Read Tobelo O SAMUEL MADODIHIRAKA 28 Bible Online

O SAMUEL MADODIHIRAKA 28 - Tobelo bible

O SAMUEL MADODIHIRAKA 28

¹O öraha muruono naga ipaha o Filistin manyawa manga tentara ima toomu mangale yäparangi o Israeloka, deʼ o Akhis wïtemo o Daudika, ”Maraioka ngona nomangarati ngona deʼ ani nyawa kiani niparangi nihihi boa ngohino.”

²O Daud wohaluhu, ”Maraioka dika, damä Jou Koano aha namake mahirete okia yakunu Jou Koano ani gilaongo tadiai gënanga.” Daha o Akhis wato, ”Kayaoa! Ngona toni goraka nodadi ahi gogoana notatapu.”

³ O Samuel wohonengoka deʼ ünanga iwi dodora o Israel manyawa yongodumu ikali iwi jere o Ramaka ai kotaka mahirete. Maöraha muruono naga ipaha-paha o Saul wä duhuoka o Israeloka mata-mata yomai-maihi deʼ yogo gumatere.

⁴Maöraha o Filistinoka manga tentara ima toomu deʼ ima tau o Sunen makota madatekoka, o Saulö wätoomu o Israeloka manyawa, deʼ önanga ima tau o Gilboa mal̄okuoka.

⁵Maöraha o Saul wä make o Filistinoka manga tentara gënanga, ünanga duru wohawana.

⁶ Daha ünanga wogahoko o hidumutu ma Jouika, mä ma Jou wïbaluhua, yaoa deʼai nanere yaoa wapake deʼ o Urim deʼ Tumim ekola woiki o nabi-nabika.

⁷Hababu gënanga o Saul wätemo ai pegawe-pegaweika, ”Nimi lingiri momatengo o ngo heka mogogumatere, ngohi toiki munangika mangale togahoko ohi dumutu.” Onanga yohaluhu, ”O Endoroka naga mohou-houru hoko gënanga.”

⁸Daha o Saul woma halere hupaya o nyawa iwi nakoua. De iwi nïki o nauru yahinoto, ünanga wo ma jobo deʼ ünanga wo mahi ädono mohou-houru ami tauika gënanga o hutu-hutu. O Saul wato, ”Na ahoko o nyawa manga gurumini aha tahetongo manga romanga, deʼ nogahoko hupaya wohi ngahu okia aha idadi.”

⁹O ngo heka gënanga mohaluhu, ”Marai Tuangaö nohi öriki ma Koano Saul wä duhuoka o Israelokaino mata-mata yo mai-maihi deʼ yogö gogumatere. Yadodoa Tuanga nohi taili nohihi bodito hiädono ngohi ihi toma?”

¹⁰Daha o Saul wokoboto, wato, ”De ma Jou wowango-wango, ngohi tojaji ngona aha ini hukumua karana nodiai o hali nënanga.”

¹¹O ngo heka gënanga moleha, ”Tonagona manga gurumini kokiani täahoko mangale ngona Tuanga?” O Saul wohaluhu, ”O Samuel ai gurumini.”

¹²Maöraha o ngo heka gënanga mimake o Samuel, munanga moma pöaka deʼ motemo o Saulika, ”Yadodoa Tuanga nohitipu ngohi? Ahi Tuanga marupahi ma Koano Saul!”

¹³Ma koano wohaluhu, ”Uha nohawana! Nahetongo dika okia namake!” O ngo heka gënanga mohaluhu, ”Ngohi tamake o womaha ipuda o duniail̄e.”

¹⁴O Saul woleha, ”Sarakia marupa?” Mohaluhu, ”O nauru o bereki womatengo. Unanga wopuda ai pakeanga o juba.” Daha o Saul wohi öriki gënanga o Samuel, deʼ ünanga woma rukuku wïhoromati.

¹⁵Iböto gënanga o Samuel wïtemo o Saulika, ”Yadodoa nohiruaë ngohi? Yadodoa nohi ahokoli ngohi?” O Saul wohaluhu, ”Ngohi duru tomahi örikokaua karana o Filistin manyawa imi parangi, mä Jou wohi mal̄aka. Ngohi wohi baluhoka uaoli, yaoa taika o nabi-nabika, yaoa deʼ o nanere. Hababu gënanga togahoko ngonaika Bapa, hupaya Bapa no hihingahu okia kokiani tadiai.”

¹⁶Daha o Samuel wato, ”Okia mafaida ngohi nohi ahoko enahioko ma Jou woni mal̄aka deʼ idadi ani haturu?

¹⁷ Ma Jou wodiaioka ngonaika hokä wotemoka ngohino. Ma Jou wa l̄ëoka o Israel mapareta ngonaka deʼ wïhi döakoka o Daudika.

¹⁸ Ngona nalawanoka ma Jou Ai pareta deʼ noloku näbinaha o Amalek manyawa ikali hagala toönanga manga okia honanga.

¹⁹Ngona deʼ o Israeloka manyawa aha winï hilapahi o Filistin manyawaika. Yarehe ngona deʼ ani ngoha-ngohaka aha homa toomu dede ngohi; deʼ o Israel manga tentaraö ningodumu ma Jou aha wïnihi lapahi o Filistin ma nyawaika.”

²⁰O öraha gënanga dika, o Saul woruba wotigirangika o tonakoka hokä o dotoreke iwi ditifa, hababu ünanga duru iwi todokana woihene o Samuel ai demo-demo gënanga. Ikali ünanga duru iwi bole, hababu o kia-kiaua wol̄omo o hutu moi deʼ o wange moi.

²¹Mogogumatere gënanga momahitigi o Saulika deʼ mi make ünanga duru womahi örikokaua: hababu gënanga o ngo heka gënanga mitemo unangika, ”Ahi Tuanga, ngohi toma hangiharaka mangale tadiai okia Tuanga nogahoko.

²²Ho, kokiani ahi Tuangö natarima tongohi ahi gogahoko; nol̄omo mahuhutulu o inomo ngohi aha tonihidiai hupaya Tuanga yakunu nohi gila-gila ani dodagi Tuanga.”

²³O Saul watarimaua deʼ wotemo ünanga woluku wol̄omo. Mä ai pegawe-pegawe ö iwi ributu, ünanga wamoteke. Unanga wo momiki o tonakil̄e deʼ wogogeruku o joko-jokoka.

²⁴De majapatioka o ngoheka gënanga matoaka ami hapi ma ngohaka maboburere deʼ mal̄e o tarigu ikali mohido ojo, daha madiai o roti iragi-ragiua.

²⁵I böto gënanga mohidiai o inomo gënanga o Saulika deʼ ai pegawe-pegawe, daha önanga yol̄omo. Ipaha önanga yoiki o hutu gënanga dika.