Read Tobelo O SAMUEL MADODIHIRAKA 25 Bible Online

O SAMUEL MADODIHIRAKA 25 - Tobelo bible

O SAMUEL MADODIHIRAKA 25

¹Ipahaika itedekanua o Samuel wohonenge. O Israeloka Yongodumu imatoomu mangale yanïki o duka madatoro. Ipaha ünanga iwï lungunu ai tauoka o Rama mabereraka. Iböto gënanga o Daud woiki o Paran matonaka makokakahaika.

²O Maon makotaka naga womatengo o nauru o Kaleb ai ahalino, ai romanga o Nabal. Unanga deʼ ai tonaka wopopaliara o aiwani itigi deʼ o Karmel makota. Unanga duru wokaya deʼ to ünanga ai duba o dutu o ribuhu hange deʼ o kabingi o ribuhu moi. Ngoi hekata o ngo Abigail, mosawaro deʼ mohailoa, mä ami rokata o Nabal ai hininga itogowini deʼ ai kalakuanga itorou. O wange moiuku o Nabal magogiria woguti ai duba magogo o Karmeloka.

⁴Maöraha o Daud naga o tonaka makokakahaka, woihene o hali gënanga,

⁵ünanga wähuloko o goduru yangimoi yoiki o Karmelika,

⁶imakamake o Nabal hupaya ihi ädono o Daud ai tabea unangika. Unanga wähuloko önanga yotemo hoko nënanga o Nabalika, ”O tabea deʼ o lolä ngonaika deʼ ani tau manyawa ikali hagala ani kia honanga.

⁷Ngohi toihene ngona magogiria ani duba magogo noguti. Nohiöriki ani aiwani magogoana naga tongomi mia dairaoka, ko maiwahi ngomi mia hohiagaga, deʼ komaiwahiö ihihanga toönanga manga o kiaö madekana naga o Karmeloka.

⁸Beika noleha dika onangika, maraioka önanga aha ihi goungu o hali gënanga. Hababu gënanga, tonganono ahi nyawa na tarima deʼ kaya oa-oa ani tauoka, karana ngomi miaika o wange monaokoka nënanga. Nahidöakö ahi gogilaongika nënanga deʼ ngohino, o Daud ani dodiawo yaoa-oa, okia dika imamoteke ani hininga mamau.”

⁹Imahi adonika o Karmeloka, o Daud ainyawa ihi ädono o behehongo gënanga o Nabalika deʼ o Daud ai romanga, daha önanga yö tamä.

¹⁰Mä o Nabal wohaluhu, ”O Daud? Onagona ünanga? Onagona gënanga o Isai aingohaka? Komaiwahi ngohi tigihene mangale ünanga! O öraha ipaha-paha nënanga o gilaongo manga ngoë manga tuangoka yoara o bereraka nënanga!

¹¹Kiaka yakunu ngohi tal̄ë o roti deʼ o akere taoke-okere, ikali o hiode ma akeme tasösadiaoka mangale ahi nyawa yogö guti-guti, daha tahidöaka mata-mata gënanga o nyawaika itototararonua manga ahali deʼ manga gutiuku!”

¹²Daha o Daud ainyawa gënanga yolio o Daudika ihi ngahu o Nabal ai demo-demo gënanga.

¹³O Daud wä pareta, ”Nimahiliko nia oworo nia goronaino moi-moi!” De manga japatioka ainyawa yamoteke o pareta gënanga. O Daudö womahiliko ai oworo ai goronaino deʼ ima jobo deʼ ainyawa done yaratuhu iata, mä ya ratuhu hinoto yogogore mangale yogoana manga kia honanga.

¹⁴O öraha gënanga o ngo Abigailika o Nabal ngoi hekata, womihi ngahuoka womatengo wilö leleani o Nabal, hoko nënanga, ”Noihenoka Nyonya? O Daud wähulokoka ai huhuloko yamuruono naga o tonaka makokakahaka deʼ yaino mangale ihi döaka ai tabea tongone nanga tuangika, mä ünanga wädoa-doana önanga.

