Read Tobelo O SAMUEL MADODIHIRAKA 4 Bible Online

O SAMUEL MADODIHIRAKA 4 - Tobelo bible

O SAMUEL MADODIHIRAKA 4

¹O öraha gënanga o Filistin manyawa manga tentara ima toomu oka mangale yäparangi o Israeloka; hababu gënanga o Israeloka manga tentara yoiki o parangi mangï ika; önanga ima tau imahi tigi-tigika o Eben-Haezer, hode o Filistin manga tentara ima tau o Afekoka.

²O Filistin manga tentara mulaenge yaparangi, deʼ o parangi idadi deʼ magiria ipahaino, o Israeloka manga tentara yohihanga deʼ done yaribuhu iata yohonenge o parangi gënanga magoronaka.

³Maöraha o tentara yohö hihihanga mahou yolioka manga tauika, o Israeloka manga tutuda-tutuda yotemo, ”Yadodoa homa Jou wona mal̄aika ngone o Filistin manyawa ina hohihanga o wange nënanga? Niaino ngone hal̄e ma Jou Ai Jaji ma Peti o Siloika, deʼ ngone hao nenangino, hupaya ma Jou womau wona riwo ngone deʼ wonahi halamati ngone nanga haturuino.”

⁴ Daha önanga yähuloko o nyawa o Siloika mangale yal̄e o Jaji ma Peti marupa ma Jou Duru woko Kuaha aikurihi imomulia. O Eli aingohaka yahinoto, o Hofni deʼ o Pinehas, yanïki o Jaji ma Peti gënanga.

⁵O Jaji ma Peti gënanga imahi adonoka manga tau-tauoka, o Israel manyawa ima uli-ulili de hoko gënanga ma kuatil̄e, hi adono o dunia mai gora-gorakil̄euku.

⁶O Filistin ma nyawaö yoihene o ulili mailingi gënanga daha önanga yotemo, ”Yadodoa o Ibrani manyawa gënanga ima uli-ulili?” Mä maöraha önanga ihi öriki ma Jou Ai Jaji ma Peti imahi adonoka o Ibrani manyawa manga tau-tauoka,

⁷önanga idadi yohawana, deʼ yotemo, ”Naga o gomanga iböa toönanga manga tauika! Ngone hobodito! Komaiwahi ngone ha ohana o hali hokä hoko nënanga!

⁸Igoungu hobodito! Onagona yakunu ina hihalamati ngone o gomanga i kua-kuatino gënanga? Koigoungua ö o goma-gomanga yä tomaka o Mesir manyawa mahira o tonaka makokakahaka?

⁹Nihi barani nia hininga, hei o Filistin manyawa! Niparangi nima nau-nauru, nako kowali, ngini ahanidadi o Ibrani manyawa gënanga manga gilaongo, hokä mahira önanga yodadi tingini nia gilaongo. Hababu gënanga nia parangi de nima nau-nauru!”

¹⁰Ipaha o Filistin manyawa ima teke parangi de magiria deʼ o Israeloka manga tentara yohihangoka. O Israel manyawa yokoki oara manga tau kamoi-moi. Igoungu koha amoko yohihanga gënanga: yaribuhu moruange o Israeloka manga tentara yohonengoka.

¹¹Ma Jou Madutu Ai Jaji ma Peti o Israeloka manga haturu yaoraoka, o Eli aingohaka yahinoto, o Hofni deʼ Pinehas mayohonenge.

¹²Woma matengo o Benyamin ai hoanino wo oara o parangi mangïoka de waino o Siloika, deʼ o wange gënanga dika womahi adonoka genangika. Hokä manonako ai hininga mahuha, ai pakea nga wakakihoka deʼ o tonaka wogelengauku ai haekoka.

¹³O Eli, duru woha watere wapikiri mangale ma Jou Ai Jaji ma Peti mahalamati, magogiria wogogeruku o kuruhioka o ngekomo madatekoka, de watiba-tibanga. Maöraha o nyawa gënanga wohi ngahu o abari o Israel yohihangoka, o kota madol̄a yongodumu yododora koha kuatil̄e.

¹⁴O Eli woihene o dodora gënanga, daha woleha, ”O gigoro okia gënanga?” Oraha gënanga o nyawa kangano woma popopata o Elika; maöraha womahi ädono, ünanga wohi ngahu o abari ma dorou gënanga.

¹⁵O Eli naga ai umuru o taongo mori hiwo de tufange i böto, deʼ ünanga ngadeke wopiloko.

¹⁶O nyawa gënanga witemo o Elika, ”O wange nënanga ngohi to oara o parangi mangïoka de taino deʼ nënanga daha tomahi ädonino.” O Eli wileha unangika, ”Sarakia ma abari, ahi ngohaka?”

¹⁷O abari wo ö ao-ao gënanga wohaluhu, ”O Israeloka yokoki oaroka o Filistin manga himangoka. Ngone hohihanga duru koha amoko. O nyawa manga ngöe yohonenge, Bapa ani ngohakö yahinoto, o Hofni deʼ o Pinehas. De ma Jou Ai Jaji ma Peti yaoraoka o haturu!”

¹⁸Maöraha o nyawa gënanga wohi ngahu mangale o Jaji ma Peti gënanga o Eli iwi otaka ai kuruhioka wobitikangil̄e o ngorona ma amo-amoko mahonongaka. Unanga hoko gënanga iwi perekioka de ai burere hiädono maöraha iwi otaka ai tomara itobiki, de ünanga wohonenge. Unanga watudaoka o Israeloka o taongo moruata madekana.

¹⁹Oraha gënanga, o Eli ngoi hunungu, enagënanga o Pinehas ngoi hekata o ngohaka moao ami dodubuhooka, deʼ maöraha mongohaka itigioka. Maöraha moihene ma Jou Ai Jaji ma Peti yäoraka, ami dunungu deʼ ami rokata yohonengoka, itodokannino munanga mamao mahiri mongohaka, daha ipahaika itedekanua munanga mongohaka.

²⁰Maöraha munanga itigioka mohonenge, o ngongoheka imi riwo-riwo imi temo, ”Nohi kuata ani hininga! Ani ngohaka o nauru!” Mä munanga mohaluhua ekola mahi gihene önanga.

²¹O ngohaka gënanga iwihi romanga o Ikabod, yato, ”Ma Jou Madutu Duru womo Mulia ai Boa o Israel ma nyawaka ihihangoka.” — Madungutu enagënanga o Jaji ma Peti yaoraka deʼ ami dunungu ikali ami rokata yohonengoka. Hababu gënanga, munanga mato, ”Ma Jou Duru womo Mulia ai Boa o Israelokaka ihihangoka, karana ma Jou Ai Jaji ma Peti yä oraka.”