Read Tobelo O SAMUEL MADODIHIRAKA 30 Bible Online

O SAMUEL MADODIHIRAKA 30 - Tobelo bible

O SAMUEL MADODIHIRAKA 30

¹O wange hinoto ipaha, o Daud de ainyawa yolio o Ziklag makotaika. Maöraha imahi ädono dokengoka, önanga yamake o Amalek manyawa yaparangioka o Yehuda maberera o koreharail̄e de yaparangi o Ziklag. Onanga yatomaua kaima tengö. Mä önanga yatuhuku yamata o kota gënanga de ihi gila-gila toönanga manga dodagi de ya ao ihikinïki o ngongoheka de o ngoha-ngohaka de ma nyawa mahomoahi. Onangö yatagokoka o Daud de ainyawa manga tau nyawa, yodogoika o Daud ngoi hekata yahinoto, o ngo Ahinoam de ongo Abigael. O Daud de ainyawa hokogenanga manga hininga ihuha, hiädono önanga mulaenge yoari ima togu-togumua hiädono yaboleo.

⁶O Daud ainyawa duru yohuha karana manga ngohaka de manga hekata yohihangoka. Hababu gënanga önanga yomau iwi kaweli o Daud de o helewo. Ho, o Daud naga o huha ma ago-agomo magoronaka, mä ai hininga wohikuatokali mangale ma Jou Ai Jou Madutu.

⁷ Daha o Daud witemo ma imam Abyatarika o Ahimelekh ai ngohakika, ”Naoino o Efod gënanga nenangino!” Done Abyatar wao o Efod gënanga unangika.

⁸Ipaha o Daud woleha ma Jouika, ”Kokiani taginïki o doomu yororuae yopoparangi gënanga? Kaiyakunu ngohi tahidoduruika önanga?” Ma Jou wohaluhu, ”Ia, naginïki; ngona aha nahidoduruika de nahilapahi yatö tago-tagokika.”

⁹Daha ima jobo o Daud imakinïki de ainyawa yaratuhu butanga. Maöraha önanga imahiädono o Besor ma Ngairoka, o Daud wohi gila-gila ai dodagi imakinïki de ainyawa yaratuhu iata; hode, o nyawa yaratuhu hinoto mahomoa yogogogere genangokadau. Karana dur yaboleoka de yakunokaua yatobongo o Besor ma Ngairi.

¹¹Manga dodagi magoronaka gënanga o Daud ainyawa imakamake de womatengo o ngohaka o nauru o Mesirino o tonaka malua-luasoka, daha önanga iwi ao makoano Daudika. Unanga iwi hidoäka wol̄omo de wokere,

¹²hoko genangö o kukisi o ara mahohoko, de o gosela hinoto o anggur matore. Iböto ünanga wol̄omo, ai kuata iliokali; inyata o wange hange iböto ünanga wol̄omua de wokerua!

¹³Ipaha o Daud wileha ünangika, ”Onaguna ani tuanga, de o kia ino ngona?” Wohaluhu o ngohaka gënanga, ”Ngohi o Mesir manyawa, o Amalek manyawa ai gilaongo. Ngohi wohimal̄aika ahi tuanga o wange hange ipahaika hababu ngohi topanyake.

¹⁴Ngomi mia parangioka o Kreti manyawa manga daera o Yehuda koreharail̄e idaduoka de o Kaleb ai ahali manga daera, de ngomi mia tuhuku mata-mataka o Ziklag ma kota.”

¹⁵Daha o Daud wileha unangika, ”Kanomodeke ngona nohi ngotaka ngohi o doomu yororuae manga ngï ika gënanga?” Wohaluhu, ”Ngohi tomodeke, itiyakunu Tuanga nojaji ngohino de ma Jou Madutu Ai romanga, ngohi nohitomaua Tuanga ekola Tuanga no hihilapahi ahi tuangika.”