¹⁵Ena hioko önanga duru yaoa ngomino. Komaiwahi imihö hiagaga ngomi, deʼ komaiwahiö tongomi mia kia naga ihihanga maöraha ngomi mimateke dodiawo dedeönanga o tonaka mako kakahaka.

¹⁶O hutu deʼ o wange önanga imi hohongino ngomi madekana ngomi mio goana o kabingi o duba toönanga manga datekoka.

¹⁷Hababu gënanga, natibanga o hali nënanga, deʼ naputuhu okia Nyonya yakunu nadiai. Hababu maraioka aha iboa mabalahi tongone nanga tuangika deʼ ai tau manyawa ingodumu. Tongone nanga tuanga hoko gënanga ai häeke madogowini hiädono ünanga hakunua hiahoko hupaya hitemo!”

¹⁸Daha o ngo Abigail deʼ ami japatioka mal̄ë o roti o ratuhu hinoto, deʼ hinoto o kadu-kadu o aiwani makai madol̄a i oma-omanga o angguru ma teongo, o duba i l̄ofo-l̄ofo o dutu motoa, opine ihohinanga o kilo ngimoi deʼ tumidi, o angguru ma hohoko matore o gosela o ratuhu moi, deʼ o kukisi o ara o ratuhu hinoto. Mata-mata gënanga ihi doa hagala ami keledai mal̄okuoka.

¹⁹Daha munanga mä temo imilö leleanika, ”Ngini nioiki nihi hiraika; ngohi aha tinï nïkika.” Mä munanga okia-kiaua motemo ami rokatika.

²⁰O ngo Abigail mobarene ami keledai, de maöraha munanga momahi ädono o dupukoro moioka ol̄oku madatekoka, imaka taga munanga deʼ o Daud deʼ ai nyawa magogiria youti yodumu-dumutu ami himangino.

²¹O öraha gënanga o Daud woma tibanga magogiria, ”Parahaja dika ngohi togoana o nyawa gënanga manga kia honanga o tonaka makokakahaka! Naga kamahuhutulö ma ihihangua ai kiahonanga; deʼ o öraha nënanga ahi oa-oa wohibalahi deʼ o dorou!

²²Tanu ma Jou Madutu wohi toma ngohi, nako kotä tomaua o nau-nauru mata-mata naga dokengoka o wange ipotokaö deʼ kowahi!”

²³Maöraha o ngo Abigail mimake o Daud, munanga deʼ ami japatioka mouti ami keledaioka daha matila bukuku o Daud ai l̄ouoka,

²⁴ikali munanga motemo unangika, ”Ahi Tuanga, noigo no ihene! Mal̄aika o howono gënanga ngohi mahirete tatagongo!

²⁵Ahi Tuanga uha nipikiri o Nabal, o nyawa wobö baragunaua gënanga! Unanga o nyawa bodo — imadaene deʼ ai romanga ma mangarati. Ngohi tä makeua o hagala o huhuloko ahi Tuanga na hö hulo-huloko gënanga.

²⁶Ma Jou Madutu woni duhunoka ahi Tuanga nabalahi deʼ nä toma Tuanga hagala ani haturu. De öraha nënanga ahi Tuanga, deʼ ma Jou wo Wango-wango, ngohi tokoboto, tanu o kia idadi mangale ani haturu ahi Tuanga deʼ moi-moi o nyawa yöigo-igo i nihibodito ahi Tuanga ima daene hokä o kia idadi o Nabal.

²⁷Natarima o hahawo ngohi tao-ao nënanga mangale ahi Tuanga, deʼani nyawa ahi Tuanga.

²⁸Uha nohi ngamo tongohi ahi alipa. Ma Jou maraioka aha wonihidadi ahi Tuanga ikali ani gutiuku ahi Tuanga nokoano mangale o Israeloka, hababu ahi Tuanga noparangi mangale ma Jou; deʼ ahi Tuanga nodiaiua o dorou ani wowango magurutu.

²⁹Hohiade womatengo woni parangi ahi Tuanga deʼ wohi taili woni toma ahi Tuanga, daha ahi Tuanga maraioka ma Jou Madutu aha woni hohongino hokä o arata wogoana madutu. Mä ahi Tuanga ani haturu ma Jou aha wahikaweli wakö kurutika, mangale yahi kaweli yogö gatepel.

