Read Tobelo O SAMUEL MADODIHIRAKA 19 Bible Online

O SAMUEL MADODIHIRAKA 19 - Tobelo bible

O SAMUEL MADODIHIRAKA 19

¹O Saul wohi ngahu ai ngohakika o Yonatan, deʼ ai pegaweika mata-mata ünanga womau wïtoma o Daud. Mä Yonatan duru wïhayanga o Daud,

²karana gënanga ünanga wïtemo unangika, ”Ahi Ama wohi dailako woni toma; ho nomahi dodiai! Yarehe o ngorumino noma ngiunu o ngï moioka irö rahasia, deʼ nogogere genangoka.

³Ngohi aha toiki o tonaka malua-luasika mima nïki deʼ ahi ama deʼ mima oko mimahi tigi-tigika o ngï ngona noma ngiu-ngiunika gënanga. Daha ngohi aha titemo-tremo dedeünanga ima korona to ünanga ai dumutu ngonaika, deʼ mia ade-ade mahasili gënanga aha ngohi tonihi ngahu ngonaika.”

⁴Daha o Yonatan wohi ade-ade mangale o Daud ai oa-oa o Saulika, wato, ”Baba, uha Baba nihibodito ani gilaongo o Daud. Hababu ünanga wodiaiua o howono okianaga ngonaika Baba; mä idulu yaino, ünanga duru wodiaioka o oa-oa ngonaika Baba.

⁵Unanga wo hi taitoka ainyawa maöraha wïtoma o Goliat, deʼ ma Jou wihi döaka o utumu ma amoko o Israelokaika itilakuru ünanga. Baba mahirete namakeoka idö dadi gënanga, deʼ Baba nomorene o öraha gënanga. Ho, yadodoa o öraha nënanga Baba nomau na aniaya o nyawa yahowo-howonua, deʼ no mau ni toma o Daud deʼ mahababu o kia-kiaua?”

⁶O Saul idadi womangarati deʼ madiai, mangale o Yonatan ai demo-demo, deʼ ünanga wokoboto deʼ ma Jou Ai romanga o Daud aha wï tomaua.

⁷Iböto gënanga o Yonatan wïahoko o Daud, deʼ wijarita mata-mata manga ade-ade kangano. Ipaha ünanga wïao o Daud o Saulika, deʼ o Daud wileleani ünanga hokä mahira.

⁸Ipaha imulaengoli o parangi deʼ o Filistinoka manyawa. O Daud wäparangi deʼ wahohihanga kamamoiuku, hiädono önanga yokoki piringana.

⁹O wange moiuku o Saul magogiria wogogeruku ai tauoka deʼ ai kuama ai giamoka deʼ itodokanino iwi doto boali o womaha madorou wahö hulo-huloko ma Jou. O öraha gënanga o Daud magogiria wohigogule ai kecapi.

¹⁰Daha o Saul wohi dailako wïtuduku deʼ ai kuama o Daudika naga womahi tigi-tigika o bebenoika. Mä o Daud womahi rehenoka, hiädono o kuama gënanga o bebenoika ibelohika. O Daud woara mangale wohihalamati ai diri.

¹¹ O hutu genangoli o Saul wahi dingoto ainyawa yamuruono naga o Daud ai tauika mangale iwi hidonga-donga o Daud deʼ o öraha o ngorumino iwi toma. Mä o ngo Mikhal ngoi hekata mitemo unangika, ”Nako o hutu nënanga ngona noarua, yarehe o ngorumino marai ngona ini toma.”

¹²Daha o ngo Mikhal mihiguti o Daud o jangelaino, deʼ o Daud wohi oara ai diri hiädono ünanga wo otana.

¹³Iböto gënanga o ngo Mikhal ma l̄ë ami tau manyawa manga gikiri madulada daha makelengauku o Daud ai dangiroka. Ipaha mahaëkiha idaduoka mogelengauku o gogerena o kabingi magogoino, ikali mohi tamunuku o dulada gënanga deʼ o ngoëre.

¹⁴Maöraha o Saul ai huhuloko-huhuloko yaino hupaya iwi tagoko o Daud, o ngo Mikhal mato, ”O Daud magogiria wopanyake.”

¹⁵Mä o Saul wähuloko önanga yoikoli genangika hupaya iwi make o Daud deʼ toönanga manga lako mahirete. Wä pareta, ”Ni wiao ünanga nenangino, ngaroka deʼ ai dangiroka, hupaya titoma.”

¹⁶Daha o huhuloko gënanga yowohama o kamari magoronaika deʼ inyata o dulada ikelengauku o dangiroka deʼ o gogerena o kabingi magogo mahaëkiha idaduoka.

¹⁷O Saul womitemo o ngo Mikhalika, ”Igoungë ani hininga yakunu nohitipu ngohi hoko nënanga! Ahi haturü ni riwooka nihi oara ai diri!” Ongo Mikhal mohaluhu, ”Unanga wohihi koka modongo aha wohi toma nako ngohi toluku tiriwo tihi oara ai diri.”

¹⁸O Daud wohasili wohi oara ai diri ipahaino, ünanga woiki o Samuel ai tauika o Rama mabereraka, daha wohi ngahu mata-mata o Saul wado diaioka unangika. Ipaha o Daud deʼ o Samuel imanïki yoiki o Nayot mabereraika deʼ yogogere dokengoka.

¹⁹Mä o Saulika iwi ngahu o Daud naga o Nayot mabereraka imahi tigi-tigika o Ramaika.

²⁰Hababu gënanga o Saul wahi dingoto ai huhuloko yamuruono naga mangale iwi tagoko o Daud. Mä önanga yamake o nabi o doomu moi wätuda o Samuel ima kinïki magogiria yoselo-selo deʼ ima pöa-pöaka. Daha o Saul ai huhuloko-huhuloko gënanga yakuaha ma Jou Ai Womaha hiädono onangö mulaenge yoselo-selo deʼ ima pöa-pöaka.

²¹Maöraha o abari gënanga yadono o Saulika, ünanga wahi dingoto ai huhuloko mahomoa deʼ onangö gënanga mulaenge yoselo-selo deʼ ima pöa-pöaka. Mangale mahangeoka o Saul wahi dingoto ai huhuloko deʼ hoko genangoli idadi onangika.

²²Hababu gënanga o Saul woiki o Ramaika. Womahi ädonika o Sekhu mahumu ma amo-amokoka, ünanga woleha naga o kiaka o Samuel deʼ o Daud, deʼ o nyawa genangoka iwihi ngahu unangika önanga naga o Nayotoka.

²³Ho, ünanga wogila-gila doke ngika, mä unangö ma Jou Ai Womaha iwi kuaha, hiädono woselo-selo deʼ woma pöa-pöaka ai dodagi magurutu o Nayotika.

²⁴ Womahi ädonika doke ngoka, ünanga wäiki ai pakeanga deʼ woselo-selo ikali woma pöa-pöaka o Samuel ai himangoka, daha wo rubauku o tonakoka deʼ kai hekonoka o wange moi deʼ o hutu moi iahumu. (Nenanga ma ahali madodihiraka o demo ma ade ma betongo, ”Boteka o Saul ö wodadi o nabi?”)