¹⁶Daha ünanga wangotaka önanga odoomu yororuae manga ngï ika gënanga. O öraha gënanga odoomu yororuae gënanga imahi kokabarihika o ngïoka gënanga ingodumu, ikali yol̄omo, yokore de yorame-rame karana mangöe okia honanga yaora-oraino önanga yaoka o Filistin de o Yehuda mabereraino.

¹⁷Maöraha ibatingi iyarehino mawange, o Daud waparangi önanga de o parangi gila-gila hiädono yohutu. Mahomoa yaratuhu iatino o nyawa o gö ihi oara manga diri de yobarene o unta, kaimatengö mamoiua, manga haturuino yakunu yo otana.

¹⁸O Daud wohasili wohibebasi hagala ya oöra-oraka o Amalek manyawa, idogoika ngoi hekata yahinoto;

¹⁹manga kia naga moiö ma i hihangua. Mata-mata manga ngohaka o nauru deʼ o ngoheka ikali hagala manga kia honanga ya ora-oraino ya l̄e-l̄eika o Amalek manyawa, wal̄ëokali o Daud.

²⁰Madatekoka gënanga o Daudö waora mata-mata manga duba deʼ manga aiwani o gigini. Hagala o aiwani gënanga yabirï ma himangino, ihi tingaka hagala o kia honanga yaora-oraino mahomoa, deʼ önanga yato, ”Nenanga mangale to Daud ai hidoku!”

²¹Iböto gënanga o Daud woma idulu ainyawa yaratuhu hinotoika duru yabole mangale iwi nïki ünanga, deʼ yä mal̄a-mal̄aika o Besor ma Ngairi madatekoka. Onanga iwi buhuku o Daud deʼ ai nyawa, deʼ o Daud womahitigi deʼ watabea önanga.

²²Mä o Daud ainyawa manga hidogoronaka ima kao ima kinïki dede ünanga, naga yatorou de yokal̄il̄u. Onanga yato, ”Hagala o nyawa nënanga yonïkua; toönanga manga haku koiwa yamake okia honanga iora-oraino gënanga. Onanga duga-duga yakunu yä l̄ë toönanga manga ngohaka deʼ manga hekata, deʼ yoiki.”

²³Mä o Daud wäbaluhu, ”Ahi roriadodoto, uha ngini nidiai hoko gënanga deʼ okia ma Jou wonahi döakoka ngoneino! Koigoungua ngone Wona goanoka deʼ Wona hidöaka o utumu mangale o doomu yo ö ora-oraino gënanga!

²⁴Ho, o nyawa moiö yakunua ihi goungu o gogahoko gënanga! Mata-mata kiani yamake o hidoku ima kokadaene mangoë; o nyawa yogö gogere mangale yogoana okia honanga kiani yamake o hidoku kaima daëne hokä o nyawa yoi-oiki yoparangi.”

²⁵Ma duruino o hali gënanga o Daud wadiai idadi o datoro moi, deʼo Israeloka yamoteke hiädono o öraha nënanga.

²⁶Maöraha o Daud woma iduli o Zikelag mabereraika, ünanga wohi dingoto o hidoku moi okia honanga yaora-oraino gënanga o Yehuda makota-makota matutudaika iwi riwo-riwo, wato, ”Nenanga o ngongike mangale ngini okia honanga iora-oraino ngomi mia l̄ë-l̄ë ma Jou Ai haturuino.”

²⁷Hagala o kota gënanga enagënanga: o Betel deʼ o Rama o Yehuda o koreharail̄e idaduoka, o Yatir, o Aroër, o Sifmot, o Estemoa, o Rakhal, o Yerahmeel manyawa manga kota-kotaö, o Keni manyawa manga kota-kota, o Horma, o Bor-Asan, o Athak deʼ o Hebron. O kota mata-mata kiaka o Daud deʼ ainyawa yongö ngika-nginoka mamoi iböto, wahi dingoto o ngongike gënanga.