Read Tobelo O SAMUEL MADODIHIRAKA 22 Bible Online

O SAMUEL MADODIHIRAKA 22 - Tobelo bible

O SAMUEL MADODIHIRAKA 22

¹ Ipaha o Daud wamal̄a o Gat ma kota deʼ woma ngiunu o Adulam ma kota ma aruku madatekoka. Maöraha ai ria-riaka deʼ ai tau manyawa mata-mata yoihene ünanga naga gënangoka, önanga yaika unangika.

²Hagala o nyawa yatö tuku-tukuö, manga nö nagi-nagimoka, deʼ yamao yosösanangua, mata-mata imako dogo deʼ o Daud, deʼ o Daud wodadi toönanga manga tutuda. Manga gegetongo o Daud iwinö ninïki naga o nyawa done hö yaratuhu iata.

³O arukoka gënanga o Daud woiki o Mizpaika o Moab mabereraka de wotemo o Moab maberera ma koanoika, ”Kana higumal̄a tongohi ahi ama deʼ ngohi ayo yogogere ngonaka ahi Tuanga, hiädono ngohi tohi öriki okia ma Jou Madutu Ai dungutu ngohino.”

⁴Ipaha ai dimono gënanga waao o Moab maberera ma koanoika, deʼ önanga kahirahi dokengoka hoko kia madekana o Daud wo mangiunu o arukoka.

⁵O wange moiuku o nabi womatengo ai romanga o Gad woböa o Daudika deʼ wïtemo, ”Uha nogogere o arukoka nënanga, noiki de noma tai-taiti o Yehuda matonakika.” Daha o Daud woiki deʼ wowohama o Keret mahonganika.

⁶O wange moiuku o Saul mago giria wogogeruku o tamariska mautu matimioka o Gibea madoporono mal̄okuoka; ünanga woma jöika ai kuama, ai tenatara manga balu-baluhu mata-mata ma gogiria ima oko iwihi gilolitino. Maöraha ünanga woihene o Daud ai ngï de ainyawa wohi örikoka,

⁷Unanga wätemo aitentara manga balu-baluhika gënanga, ”Ni ihene, hei o Benyamin ainyawa! Boteka o Daud gënanga aha winihi döaka o dumule deʼ o angguru maraki? Boteka ngini mata-mata aha ini goraka aitentara manga hidogoronaka manga baluhu?

⁸Genanga mahababu ngini nimateke fakati nihi lawani ngohi deʼ moiuaö ihi ngahu ngohino ahi ngohaka mahirete mawihiboa o Daudino gënanga? Moiuaö naga nginino nio dibanga ahi diri ekola nihihi ngahu ngohino o Daud, ahi nyawa mahirete, o öraha nënanga magogiria wodamä maöraha mangale wohi toma deʼ ahi ngohaka o Yonatan wïhi döakoka o hihitimo unangika!”

⁹ O Doëg o Saul ai aiwani magogoana manga baluhuö naga genangoka deʼ o Saul aitentara manga balu-baluhu, daha o Doëg wato, ”Ngohi timakeoka o Daud wï adonika o Ahimelekh o Ahitub aingohaka o Nob mabereraka.

¹⁰O Ahimelekh wogahoko o hidumutu ma Jouika ima korona o kia kokiani o Daud wadiai. Mahomoa deʼ gënanga o Daudika wihibilaonoli o inomo ikali wihidöaka unangika o Goliat ai o oworo, o Filistin manyawa gënanga.”

¹¹Daha ma koano wähuloko iwi ahoko ma imam Ahimelekh deʼ aingohaka deʼ ai riadodoto mata-mata yodö dadadi o imam o Nob mabereraka; daha önanga iwï himanga unangika.

¹²O Saul wïtemo o Ahimelekhika, ”Noihene hei o Ahitub ai ngohaka!” Wo haluhu, ”Iya, Jou Koano.”

¹³O Saul wïleha unangika, ”Yadodoa ngona nima fakati deʼ o Daud nihi lawani ngohi? Yadodoa nihibilaono ünanga deʼ o roti nihi döakoka o oworo ikali nogahoko o hidumutu ma Jou Madutuino? Ho, öraha nënanga ünanga wohi lawani ngohi deʼ magogiria wotamä o öraha mangale wohitoma ngohi.”

¹⁴Daha o Ahimelekh wohaluhu, ”Mä koigoungua o Daud, Jou Koano ani tentara manga baluhu duru wososetia? Unanga ganga Jou Koano ani toroa mahirete, Jou Koano ani diri yogoa-goana manga haëke, deʼ duru iwi horomati o nyawa mata-mata Jou Koano ani kadato magoronaka.

¹⁵Igoungu, ngohi togahokoka o hidumutu ma Jou Madutuino mangale ünanga, mä koma dodihira okaua mangale ngohi todiai gënanga. Imakorona mangale mima teke fakati mini lawani Jou Koano, uha Jou Koano nohi kalaki ngohi ekola tongohi ahi tau manyawa magoronaka. Ngohi o kia-kiaua tohi öriki mangale o perkara gënanga!”

¹⁶Mä koano wato, ”Ahimelekh! Ngona deʼ ani roriadodoto mata-mata kokiani nihonenge.”

¹⁷Daha ünanga wähi pareta iwigö goa-goanika ima oko iwitö tigi-tigika, ”Ika, nia toma ma Jou Ai imam-imam gënanga! Onanga o demo ima konoaka deʼ o Daud. Onanga ihi öriki o Daud wohi oara diri, mä önanga yoluku ihihi ngahu ngohino.” Mä iwigö goa-goana gënanga yoluku yätoma ma Jou Ai imam-imam gënanga!

¹⁸Hababu gënanga o Saul wïtemo o Doëgika, ”Ika, tai-taiti! Ngona dika nä toma önanga!” Daha o Doëg wotagi waika deʼ wätoma o imam-imam gënanga. O wange gënanga ünanga wä toma yamori tufange deʼ yamotoa o imam manyawa deʼ manga haku imahi noa o efod mabaju.

¹⁹O Saul wähi paretaö mangale yätoma o Nob manyawa mata-mata, o imam ma kota gënanga; o nau-nauru, o ngoheka, o ngoha-ngohaka, deʼ o ngohaka magil̄au, o hapi, o keledai deʼ o duba, mata-mata de manyö nyawa-nyawaka yamata-mataka.

²⁰Duga-duga o Abyatar, o Ahimelekhino aingohaka wohasili wootana. Unanga wohi oara ai diri o Daudika,

²¹daha wohi ngahu o Saul wä tomaka ma Jou Ai Imam-imam.

²²Daha o Daud wïtemo unangika, ”Maöraha tïmake o Doëg o wange gënanga dokengoka, ngohi tohi öriki deʼ madiai ünanga aha wonakalaki o Saulika. Ho, ngohi tomahi tagongo mangale manga honenge ani riadodoto mata-mata.

²³Nogogere dede ngohi deʼ uha nohawana. O Saul woigo woni toma, mä unangö woigo wohi toma ngohi. Ho, ngona aha no rïdi ahi ngïoka.”