Read Tobelo O SAMUEL MADODIHIRAKA 26 Bible Online

O SAMUEL MADODIHIRAKA 26 - Tobelo bible

O SAMUEL MADODIHIRAKA 26

¹ O wange moiuku o Zifino manyawa yoboa o Saulika o Gibea mabereraka deʼ ihi ngahu unangika o Daud magogiria woma ngiunika o Hakhila mal̄okuoka o Yehuda matonaka makokakaha madatekoka.

²Daha deʼ ma japatioka o Saul woma jobo iwi nïki aitentara yaribuhu hange duru ma oa-oa o Israel okaka, ya meta o Zif matonaka makokakaha, mangale i wi lingiri o Daud.

³O Saul womä tau o ngekomo madatekoka o Hakhila mal̄oku gënanga imahi tigi-tigika. O Daud naga o tonaka makokakahaka, woihene o Saul winïki hiädono o tonaka makokakahaka.

⁴Daha unangö wahi dingoto yotö tailako deʼ ünanga wohi öriki deʼ madiai ünanga naga genangoka.

⁵De ai japatioka o Daud woiki o Saul ai tauika deʼ genangoka wamake o tau kiaka o Saul woma idu ima datekuku deʼ o Abner o Ner aingohaka. O Saul ai tau gënanga naga mahi dodogoronaka mä aitentara ima tau iwi higilolitino.

⁶Ipaha o Daud wïleha o Ahimalekhika o Het manyawa gënanga, deʼ o Abisaika o Yoab ai dodoto (Toönanga manga ayo ganga o ngo Seruya), ”Onagona yobarani yowohama dede ngohi o Saul ai tau magoronaika?” O Abisai wo haluhu, ”Ngohi!”

⁷Daha o hutu gënanga o Daud deʼ o Abisai ima tahe o tau gënanga magoronaika deʼ iwi make o Saul magogiria woma iduoka o tau mahidö dogoronaka, ai kuama wohi belehuku o tonakuku wohi tigi-tigino ai haëkoka. O Abner deʼ ai duduono imaidu iwihi gilolitino o Saul.

⁸Daha o Abisai wïtemo o Daudika, ”Ma Jou Madutu wonihi lapahi ani haturu ngonaika o hutu nënanga. Nohihi gumal̄a ngohi tihiruju ai kuama mahirete ai roëhuku tohi dototara hiadono o tonakuku, tï toma ünanga deʼ tituduku mamoi ngaro uha hi ädono tohigali mahinoto!”

⁹Mä o Daud wato, ”Uha nidodoa ünanga! Ma Jou marai wä hukumu o nyawa yododiai o dorou ma koano wiö iri-irikokaika.

¹⁰De ma Jou Wo wango-wango, ngohi tohi öriki damä ma Jou mahirete aha wïtoma o Saul, nako ai ajali yadonoka, ekola nako ünanga wohonenge o parangi magoronaka.

¹¹Tanu ma Jou wohi täere ngohi titoma o koano wiö iri-irikoka!. Hal̄ë dika ai kuama deʼ ai akere mangï, daha ngone homa jobo!”

¹²Daha o Daud wä l̄ë o Saul ai kuama deʼ ai akere mangï gënanga, o Saul ai haëkiha idaduoka, daha ima jobo. O Nyawa moiuaö yamake o hali gënanga ekola ihi öriki o kia idö dadadioka, ekola yomomiki, hababu ma Jou wadiai önanga mata-mata ima idu deʼ manga nihu-nihuku.

¹³Daha o Daud watobiki o wai mahomoa madatekika hiädono o l̄oku matubuil̄e, hiädono ünanga wokurutika deʼ o Saul ai tau.

¹⁴Ipaha o Daud wïböaka o Abnerika deʼ o Saul ai tentaraika wato, ”Abner! Noihene tongohi ahi ilingi?” O Abner ö wopoakoli, ”Ngona o nagona noma pöa-pöaka gënanga?”

¹⁵O Daud wohaluhu, ”Abner, koigoungua ngona o Israeloka manyawa duru nokö kua-kuata? Yadodoa ngona nigoanua ani tuanga, ma jou koano? Daha ipahaino naga o nyawa yongohama ani tau mangale iwi toma ani tuanga.

¹⁶Ngona nakunua nohidagi ani manarama, Abner! De ma Jou wo Wango-wango, ngini mata-mata kiani nihonenge, karana niwi goanua nia tuanga, o koano ma Jou Ai ngö ngiriki. Beika nö lega! Kiaka ma koano ai kuama? Kiaka ai akere mangï naga kangano ai haëkiha idaduoka?”

¹⁷O Saul wanako o Daud ai ilingi deʼ wïleha, ”Daud ngona gënanga, ahi Ngohaka?” O Daud wohaluhu, ”Iya, Jou Koano.”

¹⁸Daha wotemoli, ”Yadodoa Jou Koano kanohi goginïkohi dika ngohi? Okia tongohi ahi howono?

¹⁹Jou Koano, noihene tongohi ahi horomati nënanga. O demo ma ade ma Jou woni huloko Jou Koano hupaya nohi lawani ngohi, o huba moi ihihö huba-huba aha yakunu yaogoro ai gangamo ngohino. Mä o demo ma ade inihö hulo-huloko Jou Koano gënanga ka o nyawa, tanu ma Jou wälolai önanga! Karana toönanga manga manaramino mahasili gënanga, ngohi ihi duhuoka ma Jou Ai tonaka madutuoka de pakisa kiani toiki o berera mahomoaika kiaka ngohi kiani tapuji hagala o gomanga mahomoa.

²⁰Uha noho mal̄aika ngohi tohonenge o tonaka mahomoaka, tokurutika deʼ ma Jou. Okia mafaidä o Israeloka manga koana woboa mangale wä toma moi o gumemene hokä ngohi nënanga? Okia mafaidä ünanga wohi ginïki ngohi hokä o nyawa yoginïki o meleu?”

²¹O Saul wohaluhu, ”Ngohi todiaioka o howono. Nolio Daud ahi Ngohaka! Ngohi aha todiai okaua o dorou ngonaika, karana ngona nohihi gumal̄aka ngohi towango kangano mahutu. Ahi kalakuanga igoungu ibodo. Igou-goungu ngohi tomahi örikokaua!”

²²Mä o Daud wohaluhu, ”Jou Koano nënanga ani kuama, Jou Koano, ani tentara womatengo nihuloko waino nenangino hupaya wa l̄ë.

²³Ma Jou aha wahi barakati moi-moi o nyawa yosö setia deʼ yorikoto. Hababu ngaroka o wange nënanga ma Jou woni hilapahioka ahi Tuanga ngohino, mä ngohi toluku todiai odorou Jou Koanoika, o koano ma Jou woni iri-irikoka.

²⁴Hoʼ, hokä Jou Koano ngohi toni higumal̄aoka nowango o wange nënanga, hoko genangaö tanu ma Jou wohipidili hagala o bahayaino!”

²⁵Daha o Saul wïtemo o Daudika, ”Ma Jou wonihi barakati, ahi Ngohaka! Ngona aha nohasili hagala ani manarama magoronaka!” Daha o Daud ai dodagi wohi gila-gila, deʼ o Saulö wolio ai tauika.