Read Tobelo O SAMUEL MADODIHIRAKA 27 Bible Online

O SAMUEL MADODIHIRAKA 27 - Tobelo bible

O SAMUEL MADODIHIRAKA 27

¹O Daud woma tibanga ai hininga magoronaka, ”Sarakiaö dika o wange moiuku o Saul aha wohi toma. Hoʼ, koiwaka o ngekomo mahomoa ngohino, sawaliua tohi oara ahi diri o Filistinoka manga bereraika. De hoko gënanga o Saul aha wohi lingirokaua o Israel matonakoka, deʼ ngohi aha tohawanokaua.”

²Daha o Daud deʼ ai nyawa yaratuhu butanga yoiki deʼ manga japatioka o Akhisika o Moah aingohaka, o Gat makota makoano.

³Daha ünanga de ainyawa yogogere yorïdi o Gatoka, moi-moi deʼ toönanga manga tau manyawa. O Daud waao ima kinïki o ngo Ahinoam o Yisreelino mangoheka, deʼ o ngo Abigail, ngoi fao o Nabal o Karmel mangoheka.

⁴Maöraha o Saul woihene o Daud wohi oaroka ai diri o Gatika, ünanga wohi dailako okauaoli witagoko.

⁵Daha o Daud wogahoko o Akhisika, ”Nako Jou Koano nomau nosanangi dede ngohi nohi döaka ngohino o kota moi mai teteke mabuku-buku iha mangale ahi gogere mangï, hiädono ngohi Jou Koano nënanga tomahi dodogumua ngonaka Jou Koano o kota matitioka nënanga.”

⁶Daha o Ahkis wïhi döaka o Daudika o Ziklag makota, deʼ hababu gënanga o Ziklag makota idadi o Yehuda ma koano madutu hiädono o öraha nënanga.

⁷O Daud wogogere o Filistin manga bereraka madekana o taongo moi deʼo mede iata.

⁸Maöraha madekana gënanga o Daud deʼ ainyawa mamoi-mamoi yäparangi o Gesur manyawaika, o Girsi manyawa, deʼ o Amalek manyawa; hagala o hoana gënanga madekanoka yogogere o dairaka gënanga. Unanga waparangi o tonaka gënanga magurutika hiädono o Sur, gila-gila o Mesirika.

⁹Unanga wätoma o nyawa mata-mata o nau-nauru deʼ o ngo ngoheka ikali wä ora manga duba, o hapi, o keledai, o unta deʼ manga pakeangö. Ipaha ünanga wolio deʼ wiri himanga o Akhis.

¹⁰Nako o Akhis wïleha unangika, ”Okiaika ngini niparangi mamoi nënanga?” Daha o Daud wotemo unangika, ünanga woi koka o Yehuda o koreharail̄e idaduoka ekola o Yerahmeel ma nyawa manga dairaka ekola o Keni manyawa mangï yogö gogere madairaka.

¹¹Hagala o dairaka yapö parangi gënanga moiuaö ya mal̄aika yowango, hupaya uha naga o nyawa hagala o dairaino gënanga yakunu yoiki o Gatika mangale ihi ngahu okia igou-goungu yadiaioka o Daud deʼ ainyawa. Hoko gënanga o Daud ai manarama ünanga wogogere madekanino o Filistin manyawa manga bereraka.

¹²Mä o Akhis wïngaku o Daud deʼ watibanga ai hininga magoronaka, äihöana mahirete hoko gënangika iwï dohata ünanga, hiädono ünanga pakisa wodadi ahi gilaongo ai wowango magurutu.”