Read Tobelo O SAMUEL MADODIHIRAKA 24 Bible Online

O SAMUEL MADODIHIRAKA 24 - Tobelo bible

O SAMUEL MADODIHIRAKA 24

¹Genangoka deʼ woiki o Daud o En-Gedi madairaika, deʼ woma ngiunu hagala o arukoka.

²Maöraha o Saul daha wolioino o parangino wä lawani o Filistin manyawa, ünanga watarima o abari o Daud naga o tonaka makokakahaka o En-Gedi ika itigioka.

³ O Saul womataiti wäiriki o tentara yaribuhu hange duru maoa-oa o Israelino yongodumu, daha ima jobo iwi lingiri o Daud deʼ ainyawa o Kabingi ma Honganika ma l̄oku iho Helewoka, o wange mahiwaroko idaduoka.

⁴Daha o Saul womahi ädono itigioka deʼ o duba makurunga muruono naga o ngekomo madatekoka. Genangoka naga moioli o aruku, deʼ o Saul wowohama hupaya woma l̄ohihi. Duru ima daenika o Daud deʼ ainyawa magogiria ima ngiunika o arukokaö gënanga, iholoioli doka magoronaika.

⁵Daha o Daud ainyawa iwitemo unangika, ”Nenanga ani öraha ngonaika Bapa! Koi goungua ma Jou wotemoka ngonaika Bapa hoko gënanga, ’Ani haturu aha tahilapahi ngonaika, nadiai imoteke ani mau mangale unangika!ʼ ” Ipaha o Daud woma tahe o Saul ai ngï ika deʼ kowo ilingua waluiti mahuhutulu o Saul ai juba mabarene.

⁶Mä iböto gënanga, o Daud wamao wahowono karana ünanga wadiaioka o hali gënanga.

⁷Unanga wätemo ai nyawaika, ”Tanu ma Jou wohi goana uha hiädono ngohi todiai o dorou ahi koanoika ma Jou wiö iri-irikoka. Kamahuhutulö ma yakunua ngohi tihangihara, karana ünanga ma koano ma Jou Ai ngongiriki!”

⁸Hoko gënanga o Daud wärïdi ainyawa, deʼ wahi gumal̄aua önanga iwi parangi o Saul. O Saul womomiki deʼ wal̄a o aruku gënanga, daha wohi gila-gila ai dodagi.

⁹O Daudö wohupu o arukino gënanga deʼ woma pöaka o Saul ai poretino, ”Jou Koano!”

¹⁰O Saul woma lega ai poretoko deʼ o Daud watilabukuku deʼ ma horomati daha wotemo, ”Yadodoa Jou Koano nohi gihene o nyawa manga demo, yatobari ngohi tomau tonihi bodito Jou Koano?

¹¹O öraha nënanga Jou Koano namao mahirete o aruku ma goronaka kangano, ma Jou wohihilapahioka Jou Koano ngohino. Ngohi ihi bajaka mangale o nyawa moi-moi hupaya toni toma Jou Koano, mä ngohi toluku. Ngohi tohaluhu ngohi toluku tihangihara tongohi ahi koano wïö iri-irikoka ma Jou.

¹²Nolega, ahi Ama! Nolega Jou Koano ani juba maluiti ngohi tasöino nënanga!” De madiai ngohi yakunu toni toma Jou Koano, mä ngohi duga-duga taluiti mahuhutulu Jou Koano ani juba mabarene. Ho, inyata ngohi ahi dungutu itorouua ekola tosetiaua. Jou Koano nohigoginïki ngohi mangale nohi toma ngohi, ngaroka ngohi tahowonua mahuhutulö Jou Koanoika.

¹³Tanu ma Jou waputuhu onagona yahowono tongone nanga hido goronaka! Tanu ma Jou wabalahi Jou Koano ani manarama ngohino, ngaro mahuhutulö ngohi toni hangi haraua Jou Koano.

¹⁴Jou Koano nohi öriki o demo ma ade ihira-hiraika nënanga, ’Yododiai o dorou duga-duga mangale o nyawa madorou.’ Hababu gënanga ngohi aha toni hangi haraua Jou Koano.

¹⁵Nohi tailako nohidodiai ngohi nënanga o Israeloka manga koano mangale womau wohi toma! Nohi pulono ngohi nënanga niwï goginïki! Ngohi duga-duga o kaho mahonenge moi, o gumemene dika moi.

¹⁶Ma Jou aha wodadi o hakihi Jou Koano deʼ ngohi nanga hidogoronaka. Tanu Unanga watailako o perkara nënanga, wohï datoko ngohi ikali wohihalamati ngohi ngonaino Jou Koano.”

¹⁷O Daud wahetongo iböto ai demo-demo gënanga, o Saul wotemo, ”Ngona gënanga, hei Daud, ahi ngohaka?” Daha ünanga wo ari.

¹⁸Daha wïtemo o Daudika, ”Ngona natiai, ngohi tahowono.

¹⁹Ahi dorou ngonaika nabalahoka deʼ o oa-oa. O wange nënanga ngona nohi dumutoka ngona ani dungutu yaoa-oa ngohino, hababu ngona nohi tomaua, ngaroka ma Jou wohihilapahi ngohi ngonaika.

²⁰Duru koha makeua womatengo ima make deʼ ai haturu mä wimal̄aika ai haturu gënanga wowango! Ho, tanu ma Jou woni hibarakati ngona karana ani manarama maoa-oa ngohino o wange nënanga!

²¹O öraha nënanga ngohi tongaku ngona aha nodadi o koano mangale o Isreloka deʼ o Israeloka ma pareta kahirahi ikuata ani pareta matimioka.

²²O öraha nënanga nojaji ngohino deʼ ma Jou, ngona aha natomaua ahi gutiuku, deʼ aha naeheua ahi tau manyawa manga romanga!”

²³Daha o Daud wokoboto aha wodiai o hali gënanga. Ipaha o Saul wolio ai tauika, deʼ o Daud ikali ai nyawaö yolio o ngï imangö ngiu-ngiunikaoka.