Read Tobelo O SAMUEL MADODIHIRAKA 29 Bible Online

O SAMUEL MADODIHIRAKA 29 - Tobelo bible

O SAMUEL MADODIHIRAKA 29

¹O Filistin manyawa yatoomu manga tentara yongodumu o Afekoka, mä Israeloka manyawa ima tau o Yizreel ma Wai majobubuoka imahi tigi-tigika.

²O Filistinoka manga koano yamotoa ima jobo ima tuduono deʼmanga doomu-doomu moi-moi manyawa manga ngoë yaratuhu moi deʼ nagaö yaribuhu moi; o Daud deʼ ainyawa ima tuonoko manga poretoko ima kinïki deʼ ma koano Akhis.

³O Filistin manyawa yahibö balu-baluhu yamake önanga daha yoleha, ”Hagala o Ibrani manyawa gënanga mangale okia nënangoka?” O Akhis wohaluhu, ”Nenanga o Daud, ma Koano Saul ai pegawe mahira o Israelino. Unanga koai dekanoka wogogere ngohioka. Mulaenge ünanga woboa ngohino hiädono o wange nënanga, kota make uahi ünanga wahowono.”

⁴Mä o Filistinoka manga balu-baluhu gënanga iwi ngamo o Akhisika deʼ iwi temo unangika, ”Nihuloko o nyawa gënanga wolio o kotaika nihidö doa-doakoka unangika. Unanga yakunua woparangi homa kinïki dede ngone; uha-uha ünanga wonatipu ngone damä o parangi magoronaka. Koigoungua nënanga o öraha maoa-oa unangika mangale wo l̄ë ai koano ai hininga deʼ ma ngekomo wätoma tongone nanga nyawa?

⁵ Unanga ganga o Daud? Mangale ünanga mahira o ngongoheka yoselo-selo ikali yonyanyi hoko nënanga, ”O Saul wätomaka deʼ manga ribu-ribuhu, mä o Daud manga sä-säna.’ ”

⁶Daha o Akhis wïahoko o Daud deʼ wïtemo unangika, ”Ngohi tongaku deʼ ma Jou wowango-wango, ngona nosetia ngohino. Ngohi tosanangi nako ngona yakunu nohi datekuku o parangi nënanga magoronaka. Hababu mulaenge ngona noböa ngohino hiädono o öraha nënanga, kota makeua ani howono. Mä o kokoano mahomoa ini igoua ngonaika.

⁷Hababu gënanga nolio deʼ ani halamatoka, deʼ uha nodiai okianaga yapuda toönanga manga gangamo.”

⁸O Daud wohaluhu, ”O howono okia ngohi tadiaioka, Jou Koano? Nako hokä ani demo Jou Koano, Koano namakeua ahi howono okiaö ngohioka, mahira ngohi mulaenge toni leleani Jou Koano hiädono o öraha nënanga, yadodoa ngohi i hihi gumal̄aua homateke parangi hä lawani Jou Koano ani haturu?”

⁹Akhis wo haluhu, ”Ngona nohi öriki ngona toni pulono hokä ma Jou Ai malaikat. Mä ihibö balu-baluhu gënanga yaputuhoka ngona yakunua nonïki homa kao hoparangi dede ngomi.

¹⁰Hababu gënanga Daud, yarehe ngini mata-mata niwimö mal̄a-mal̄aka o Saul deʼ niboa ngohino, kiani nimomiki kani o ngoru-ngorumu deʼ itaiti nima jobo o wange kadeʼ ipotoka iböto.”

¹¹Karana gënanga yarehino mawange o ngoru-ngorumino, o Daud deʼ ainyawa ima goraka yolio o Filistin manga bereraika, o Filistinoka manga tentara gënanga magogiria imajobo o Yizreelika.