Read Tobelo O SAMUEL MADODIHIRAKA 23 Bible Online

O SAMUEL MADODIHIRAKA 23 - Tobelo bible

O SAMUEL MADODIHIRAKA 23

¹O wange moiuku iwihi ngahu o Daudika o Filistin manyawa yaparangi o Kehila deʼ yaora manga gandum daha yautu-utukino.

²Daha ünanga woleha ma Jouika, ”Kokiani ngohi toiki tä parangi o Filistin manyawa?” ”Iya,” ma Jou wohaluhu, ”nä parangi önanga deʼ nähihalamati o Kehila manyawa.”

³Mä o Daud ainyawa iwi temo unangika, ”Barikua nenangoka, o Yehudaoka, ngone duru hohawana; okia hongoli nako ngone ko kiani hoiki haparangi o Filistin manga tentara o Kehilaka.”

⁴Hababu gënanga mamoioli o Daud wogahoko o hidumutu ma Jouino, deʼ ma Jou wohaluhu, ”Uha nohawatere. Naparangi o Kehila ma kota, karana o Filistin manga tentara gënanga aha Ta hilapahi ngonaika.”

⁵Daha o Daud ainyawa yoiki o Kehilaika yätoma o Filistin manyawa komangoë deʼ yäora toönanga manga aiwani. Hoko gënanga o Daud wahilapahi o kota manyawa gënanga.

⁶Maöraha o Abyatar o Ahimelekh aingohaka wohi oaroka ai diri o Daudika, deʼ winïki o Daud o Kehilaika, unangö womä gao o efod.

⁷Maöraha iwihi ngahu o Saulika o Daud naga o Kehilaka, o Saul watibanga, ”O Daud ma Jou Madutu wohihilapahioka ngohino. Unanga wï nonai karana wowohamoka o kota magoronaika deʼ mamehe-meheloka deʼ mangorana ma amo-amoko.”

⁸Daha o Saul wätoomu aitentara deʼ ima jobo o Kehilaika mangale iwi higiloliti o Daud kamamoi ainyawa mata-mata.

⁹Mä o Daud wohi öriki o Saul ai hininga madorou unangika. Hababu gënanga ünanga wïtemo ma imam Abyatarika, ”Naoino o efod gënanga nenangino.”

¹⁰Daha o Daud womä niata, ”Jou o Israeloka manga Jou Madutu, ngohi toihene o Saul ai dungutu mangale woböa o Kehilaika deʼ wawedere o kota gënanga karana ngohi, ani gilaongo.

¹¹Itiai o abari to ö ihe-ihene gënanga? Jou, o Israeloka manga Jou Madutu, nomau nohihingahu ngohino.” Ma Jou wo haluhu, ”Iya, o Saul aha wo boa.” Daha o Daud wolehali, ”Boteka o Kehila ma kota manyawa aha ihihilapahi ngohi deʼ ahi nyawa o Saulika?” Daha ma Jou wohaluhu, ”Iya.”

¹³Daha o Daud deʼ ainyawa done yaratuhu butanga, ima tai-taiti yamal̄a o Kehila deʼ yoiki kiaika honanga o ngï moiino deʼ o ngï ma homoaika. Maöraha o Saul woihene o Daud woikoka wamal̄a o Kehila, ünanga ai datoro wï parangi wohidadi okaua.

¹⁴Iböto gënanga o Daud wogogere o l̄oku mabuturungu ma aru-aru koka o Zif matonaka makokakahaka. Unanga salalu o Saul wigoginïki, ma Jou wihi lapahiua ma koano gënanga.

¹⁵Ngaro hoko gënanga o Daud kawo hawana dika, karan o Saul ai dungutu womau wï toma. O öraha moiuku o Daud naga o Hores oka, o Zif matonaka makokakahaka.

¹⁶O Yonatan woiki ima make genangoka mangale wohi kuata ai ngongaku ünanga aha ma Jou Madutu wï hohongino.

¹⁷O Yonatan wïtemo unangika, ”Uha nohawana, ngona aha ini otakua ahi ama ai giama mahoatika. Unanga wohi öriki deʼ madiai ngona aha nodadi o Israeloka manga koano deʼ ngohi aha ta make o pangkati ani timioka.”

¹⁸ Ipaha o Daud deʼ o Yonatan yodiai manga jaji ima dodiawo ma Jou Ai himangoka. Iböto gënanga o Yonantan wolio ai tauika, mä o Daud kahirahi wogogere o Horesoka.

¹⁹ Ipaha o nyawa yamoruono naga o Zifino iwï himanga o Saul o Gibeaka deʼ yato, ”O Daud woma ngiunu tongomi mia dairaoka hagala o aruku magoronaka o Horesika itigioka, o Hakhila ma Doporono ma l̄okuoka o Yehuda matonaka makokakaha o korehara il̄e idaduoka.

²⁰Ngomi mihi öriki Jou Koano duru nomau nitagoko ünanga; hababu gënanga, naino tongomi mia dairaino. Ngomi mia tagongo maraioka Jou Koano yakunu nitagoko.”

²¹O Saul wohaluhu, ”Tanu ma Jou winihi barakati ngini karana nidiai o oa-oa ngohino!

²²Nioiki deʼ nihi tantuoli; nia tailako deʼ nia gou-goungu kiaka naga o Daud deʼ onagona iwi makeoka dokengoka. Ngohi toihene ünanga duru itaiti woma ngarati.

²³Mä nia tailako deʼ madiai hagala o aruku idadi ai ngï mamoi iböto woma ngiunu, deʼ nilio nenangino mangale nihihi ngahu ngohino. Daha ngohi aha toiki homa kinïki dede ngini, deʼ nako ünanga kanagahi o dairaoka gënanga maraioka aha tilingiri, ngaroka kiani takilianga o Yehuda ingodumu!”

²⁴Daha ima jobo o nyawa gënanga yolio o Zifika iwi hihiraika o Saul. O öraha gënanga o Daud deʼ ai nyawa naga o Maon matonaka makokakahaka, o wai irö rirïdoka o Yehuda matonaka makokakaha madairaoka o korehara il̄e.

²⁵O Saul deʼ ai tentara yoboa yomau iwi lingiri o Daud, mä o nyawa iwihi ngahuoka o hali gënanga o Daudika, hiädono ünanga woiki ol̄oku o helewoika o Maon matonaka makokakahaka deʼ wogogere genangoka. O Saul woihene iböto o hali gënanga, ünanga deʼ ai japati wiginïki o Daud.

²⁶O Saul deʼ ai tentara ima dagi ol̄oku madateke nengino mahononga mä o Daud deʼ ainyawa madateke doka mahononga. O Daud woma tai-taiti wohi oara ai diri o Sauloka önanga yomulaengoka iwi higiloliti yomau iwi tagoko.

²⁷Mä itodokanino o huhuloko womatengo woböa wihingahu o Saulika deʼ wato, ”Kokiani Jou Koano itaiti nolio! O Filistin manyawa yaparangioka tongone nanga berera!”

²⁸Daha o Saul woma togumu wiginïki o Daudika, deʼ woiki hupaya walawani o Filistin manyawa. Hababu gënanga o ngï gënanga yahetongo o gitingaka mal̄oku.