Read Tobelo O SAMUEL MADODIHIRAKA 31 Bible Online

O SAMUEL MADODIHIRAKA 31 - Tobelo bible

O SAMUEL MADODIHIRAKA 31

¹Oraha gënanga o Filistin manyawa yäparangi yälawani o Israel manyawa o Gilboa ma l̄okuoka. O Israeloka manyawa manga ngoë yohonenge genangoka, deʼ mahomoaohi yodogoika o Saul deʼ ai ngoha-ngohaka ihi oara manga diri.

²Mä o Filistin manyawa yanïki önanga deʼ yaruange o Saul ai ngoha-ngohaka o nauru manga hidogoronaka gënanga yohonenge yätoma; enagënanga, o Yonatan, o Abinadab, deʼ o Malkisua.

³O parangi duru kohagiria o Saul iwi higilolitino, deʼ ünanga mahirete iwi korona manga toimi ai haturu hiädono ai nabo ma ago-agomo koha ngoë.

⁴Daha o Saul witemo o goduruika waö ao-ao aidaë, ”Na rahuku ani oworo deʼ nohi topoko ngohi, hupaya ngohi uha ima higogule deʼ ihi toma o nyawa iwi nako-nakoua ma Jou gënanga.” Mä o goduru gënanga woloku witopoko, karana ünanga duru wi horomati. Hababu gënanga o Saul mahirete woma l̄ë ai oworo deʼ woma ruba ai diri ai oworo madoto mal̄okuku gënanga.

⁵Maöraha o goduru gënanga wï make o Saul wohonengoka, unangö woma ruba ai diri ai oworo madoto mal̄okuku daha wohonenge o Saul ai datekoka.

⁶Hoko gënanga o Saul ima kinïki deʼ aingohaka yaruange, deʼ mata-mata ainyawa ikali o goduru gënanga yohonenge o wange moi gënanga.

⁷Maöraha o Israeloka manyawa yogö gogere o Yizreel ma Wai mahonongaka deʼ o Yordan ma Ngairi o wange mahiwaroko idaduoka yoihene o Israeloka manga tentara ihi oaroka manga diri, deʼ o Saul ikali ai ngoha-ngohaka yohonengoka, önanga yoara yamal̄a hagala toönanga manga kota. Ipaha o Filistin manyawa yögogere hagala o kota gënanga.

⁸Yarehino maöraha o Filistin manyawa yoböa mangale yaora hagala o maiyeti, önanga yamake o Saul deʼai ngohaka ya ruange yohonengoka o Gilboa mal̄okuoka.

⁹Onanga yatobiki o Saul ai tomara deʼ ya l̄ë ai baju wohi poparangi, daha o Filistin manyawa yahi dingoto manga huhuloko o Filistin maberera mata-mataika mangale ihi ädono o abari maoa gënanga o kawahaika deʼ toönanga manga gomangika.

¹⁰Ipaha o Saul ai baju wohi poparangi gënanga yagogono o gomanga Asytoret matau magoronaka, deʼ ai roëhe ihi dapakuika o Bet-Sean ma kota mamehelika.

¹¹Mä o Yabesh manyawa o Gileadoka yoihene okia yadiaioka o Filistin manyawa o Saulika,

¹²daha hagala o nyawa duru yobobarani, genangoka deʼ ima dagi o hutu moi iahumu o Bet-Seanika. Onanga ihi guti o Saul ai maiyeti deʼ ai ngoha-ngohaka manga maiyeti o kota o meheloka gënanga daha yao o Yabeshika, deʼ yaharongo.

¹³Mata-mata ai kobongo yatoomu deʼ yalungunu o tamariska ma utu matimiuku o kotaka gënanga, ipaha önanga yopuaha o wange tumidi madekana.