Read Tobelo O SAMUEL MADODIHIRAKA 18 Bible Online

O SAMUEL MADODIHIRAKA 18 - Tobelo bible

O SAMUEL MADODIHIRAKA 18

¹O Saul deʼ o Daud ima temo-temo ibootino, o Saul wï goraka o Daud wodadi ai pegawe deʼ mulaenge o wange gënanga ünanga wïhi gumal̄a okaua wolio ai dimono manga tauika. O Yonatan o Saul aingohaka, woihenoka o ade-ade gënanga. Unangö wamao wï igo o Daudika, deʼ wihininga hokä ai diri mahirete.

³Karana gënanga o Yonatan wo koboto aha ima dodiawo deʼ o Daud kahi ädo-ädonika.

⁴O Yonatan waiki ai juba daha wihi döaka o Daudika, ai pakeanga wohi poparangiö ai oworo, ai toimi ma l̄eha deʼ ai gorona maninikutu.

⁵O Daud wadiai deʼ kaya oa-oa hagala o manarama o Saul wihi döa-döakoka unangika. Hababu gënanga o Saul wï goraka ünanga wodadi o tentara manga hidogoronaka manga baluhu, deʼ o Daud iwi igo o tentara mata-mata ikali o Saul ai gogilaongo.

⁶Maöraha o Daud wolio o Goliat wihohihangoka ipahaino gënanga, deʼ o tentaraka yotuo-tuono yowohama o kota magoronaika, o ngongoheka yohupu o Israeloka manga kotaino mata-mata iwi buhuku ma Koano Saul. Onanga yonyanyi o morene manyanyi, deʼ yo selo-selo deʼ i hi gogule o rebana deʼ o kecapi.

⁷ De yoselo-selo o ngongoheka yonyanyi hoko nënanga, ”O Saul wä toma ai haturu yoribu-ribuhu, mä o Daud yosä sana.”

⁸O Saul woihene gënanga, idadi duru wongamo. Hababu woma tibanga, ”O Daud iwi pulono wä tomaka deʼ manga sä sana, ena hioko ngohi duga-duga yoribu-ribuhu dika. Botino maraioka ünanga iwi hidadi toönanga manga koano!”

⁹Mulaenge o wange gënanga ünanga ai hininga isanangua o Daudika.

¹⁰Yarehino mawange o Saul naga ai tau magoronaka mago giria woma jöika ai kuama deʼ itodokanino ünanga iwi ngohamika o womaha madorou ma Jou Madutu wahö hulo-huloko, hiädono ünanga ai lakoino ihohutuoka hokä o nyawa yato togohanga. Oraha gënanga o Daud magogiria wohigogule o kecapi hokä biaha.

¹¹”Tihi tuduku o kuama nënanga o Daudika tihi dototara o be benoika!” O Saul woma tibanga, daha ünanga wïtuduku deʼ o kuama gënanga hiädono wohigali mahinoto o Daudika, mä o Daud kawo mahi rehenoka.

¹²O Saul wa mao o Daud witatokino ma Jou hiädono ünanga mahirete ma Jou wï mal̄aka. Karana gënanga ünanga idadi wï modongo o Daudika.

¹³Daha ünanga witururu o Daud o kadato madairaino, deʼ wi goraka wodadi o tentara yaribuhu moi manga baluhu. De hoko gënanga o Daudö wä tuda ai duduono, o parangi magetongo ma goronaka.

¹⁴Unanga wakunu wadiai hagala ai manarama, hababu ma Jou wï riwo.

¹⁵Maöraha wïmake o Daud salalu wohasili, ünanga iholoi wïmodongo unangika.

¹⁶Mä o Israeloka mata-mata deʼ o Yehuda iwi hayanga o Daudika, karana ünanga o tutuda kahangoë ai oa-oa.

¹⁷O Saul wohi datoro hupaya o Filistin manyawa iwi toma o Daud o parangi magoronaka hupaya uha ünanga mahirete wïtoma. Ho, o wange moiuku o Saul wïtemo o Daudika, ”Ngohi ora ma riaka o ngo Merab, aha tinihi habi dede ngona, iti ahali ngona nohi dumutu ani barani o parangi magoronaka mangale ma Jou.”

¹⁸O Daud wohaluhu, ”Onagona ngohi nënanga, deʼ o kia ma mangarati tongohi ahi ama ai tau manyawa o Israel okaka, hiädono ngohi todadi ma koano ai toroa?”

¹⁹Mä maöraha yadono maöraha o ngo Merab kiani womihi kawingi deʼ o Daud, woma nako-nakoua o moholehe gënanga womihi kawingoka deʼ o Adriel o Mehola mabereraino.

²⁰O ngo Mikhal o Saul ngoi ora mahomoa ami hininga yadaene o Daudika. Maöraha o Saul woihene o hali gënanga, unangö wo modeke.

²¹Woma tibanga, ”Kayaoa tihi baja o ngo Mikhal o Daudika, hupaya Daud tihinonai deʼ o Filistinoka manyawa yakunu iwi toma.” Ho, mangale mahinotoko o Saul wïtemo o Daudika, ”O öraha nënanga ngona yakunu nodadi ahi toroa.”

²²Daha ünanga wä huloko ai pegawe hupaya kaimahi bongonika iwihi ngahu o Daudika, hoko nënanga, ”Ma Jou Koano woni hayanga ngonaika deʼ hoko gënangö ai pegawe mata-mata; ho, o öraha nënanga maöraha yakokorona ngonaika mangale nomä hekata ngoi ora.”

²³Mä maöraha ihi ädono manga damake gënanga o Daudika, ünanga wohaluhu, ”Ngini nia tobote igapanga hodadi ma koano ai toroa? Ngohi o mihikini manyawa deʼ o kia-kiaua ihi daene!”

²⁴O pegawe-pegawe gënanga ihi ngahu o Saulika o Daud ai bo baluhu gënanga,

²⁵daha o Saul wähuloko önanga ihi ngahu o Daudika, hoko nënanga, ”Ma Jou Koano womau hokä ami huba duga-duga to o nauru makai o ratuhu moi to Filistinoka manyawa, hokä ma balahi ma koano ai haturuika.” (Nenanga o Saul wohi datoroka mangale wihohonenge o Daud deʼ ma ngekomo o Filistin manyawa.)

²⁶O Saul ai pegawe-pegawe ihi ädono o behehongo gënanga o Daudika, deʼ o Daud wä tarima ma koano ai gogahoko. Karana gënanga, magahe mabatingi yadonuahi, ünanga womajobo deʼ ainyawa, o Filistinoka manga dairaika. Watoma o Filistinoka ma nyawa yaratuhu hinoto, daha wa l̄e to o nauru makai, deʼ wohi lapahi o Saulika kamoiö ma ikurangua. Iböto gënanga o Saul womihi kawingi o ngo Mikhal deʼ o Daud.

²⁸Hoko gënanga o Saul wämao o Daud wï hohongino ma Jou deʼ o ngo Mikhalö ngoi ora duru mï igo.

²⁹Daha ünanga duru wïmodongo o Daudika deʼ ünanga wï dohata ai umuru magurutu.

³⁰Maöraha magetongo o Filistin manga tentara yoboa yaparangi, o Daud iholoi wohasili wahi binaha önanga, ngaro deʼ o Saul aitentara manga baluhu ma homoa. Daha o Daud i holoi ka i wi heto-hetongo.