Read Tobelo O SAMUEL MADODIHIRAKA 2 Bible Online

O SAMUEL MADODIHIRAKA 2 - Tobelo bible

O SAMUEL MADODIHIRAKA 2

¹ Daha ongo Hana moma niata, mato,

²Moiua yotebini hokä ma Jou! Duga-duga Unanga wakunu wohidöaka o hohohongo.

³Natogumu ani demo itotiaiua koö iwa-iwa madol̄a! Nohibobaha ani demo iö ede-edenge! Hababu ma Jou gënanga ma Jou Madutu Duru wobö barija; wa juru hakimi hagala o nyawa manga manarama.

⁴O nyawa yonö nau-nauru manga toimi ma l̄eha itobikoka, mä iholoi yokuata o nyawa yobole-bole.

⁵O nyawa mahira yä punuhu karana duru kohangoë mangainomo, öraha nënanga yodadi o hewa manyawa duga-duga mangale ya make o inomo. O nyawa mahira yahabirokata, öraha nënanga yogogihounuku, yaoaka manga inomo. o hekata mofaatua, öraha nënanga amihininga ilamoko, o ngohaka yatumidi mahidadioka! Mä o ayo iwoë-woë ami ngohaka imi doka oaroka, imi dogu mal̄aika kamo pöpanyakeika.

⁶Ma Jou wahohonenge, unangö wahiwango. O nyawa yohone-hone manga duniauku wahiguti o nyawa. De Unangoliwagoraka dokengil̄e.

⁷Naga o nyawa wadiai yomihikini, ma nagaö wadiai yokaya. Naga o nyawa wahi poluluku nagaö wahi kurutil̄e.

⁸O hangihara yatago-tagongil̄e de yagoraka o nyawa koö iwa-iwa manga arata, o hangiharaino yahilapahi o nyawa o kia-kiaua yadö dae-daene. Onanga yahidadi o nyawa yomomulia manga dodiawo, de yahidöaka o pangkati ihö horomati. O dunia mahohol̄e toma Jou ma l̄okuoka wohigoko o dunia.

⁹O nyawa yosösetia salalu yohawanua ma Jou Ai hohongo magoronaka Mä yatotorou yobinaha yowede-wederuku o huhutu magoronaka de o huhutu mahai-haiti magoronaka. Nia kuata mahirete yakunua ningaku, o nyawa manga buturungu yakunua ihidöaka o utumu.

¹⁰Ma Jou Ai haturu yowede-wederuku, önanga yohawana; o dihanguku Unanga womadotoreke. Ma Jou ahawa juruhakimi o dunia nënanga ingodumu, de wahidöaka o kuaha imomulia o koano wi iri-irikoka ika.”

¹¹Daha o Elkana deʼ aitau madol̄a yolio o Ramaika, mä o Samuel, o ngohaka gënanga, wogogere o Siloka de wileleani ma Jou ma Imam Eli aigogoana matimioka.

¹²O Eli ai ngoha-ngohaka duru yätorou. Onanga iwi haduliua ma Jou,

¹³deʼ hokä o imam önanga yodiai manga hininga mahuka o Israel ma nyawaika. Hohiade nako naga o nyawa ihihuba manga huhuba, yarö riwo-riwo ma imam yaino imä gao o forok ma ingiri hangeoka. O hiode maakeme magogiria yahakaika gënanga,

¹⁴o forok gënanga ihitopoko o pan magoronauku o hiode maakeme ihihohakai mangïuku gënanga, daha o kia dika yatauru ihihupu de o forok gënanga idadi toma imam. O Israeloka yobö boa-boa o Siloika mangale ihihuba manga huhuba yadiai hokä hoko gënanga.

¹⁵Mamoi-mamoi warö riwo-riwo gënanga waino mahaki ya tingakuahi mangale yaharongo, daha ünanga watemo o nyawa ihihö huba-hubaika manga huhuba gënanga, ”Nihidöaka o hiode maakeme magou-gouohi gënanga ma imamika hupaya ünanga woma nofo; ünanga woluku watarima o hiode maakeme iboho-bohoko.”

¹⁶Nako o nyawa gënanga wohaluhu, ”Kayaoa ngone hamoteke o datoro, deha harongo ihira mahaki gënanga; iböto gënanga yakunu na l̄e de ani hininga mahuka,” done worö riwo-riwo gënanga wotemo, ”Kowali, o öraha nënanga dika kiani nohidöaka, nako kowali, aha ta l̄e dema pakisa.”

¹⁷Hoko gënanga o Eli ai ngoha-ngohaka yahinoto gënanga manga baradoha ma amoko ma Jou Ai lakoka, karana önanga ihibaragunaua o huhuba ihihö huba-huba mangale ma Jou.

¹⁸O öraha gënanga o Samuel kao ngoha-ngohakohi gënanga gila-gila wileleani ma Jou. Unanga womahi noauku o baju yo dinga-dingakoka o ngöere o lenanino, hokä o imam-imam manga baju ihipö puji-puji.

¹⁹O taongo mahi getongo ngoi ayo midiai o juba mai teteke daha mihidöaka o Samuelika nako ongo heka gënanga imakinïki de ami rokata yoboa ihihuba manga huhuba o taongo moi mamoi.

