efrata manyawa, o Betlehemino o Yehuda madairaoka. O Isai to ünanga aingohaka o nauru yatufange, deʼ maöraha o Saul wo pareta o Isai duru iwi perekioka.

¹³O Isai aingohaka yaruange yorö ria-riaka yoikoka yoparangi iwi nïki o Saul. Worö ria-riaka ai romanga o Eliab, mahinotoka o Abinadab, deʼ ma hangeoka o Syama.

¹⁴O Daud o ngohaka madodoto makiditoko. Maöraha ai riaka yaruange yorö ria-riaka gënanga magogiria yoparangi iwi nïki o Saul,

¹⁵Ma moi-ma moi wimal̄aika o Saul deʼ wolio o Betlehemika mangale wogoana ai ama ai duba.

¹⁶O wange moruatino ma dekana, o ngorumino mahigetongo deʼ o bimaoa, o Goliat womahi tigi o Israel manga duduonika deʼ wa gaho-gahoko önanga.

¹⁷O wange moiuku o Isai wïtemo o Daudika, ”Na l̄e o gandum iharo-harongo o kilo ngimoi deʼ o roti o gahumu ngimoi nënanga, deʼ nao ani ria-riakika o tentara manga tauoka.

¹⁸Naoö o keju o gahumu ngimoi nënanga mangale o tentara manga duduono mabaluhu. No leha sarakia manga abari ani ria-riaka, deʼ nao manyonyata mangale ngohi, ngona nimaka makeoka dede önanga o halamati magoronaka.

¹⁹O nanga naga o Ela ma Waimoka ima kinïki ma koano Saul, deʼ mata-mata o Israel manyawa magogiria ima teke parangi yalawani Filistin manyawa.”

²⁰Yarehino mawange, o ngoru-ngorumino, o Daud womomiki daha woma hawo. Ai duba wohi dodogumika womatengo wogoa-goanika, ipaha ünanga wal̄e waö ao-ao daha woma jobo, imamoteke deʼ ai ama aipareta. Unanga womahi ädono o tauika maöraha o Israel manyawa ima jobo o parangi mangï ika ikali ima nere-nere o parangi ma ulili.

²¹O Filistinoka manga tentara deʼ o Israeloka manga tentara kaima koki himanga deʼ kaimahi dodiai mangale ima teke parangi.

²²Daha o Daud wohi dodogumika wao-ao ino gënanga o tentara manga kia honanga wogö goa-goanika, deʼ woma popäta o parangi mangï ika hupaya imaka make ai ria-riaka.

²³Maöraha ünanga dede önanga imateke ade-ade magogiriaka, o Goliat waika manga himangika deʼ wagaho-gahoko o Israel ma nyawa, hokä biaha wadodiai. O Daudö woihene wa gaho-gahoko mademo-demo gënanga.

²⁴O Israeloka manyawa iwi make o Goliat ipahaino, ima tai-taiti önanga yoara deʼ manga hawanoka.

²⁵”Niwi make ünanga!” ima ketemo imahi koko önanga. ”Ni ihene wona gaho-gahoko mademo-demo! Tongone nanga koano o Saul wojajioka onagona dika iwi toma o Goliat aha wahidöaka o hadia koha amoko. Ma koanoö aha wahikawingi o nyawa gënanga deʼ ngoi ora. De o nyawa gënanga ai ama ai tau manyawa aha yofangua o soungu.”

²⁶Daha o Daud wato, ”Igoungu kai barani o Filistin ma nyawa wokö kafi-kafiri gënanga wagaho-gahoko ma Jou Madutu wowango-wango Aitentara!” Ipaha ünanga wïleha o tentara woma tengoika, ”Okia aha wïhidöaka o nyawa wao aku-akunu wï toma o Filistin ma nyawaika gënanga deʼ waehe o hikauku o Israel ma nyawaino?”

