Read Tobelo O SAMUEL MADODIHIRAKA 21 Bible Online

O SAMUEL MADODIHIRAKA 21 - Tobelo bible

O SAMUEL MADODIHIRAKA 21

¹ Daha o Daud woiki ma imam Ahimelekhika o Nob mabereraka. De ai dodokana o Ahimelekh wohupu ima make deʼ o Daud deʼ wï leha unangika, ”Yadodoa ngona naino kanomatengo dika?”

²O Daud wohaluhu, ”Ngohi wohihilapahioka ma koano o manarama moi deʼ wohiduhunu tohi ngahu kai matengoikaö mangale o manarama gënanga. Hababu gënanga ahi nyawa tahulokoka yotamä o ngï moioka.

³Uha nohi ngamo, öraha nënanga ngohi toigo toleha, o inomo o kia naga ngonaka Bapak? Nohihi döaka ngohino o roti o gahumu motoa ekola o kia dika naga nënangoka.”

⁴Daha ma imam gënanga wato, ”Tongohi ahi roti biaha koiwa, duga-duga o roti ihihö huba-huba naga; ngona yakunu na l̄ë, iti yakunu dika ani nyawa yakunua yadiai o roëhe moi itai-taitino nënanga.”

⁵O Daud wohaluhu, ”Maraioka dika önanga yadiaiua. Salalu nako ngomi mimanarama, ahi ngoha-ngohaka ima goana hupaya önanga yotebini imamoteke o agama, ena hioko gënanga duga-duga mangale o manarama-manarama biaha; okia hongoli o manarama itö tinga-tinga koka hokä o öraha nënanga!”

⁶ Daha ma imam gënanga wihi döaka o Daudika o roti ihihö huba-huba gënanga, hababu naga unangoka duga-duga o roti ihihö huba-huba ma Jou Madutuika, deʼ yagorakoka o huhuba mangï ino mangale ihi tagali deʼ o roti mahungi. (

⁷Ima daenika, o Doëg o Edom manyawa, o Saul ai aiwani ma gogoana manga baluhu o wange gënanga naga genangoka mangale okianaga moi wohitotomo o agama mamau-mau.)

⁸Ipaha o Daud wïleha o Ahimelekhika, ”Boteka bapa na gogonika o kuama ekola o oworo yakunu toma jöino? Makoano gënanga aipareta duru kawo hihi todokanino hiädono toma jobo deʼ duru toma taiti deʼ tomahi daenokaua toma l̄ë o oworo ekola o daë mahomoa.”

⁹ Daha o Ahimelekh wohaluhu, ”Ngohi tagogonika o Goliat ai oworo, o Filistin manyawa nitö toma-toma o Ela ma Waioka gënanga; o oworo gënanga naga o Efod maporetoka, ihawoino o ngoëre magoronaka. Nako nomau, na l̄ë dika, hababu duga-duga gënanga o daë naga nenangoka.” O Daud wato, ”O öworo gënanga o oworo duru maoa-oa o berera mata-mataika nohihi döaka gënanga ngohino!”

¹⁰O wange gënanga dika o Daud wohi oara ai diri o Sauloka deʼ waino, daha womahi ädono o Akhisika o Gat ma kota ma koano.

¹¹ O Akhisika iwi hingahu ai popegawe hoko nënanga, ”Koigoungu ünanga nënanga o Daud, ai bereraoka wohikö koano? De koigoungua mangale ünanga o ngongoheka öraha gënanga yoselo-selo ikali yonyanyi hoko nënanga, ’O Saul wä toma yoribu-ribuhu o haturu mä o Daud yosäsäna?ʼ ”

¹² O demo-demo gënanga yaruaë o Daud ai dibanga, deʼ iwi diai duru wï modongo ma koano Akhisika.

¹³ Hababu gënanga, o nyawa yowoë-woë manga himangoka o Daud womado diai hokä o nyawa yätotogohanga. Maöraha önanga ihi taili iwi tumungu, ünanga matero-tero ai hininga itiaiua; ünanga warago-ragoho o kota mangorana deʼ wodogu mal̄aika ai kiriti yoduguihi ai gumiuku.

¹⁴Daha o Akhis wätemo ai popegaweika, ”Boteka ngini niwimakeua o nyawa gënanga iwi togohanga? Yadodoa ngini niwi aoino nenangino?

¹⁵Kai kurangohi o nyawa manga hininga itotiaiua ahi date-datekino, hiädono ngini nihido taoino womatengoli iwi totogohanga ahi tauoka nënanga?”