²⁰Daha o Eli wahibarakati o Elkana deʼngoi hekata, deʼ ünanga witemo o Elkanaika, ”Tanu ma Jou wonihi döakoli o ngoha-ngohaka ngonaika ngoni hekatino nënanga, mangale witagali o ngohaka ngini niwihi lolapahioka ma Jouika.” Ipaha gënanga önanga yolio o Ramaika.

²¹Ma Jou Madutu womihi barakati o ngo Hana, hiädono mohi dadioli o ngohaka o ngohaka o nauru yaruange de o ngohaka o ngo heka yahinoto. O Samuelö wodogo-dogo wolamoko magogiria wileleani ma Jou Madutu.

²²O Eli duru iwi timonoka. Unanga hoko genangika woihene o galaki yakorona aingoha-ngohaka manga kalakuanga o Israel ma nyawaika. O Eliö wohi öriki aingoha-ngohaka imahi kihidu de ongongoheka yomomanarama ma Jou Ai Boa ma Tau mangorona mahimangoka.

²³Hababu gënanga ünanga watemo aingoha-ngohakika, ”Ngohi tatarima o hingahu o umati yongodumu ima korona tingini nia kalakuanga itotorou. Yadodoa ngini nia diai gënanga?

²⁴Ibötohi nia diai hoko gënanga, ahi ngohaka. Igoungu duru itorou okia ihi ade-ade ma Jou Ai umati mangale ngini!

²⁵Nako o nyawa yahowono o nyawaika, ma Jou Madutu wakunu wariwo; mä nako o nyawa yobaradoha ma Jouika, onagona yakunu wariwo?” Ma önanga yahaduliua o Eli ai hidäere toönanga manga ama, hababu ma Jou waputuhoka mangale wä toma önanga.

²⁶Iidulu yaino o Samuel, o ngohaka gënanga, iholoi wo lamoko iholoi iwï igo, yaoa ma Jou, yaoa o nyawa mata-mata.

²⁷O wange moiuku o nabi womatengo woböa o Elika de wohi ädono ma Jou Ai behehongo unangika, wato, ”Maöraha anitohora o Harun deʼ aitau madol̄a yodadi ma koano Mesir aigilaongo, Ngohi tomahi matokoka o Harunika.

²⁸ Hagala o Israeloka manga hoanino Ngohi ta irikoka manga tau madol̄a yodadi Ahi imam, mangale yoleleani o huba mangïoka, yotuhuku o dupa, de yapake o alu madadamunu mabaju nako mima teke ade-ade dede Ngohi. De onangika ima nïki toönanga manga gutiuku, Tohi döakoka o haku mangale ima l̄e o hidoku o huhubaino yatö tuhu-tuhuku o huhuba mangïoka.

²⁹Ho, yadodoa ngona kano kal̄il̄u ohi namake hagala o huhuba ima mote-moteke de Ahi pareta, ihi hö huba-huba Ngohino? Yadodoa ngona Eli iholoi nahoromati ani ngoha-ngohaka ngaro de ihi horomati Ngohi, de namal̄aika önanga ihi burere manga diri de o hidoku duru maoa-oa ahi nyawaino manga huhuba magetongo Ngohino?

³⁰Ngohi, o Israeloka manga Jou Madutu, mahira to jajioka, ani tau madol̄a de ani ahali moi aha nihï leleani Ngohi hokä o imam mangale kahi ädo-ädonika. Mä o öraha nënanga Ngohi toigo okauaoli o hali gënanga! Hababu ihi horomati Ngohi, aha Ta horomati mä i hi hikauku Ngohi, aha Tahikauku.

³¹Noihene, maöraha aha iböa Ngohi tatoma o gikiri magö mata-mata ani tau madol̄a de ani ahali moi magoronaka, hiädono moi okauaö o nauru ani tau magoronaka ahayadono manga umuru ikurutil̄e.

³²Ngona aha ani hininga ihuha deʼ namao ani hininga isanangua namake hagala o barakati aha ta hi döaka o Israel manyawa ma homoaika, hoʼ de ani tau madol̄aoka mahirete aha yohonenge o gikiri magö mata-mata.

³³Mä, womatengo ani gutiuku, aha Ti mal̄aika wowango deʼwohi leleani Ngohi hokä o imam. Mä ünanga wodadi wo piloko de wowango de ai nganono itoaka. Mata-mata ani difauku mahomoa aha yä toma.

³⁴Hokä ma nyonyata hagala Toto temo-temoka gënanga itiai aha idadi, ani ngohaka yahinoto gënanga, o Hofni deʼ o Pinehas aha yohonenge o wange moi magoronaka.

³⁵Ipaha Ngohi aha to ma ngiriki o imam wososetia Ngohino deʼ wadiai okia Tihipoparetaka unangika. Unangika aha Tihi döaka ai difauku hoko genangika ahayomanarama hokä o imam o koano Ta iri-irikoka manga himangoka.

³⁶Ani difauku moi-moi yowango-wangohi, aha yoiki ma imamika gënanga mangale yogahoko o tiwi deʼ o inimo. Unanga aha wo gahoko, Nohi higumal̄a ngohi tariwo o imam, hupaya ngohi takunu tol̄omo ngaroka duga-duga o hugara moi dika.”