Read Tobelo O SAMUEL MADODIHIRAKA 3 Bible Online

O SAMUEL MADODIHIRAKA 3 - Tobelo bible

O SAMUEL MADODIHIRAKA 3

¹O öraha gënanga, o Samuel kao ngoha-ngohakohi gënanga wi leleani ma Jou o Eli ai gogoana matimioka. O öraha gënanga duru ikuranga naga o behehongo deʼ ohi matoko ma Jouino.

²O hutu moiuku, o Eli duru iwi perekioka deʼ ngadeke wopiliko gënanga, magogiria womä iduoka ai kamaroka,

³deʼ o Samuel womä idu womahi tigi-tigika ma Jou Ai Jaji ma Peti, o Tau Tebi-tebini magoronaka. Maöraha i batinguahi deʼ o hilo kai wango-wangohi,

⁴ma Jou wiahoko o Samuel, daha o Samuel wohaluhu, ”Ia, Ama!”

⁵Ipaha ünanga woma popata woiki o Elika deʼ wotemo ”Naga okia Ama? Yadodoa ngohi nohi ahoko?” Mä o Eli wohaluhu, ”Ngohi toni ahokua nolio noma iduoka.” Daha o Samuel woiki woma iduokaoli.

⁶Ipaha ma Jou wiahokoli o Samuel, mä o Samuel wohi örikua wiahoko gënanga ma Jou, karana komaiwahi ma Jou ima ade-ade dede ünanga. Hababu gënanga ünanga womomiki, daha woiki o Elika deʼ woleha, ”Naga okia Ama? Yadodoa Ama nohi ahoko?” O Eli wohaluhu, ”Ngohi toni ahokua, ahi ngohaka; nolio noma iduoka.”

⁸Mangale mahangeoka ma Jou wiahoko o Samuel; daha o Samuel womomiki deʼ woiki o Elika deʼ wotemo, ”Naga okia Ama? Yadodoa Ama nohi ahoko?” O öraha gënanga o Eli womamao ma Jou wiahoko o ngohaka gënanga.

⁹Hababu gënanga ünanga witemo o Samuelika, ”Nolio noma idu okali, deʼ nako ngona ini ahokoli, nato, ’Notemo, Jou, hupaya ani gilaongo toihene.’ ” Daha o Samuel woiki ai ngï ika woma idu okaoli.

¹⁰Ipaha ma Jou woboa, deʼ woma okoino o ngïoka gënanga deʼ wiahokoli o Samuel, ”Samuel, Samuel!” deʼ o Samuel wohaluhu, ”Notemo, Jou, hupaya ani gilaongo toihene.”

¹¹Daha ma Jou witemo unangika, ”Ngohi aha todiai okianaga moi o momodongo o Israel ma nyawaika, hiädono moi-moi o nyawa yoihene aha ima hiorikokaua.

¹²O wange gënanga ngohi ahatadiai hagala Tahi dë dëoka o Eli ai tau ma nyawaika mamulaengoka hiädono mabahaika.

¹³Tohi ngahuoka unangika aitau manyawa aha Tahukumu mangale kahi ädo-ädonika karana aingoha-ngohaka ihihikaukuoka Ngohi o Eli wohi öriki toönanga manga baradoha gënanga, mä ünanga wä ngamoua.

¹⁴Karana gënanga Ngohi tokoboto ima korona o Eli aitau ma nyawa, toönanga mangabaradoha duru ilö amo-amoko gënanga ahayakunua yaehe deʼ o huba ekola o huhuba o kiaö dika mangale kahi ädo-ädonika.”

¹⁵Iböto gënanga o Samuel woma iduokali, deʼ mangorumino ünanga womo miki deʼ wahelenga ma Jou Ai Tau mangora-ngorana. Unanga wohawana wohi ngahu o lolega gënanga o Elika,

¹⁶mä o Eli wiahoko ünanga, wato, ”Samuel ahi ngohaka.” O Samuel wohaluhu, ”Ia, Ama.”

¹⁷O Eli wileha, ”Ma Jou wonihi ngahu okia ngonaika? No ade-ade mata-mata ngohino. Nako o kia naga moi ngona na rahasia, maraioka ma Jou woni hukumu ngona.”

¹⁸Daha o Samuel wohi ngahu mata-mata gënanga o Elika. Koiwa moiö warahasia. Ipaha o Eli wotemo, ”Unanga o Jou, ma l̄aika Unanga wodiai okia wapulono yaoa.”

¹⁹O Samuel wodogo-dogo wolamoko. Ma Jou witomoteke ünanga deʼ wadiai o Samuel wotemo-temoka igoungu mata-mata idadi.

²⁰Hababu gënanga o Israeloka manyawa mata-mata o berera ingodumu gënanga ihi goungu o Samuel ganga ma Jou Ai nabi. O Samuel wotemo wohi geto-getongo, o Israel manyawa mata-mata ihi gihene. Ma Jou hoko genangikaohi womahi matoko Ai diri o Siloka, kiaka ünanga mangale madodihiraka woma himatoko Ai diri o Samuelika deʼ ima temo-temo dede ünanga.