²⁷O kawaha iwi hingahu unangika okia ma koano wohi jä jajioka.

²⁸O Eliab o Daud rioka worö ria-riaka woihene o Daud imateke ade-ade deʼ o tentaraoka. Unanga wï ngamo o Daudika deʼ wïtemo, ”Yadodoa naino nenangino? Onagona nähuloko yogoana ani duba-duba o dutu muruono naga gënanga o tonaka mako kakahaka? Ngohi tohi öriki, ngona nobarani noma hil̄e koi goungua naino nenangino duga-duga mangale nolega o parangi?”

²⁹O Daud wohaluhu, ”Okia ahi howono? Ngohi duga-duga kato leha dika!”

³⁰Daha ünanga woiki deʼ woleha o hali kai matero o tentaraika mahomoa; deʼünanga wamake mabobaluhu kahoko genangoli.

³¹Mä o nyawa yamuruono naga yo ö ihe-ihene o Daud ai demo, i hi ädono o Saulika, ho Daud wï ahoko wihimanga.

³²O Daud wato o Saulika, ”Jou Koano, ngone iparalua hamodongo o Filistin ma nyawaika gënanga! Ngohi toma ngaku tilawani ünanga.”

³³”Uha,” o Saul wohaluhu. ”Sarakia yakunu ngona nima dengo-dengo dede ünanga? Ngona duru kanomagö ikahi, mä ünanga wabobiahaka o parangi maöraha kawo ma gö ikahi.”

³⁴Mä o Daud wato, ”Jou Koano, ngohi biaha ahi ama ai duba togoa-goana. Nako o singa ekola o beruang iboa yagoli o duba,

³⁵o aiwani ihohatera gënanga ngohi togininïki deʼ ta gohara, daha o duba gënanga tohihalamati. De nako o singa ekola o beruang gënanga ihi lawani ngohi, done ngohi tasö ma tomarika, daha ngohi tagohara hiädono ihonenge.

³⁶Ngohi tatomaka o singa ekola o beruang, deʼ o Filistin manyawa wokö kafi-kafiriö gënanga aha imatero hokä o aiwani-aiwani gënanga, karana ünanga wobarani ma Jou Madutu wo wango-wango Aitentara deʼ wahikauku.

³⁷Ma Jou wohihalamatoka ngohi o singa deʼ o beruangino, Unangö aha wohihalamati ngohi o Filistin ma nyawaino gënanga.” Daha o Saul wato, ”Kayaoa, tanu ma Jou woni riwo.”

³⁸O Saul wihi döaka o pakeanga wohi poparangi, enagënanga moi o baju o behi o Daudika deʼ o Daud womahinoa. Daha o Saul wihi tamunu o sapeo o tabaga o Dauduku.

³⁹Mabaha o Saul ai o woro o Daud wohiliko o baju o behika gënanga daha wohi taili woma dagi, mä wakunua, karana o Daud wabiahaua wapake o parangi mapakeanga. ”Ngohi takunua tomadagi deʼ o pakeanga nënanga,” wato o Saulika.

⁴⁰Ipaha ünanga woma l̄e ai gogoana madiki-diki, daha ünanga woma ngiriki o helewo o gahumu motoa mahohululunu o ngairoka, daha wonoauku ai kadu magoronauku, deʼ o gatepel ai giamoka, ünanga wï ngika o Goliat.

⁴¹O öraha muruono naga ipaha o Goliat wihöhihira waö ao-ao ai dadatoko, mulaenge wïdagi wihi tigi o Daudika.

⁴²Maöraha ünanga wï make o Daud deʼ wï totailako, o Goliat wï gogiete wïhohedu karana o Daud duru kao goduruohi deʼai hailoa.

⁴³O Goliat wato o Daudika, ”Mangale okia o diki-diki gënanga? Nato bote ngohi nënanga o kaho?” Daha o Daudika wï lolai deʼ ai gomanga.