³⁰Ma Jou aha wadiai hagala maoa-oa wohijä jajioka ahi Tuangika, deʼ itedekanoka uaoli ahi Tuanga wonihidadi mangale o Israeloka manga koano.

³¹O öraha gënanga ahi Tuanga aha nohininga ahi Tuanga notomaua koiwa mahababu ekola nomadiai o juru hakimi mahirete hiädono ahi Tuanga iparaluua namao ani hininga ihuha ekola noma toduba. De nako ma Jou wonihi barakatioka ahi Tuanga, uha nohi wohanga ngoni gilaongo nënanga.”

³²Daha o Daud womitemo munangika, ”O higiriri ma Jou, o Israeloka manga Jou Madutu, wonihuloko ngona o wange nënanga nohi buhukino!

³³O higiriri ani barija deʼ o higiririö ngona mahirete nohi tumungoka ngohi todiai o doma ikali tomadiai juru hakimi ma hirete.

³⁴Ma Jou wohi duhunoka ngohi todiai o dorou ngonaika. De ma Jou, o Israeloka manga Jou Madutu wo Wango-wango, hohiade ngona itaitua nohibuhuku, maraioka o Nabal ainyawa yongodumu yohonengoka maöraha o wange ipotoka!”

³⁵Iböto gënanga o Daud watarima okia o ngo Abigail maö ao-ao mangale ünanga, daha womitemo munangika, ”Nolio ani tauika deʼ uha nohawatere. Ani gogahoko tatarimaka!”

³⁶Maöraha o ngo Abigail molio o Nabalika, inyata naga o rameanga ma amo-amoko ai tauoka, hokä o koano marameanga. De karana o Nabal iwi daluku deʼ womore-morene, ngoi hekata mihi ngahua okiaö unangika hiädono iyarehino.

³⁷Ongorumino, o Nabal iwi dalukokaua ibötino, ngoi hekata mihi ngahu unangika mangale hagala o dorou gënanga. Daha o Nabal wamake o panyake o huoka deʼ ai roëhe ingodumu idadi ilugu.

³⁸Done o wange ngimoi ipaha o Nabal wamakeoli ma Jouino o panyake ai huoka hiädono ünanga wohonenge.

³⁹Maöraha o Daud woihene o Nabal wohonengoka, ünanga wato, ”O higiriri ma Jou! Unanga wabalahoka o hikauku o Nabal wadodiai ngohino, deʼ nitatokoka ani gilaongo nënanga wodiai o dorou. Ma Jou wïhukumoka o Nabal karana ai dorou.” Ipaha o Daud wähi dingoto ai huhuloko o ngo Abigailika mangale imï gahoko modadi ngoi hekata.

⁴⁰O Daud ai huhuloko imahi ädono o ngo hekaika gënanga o Karmeloka deʼ imi temo munangika, ”O Daud womi huloko ngomi mini ädono Nyonya, hababu ünanga woigo woni gahoko Nyonya nodadi ngoi hekata.”

⁴¹O ngo Abigaelö momaoko deʼ moma rukuku deʼ motemo, ”Ngohi nënanga o Daud ngoi gilaongo, ngohi toma sadiaka ai gogilaongo manga l̄ou taihoro.”

⁴²Ipaha munanga moma hidiai moma hawo moma tai-taiti. Munanga modoa ami keledai il̄e deʼ imi nïki ami nyawa o ngoheka imilö leleani yamotoa, munanga moma jobo manïki o Daud ai huhuloko, daha munanga modadi o Daud ngoi hekata.

⁴³Kowahi deʼ gënanga o Daud wokawingoka deʼ o ngo Ahinoam o Yizreelino, deʼ öraha nënanga o ngo Abigailö modadi ngi hekata.

⁴⁴O öraha gënanga o Saul womihi kawingoka ngoi ora o ngo Mikhal, enagënanga o Daud ngoi hekata, deʼ o Palti o Lais aingohaka o Galim makotaino.