Read Tobelo O SAMUEL MADODIHIRAKA 20 Bible Online

O SAMUEL MADODIHIRAKA 20 - Tobelo bible

O SAMUEL MADODIHIRAKA 20

¹Daha o Daud woara o Nayot deʼ waino itigi deʼ o Rama deʼ woiki ima make o Yonatan, daha woleha, ”O kia ahi howono? O dorou o kia ngohi tadiaioka deʼ ahi baradoha okia ani amaika hiädono ünanga womau wohi toma?”

²O Yonatan wohaluhu, ”Uha notemo hoko gënanga! De ma Jou ngona aha woni tomaua. Ahi ama salalu wohi ngahu hagala ai datoro ngohino, yaoa duru ipoparalu ekola kowali. Ho, koidadiua ünanga warahasia ai dungutu gënanga ngohino. Hababu gënanga, okia nohi demo-demoka gënanga itiaiua!”

³O Daud wohaluhu, ”Ani ama wohi öriki deʼ madiai ngona nohi hayanga ngohino. Ho, maraioka ünanga woluku wonihi ngahu o hali gënanga ngonaka hupaya ngona uha ani hininga ihuha. Sarakia ö dika, deʼ ma Jou wowango-wango, igoungu ahi wowango hokä o gohi o tataduku madekaroka!”

⁴Daha o Yonatan wohaluhu, ”Okia dika no gahoko aha tadiai.”

⁵ O Daud wohaluhu, ”Hoko nënanga, yarehe naga o Mede ma hungi ma Rameanga, deʼ ngohi kokiani to l̄omo mima kinïki deʼ ma koano. Mä nako ngona nomodeke, ngohi aha toiki deʼ toma ngiunu o tonaka malua-luasoka hiädono midiringi mahutu.

⁶Nako ani ama wohï leha yadodoa ngohi toboaua, nahetongo unangika, ngohi tomahi demoka ngonaika mangale tai-taiti tolio o Betlehemika, karana doke ngoka miadiai o huhuba madatoro mahuhuba o taongo higetongo mangale ahi tau manyawa mata-mata.

⁷Nako ma koano wato, ’Kayaoa,’ done ngohi koiwa ahi modongo, mä nako ünanga wongamo, hohi öriki ünanga wa l̄ëoka maputuhu mangale wohihi bodito ngohi.

⁸Ngohi togahoko ani roriwo, karana ngone halikoka nanga jaji ma Jou Ai himangoka. Mä nako ngohi tahowono, nohi toma ngohi, mä uha nohihi lapahi ngohi ani amaika.”

⁹O Yonatan wohaluhu, ”Uha nohawatere! Nako ngohi tohi öriki deʼ madiai ahi ama womauoka mangale wonihi bodito, maraioka aha tonihi ngahu ngonaika.”

¹⁰Ipaha o Daud woleha, ”Onagona aha ihihi ngahu ngohino hohi ade ani ama woni baluhu deʼ ai dohata?”

¹¹”Naino ngone hoiki o tonaka malua-luasika,” o Yonatan wato. Daha önanga yoiki ima nïki o tonaka malua-luasika.

¹²Daha o Yonatan wïtemo o Daudika, ”Tanu ma Jou, o Israeloka manga Jou Madutu wodadi tongone nanga hakihi! Yarehe o ngorumino ekola midiringi done maöraha hokä o öraha nënanga, ngohi aha tohi dailako tohi öriki ahi ama ai hininga madol̄a. Nako ünanga ai jako yaoa ngonaika, ngohi aha tohi dingoto o abari ngonaika.

¹³Nako ünanga ai dungutu wonihi bodito, maraioka aha tonihi ngahu ngonaikaö hupaya ngona yakunu nohi halamati ani diri. Tanu ma Jou wohi toma nako o hali gënanga kotadiaiua. Tanu ma Jou woni riwo hokä unangö wiriwoka!

¹⁴De nako ngohi kato wangohi, nohininga tongone nanga jaji ma Jou Ai himangoka deʼ nosetia ngohino; mä nako ngohi koi hiwaka,

¹⁵ nohi dumutu ani setia ahi gutiuku mangale kahi ädo-ädonika. De nako ma Jou wabinaha ani haturu mata-mata,

¹⁶tongone ina hinoto nanga jaji nanga hidogoronaka uha itoaka. Nako hiädono itoaka, ma Jou aha woni hukumu.”

¹⁷Ho, mangale mahinotoka o Yonatan wï huloko o Daud wojaji aha wihininga ünanga, hababu ünanga wihininga o Daud hokä ai diri mahirete.

¹⁸Ipaha o Yonatan wïtemo unangika, ”Yarehe o mede mahungi marameanga. Maraioka aha wohi öriki ngona noböaua, hababu ani ngï ihomoa o meja niö ol̄o-ol̄omoka;

¹⁹o kia hongoli midiringi! Hababu gënanga, noiki o ngï kahuruono nomangö ngiu-ngiunikaoka gënanga, deʼ notamä genangoka o helewo itotoomu il̄e maporetoka.

²⁰Midiringi ngohi aha tohi toimi o toimi madoto o gahumu hange tameta o helewoika gënanga matero-tero tameta enanga mangï ika.