⁴⁴Ikali ünanga wïgahoko o Daud wato, ”Ika, naino! Ani roëhe aha tohi döaka o totaleoika deʼ o aiwani hupaya yä ol̄omo.”

⁴⁵Mä o Daud wohaluhu, ”Ngona naino nohilawani deʼ o oworo, o kuama deʼ o käwai, mä ngohi taino tonilawani deʼ ma Jou Duru woko Kuaha Ai romanga, o Israeloka manga tentara manga Jou Madutu nihi kokauku gënanga.

⁴⁶O wange nënanga dika ma Jou aha woni hilapahi ngona ngohino; ngona aha tonihohihanga deʼ ani tomara aha tatobiki. Ani roëhe deʼ o Filistin manga tentara manga roëhe aha tohidöaka o totaleoika deʼ o aiwani hupaya yä ol̄omo. Done o dunia ingodumu aha ihi öriki ngomi o Israeloka manyawa deʼ mia Jou Madutu ngomi mi wi hö huba-huba,

⁴⁷deʼ o nyawa mata-mata nenangoka aha ya make ma Jou wo paralua o oworo ekola o kuama wohi halamati Ai umati. Unanga wohi tantu o parangi mangekomo nënanga, deʼ Unanga aha wïni hilapahi ngini tongomi mia giama mahoatino.”

⁴⁸O Goliat mulaenge womahi tigi wïngika o Daudika, daha o Daud woma tai-taiti woma popäta wameta o Filistin manyawa manga duduonika mangale wiri himanga ünanga.

⁴⁹O Daud waha ngaini ai kaduku, wal̄ë moi o helewo daha wigatepel o Goliatika. O helewo gënanga yötadi o Goliat ai bimaoaoka hiädono ai haëke ma kabelanga ipooteke, deʼ ünanga woruba womotumuku o tonakuku.

⁵⁰O Daud woma popäta o Goliatika, daha woma okoino ai datekoka; ünanga wal̄ë o Goliat ai oworo deʼ warahuku ma harumil̄e, daha watobiki ai tomara o Filistin manyawa gënanga. Hoko gënanga o Daud wihohihanga deʼ wï toma o Goliat, duga-duga o gatepel deʼ o helewo! Maöraha o Filistin manyawa iwi make toönanga manga baluhu wobobarani wohonengoka, önanga yokoki oara.

⁵¹

⁵²O Israeloka manyawa deʼ o Yehuda ima uli-ulili deʼ yaginïki o Filistin manyawa hiädono o Gatika deʼ o Ekron ma ngorana ma amo-amokika. O Filistin manyawa yä l̄abo-l̄abo kahu mululu o ngekomo magurutu o Saaraimika gënanga!

⁵³O Israel manyawa yaginïki o Filistin manyawa ibötino gënanga, yolioino, daha ya ora toönanga manga tau madol̄a.

⁵⁴O Daud wä l̄ë o Goliat ai haëke, deʼ wao o Yerusalemika, mä hagala ai daë o Goliat wagogono ai tau magoronaka mahirete.

⁵⁵Maöraha o Saul wïmake o Daud woiki wilawani o Goliat, ünanga wïleha o Abnerika aitentara manga baluhu, ”Abner, ünanga tonagona manga ngohaka?” ”Ngohi to hi örikua Jou Koano,” o Abner wohaluhu.

⁵⁶Daha o Saul wipareta, ”Noiki deʼ noleha o hali gënanga.”

⁵⁷Ho, maöraha o Daud wolio o tauika o Goliat wïtoma ipahaino, o Abner wiao ünanga wihimanga o Saul. O Daud kawa dide inohi o Goliat ai haëke.

⁵⁸Daha o Saul wï leha unangika, ”Hei ngohaka goduru! Ngona tonagona manga ngohaka?” O Daud wohaluhu, ”Ngohi nënanga o Isai o Betlehemino aingohaka.”