²¹Daha ahi gilaongo aha tïhuloko watoraka o toimi madoto gënanga, deʼ nako ngohi tïtemo unangika, ’Ee, o toimi madoto gënanga iholoi itiginoli nenangino; na l̄ë,’ gënanga ma mangarati ngona iböto nohawana deʼ yakunu nohupu. Ngohi to koboto deʼ ma Jou wowö wango-wango ngona koiwa o bahaya okia dika magoronaka.

²²Mä nako ngohi tïtemo ahi gilaongika, ’Ee, o toimi ma doto gënanga iholoi ikurutikali dokengika,’ gënanga ma mangarati ma Jou woni huloko ngona noiki; ho, noiki.

²³Tanu ma Jou wona goana ngone, hupaya tongone nanga jaji inahinoto nanga hidogoronaka hasö-sö kahi ädo-ädonika.”

²⁴Daha o Daud woma ngiunu o tonaka malua-luasoka. O Mede ma Hungi ma Rameangoka, ma Koano Saul waika o jamuangika.

²⁵Hokä ai biaha ünanga wogogere o bebenoika womahi tigi-tigika; o Yonatan woma l̄ë o ngï ai himangoka, o Abner o Saul ai honongaka, mä o Daud ai kuruhi kahirahi ihomoa.

²⁶Mä o Saul watigiua o hali gënanga o wange gënanga, hababu wapikiri, ”Mudukua ünanga waohana moi o hali, hiädono ünanga wotebinua imamoteke o agama.”

²⁷O wange yainoli, enagënanga o wange mahinotoka o Mede ma Hungi, o Daud ai kuruhi kai homoaohioli, daha o Daud wï leha o Yonatanika, ”Yadodoa kanugono deʼ o wange nënanga o Daud woböaua o jamuangino?”

²⁸O Yonatan wohaluhu, ”Unanga womahi demoka ngohino mangale woiki o Betlehemika.

²⁹Wato, ’Nohihigumal̄a ngohi toiki, karana ahi tau manyawa magogiria ihi mulia o huhuba marameanga o Betlehemoka, deʼ ahi riaka ihi ahoko ngohi taika. Hababu gënanga, nako nohi higumal̄a, mal̄aika ngohi toiki mangale mima kamake deʼ ahi roriadodoto.’ Hababu gënanga, ünanga woboaua o ngol̄omino nënanga.”

³⁰Woihene gënanga o Saul duru idadi wï ngamo o Yonatanika deʼ wïtemo unangika, ”O haramu mangohaka nohibobinaha nanga hoana! O öraha nënanga ngohi tohi öriki nihi boa o Daud deʼ nö diai o mal̄eke ani diri ikali ngoni ayo!

³¹Namaoua ngona madekana o Daud wowangohi, ngona aha idadiua nokoano mangale o berera nënanga? O öraha nënanga nä huloko o nyawa iwi lingiri ünanga deʼ iwiaoino nënangino, hababu ünanga kiani wohonenge!”

³²O Yonatan wohaluhu, ”Yadodoa ünanga kiani wohonenge? Ai baradoha okia?”

³³Woihene gënanga o Saul wï tuduku o Yonatanika womau wïtoma. Daha o Yonatan wohi öriki igou-goungu ai hiningaka womau wïtoma o Daud.

³⁴De duru kai dohata o Yonatan wamal̄a o Jamuan mameja deʼ ünanga o kia-kiaua wol̄omo o Mede ma Hungi ma Rameangoka o wange mahinotoka gënanga. Unanga duru ai hininga wagoungu wï tibanga o Daud mangale o Saul ai ama wï hikaukuoka.

³⁵Yarehino mawange o Yonatan woiki o tonaka malua-luasika mangale ima make deʼ o Daud hokä önanga yabori tatoroka. Unanga wï ao o ngohaka womatengo, ai gilaongo,

³⁶Daha wïtemo unangika, ”Ika, natoraka o toimi madoto aha tohitoimi.” O ngohaka gënanga woma popäta magogiriaka, o Yonatan wohi toimi o doto moi wï hitilakuru o ngohaka gënanga.

³⁷Maöraha o ngohaka gënanga womahiädono mangï ika o toimi madoto itifa-tifa gënanga, o Yonatan wï böaka unangika, ”Ee, o toimi madoto gënanga iholoi ikurutikaoli dokengika!

³⁸Noma taituku, uha nomahi totananaohi!” O ngohaka gënanga wä toraka o toimi madoto gënanga deʼ wolio ai tuangika.

³⁹Unanga kautuö ma womangaratiua o Yonatan ai demo-demo madungutu gënanga, duga-duga o Yonatan deʼ o Daud ima ngarati.

⁴⁰Ipaha o Yonatan wohi döaka ai toimi deʼ mapakakaha o ngohakika gënanga deʼ wïhuloko ünanga wolio o kotaika.

⁴¹O öraha gënanga woikoka, o Daud wohupu o helewo itö toporono maporetino gënanga, daha watila bukuku wï huba wohigali mahange. Maöraha önanga ima bori ame yahinotö yo bori ari, Yaoa ünanga yaoa o Yonatan. O Daud ai hininga ma huha iholoi ilamoko ngaro deʼ o Yonatan ai hininga mahuha.

⁴²O Yonatan wïtemo ipaha o Daudika, ”Tanu ma Jou Madutu wonï riwo. Ma Jou aha wona tagongo ngone deʼ tongone nanga difauku salalu yasö-sö tongone ina hinoto nanga jaji ma Jou Madutu ai himangoka.” Ipaha gënanga o Daud woma jobo, deʼ o Yonatanö wolio o kotaika.