Read Tobelo O SAMUEL MADODIHIRAKA 5 Bible Online

O SAMUEL MADODIHIRAKA 5 - Tobelo bible

O SAMUEL MADODIHIRAKA 5

¹O Filistin manyawa yaora ipahaino ma Jou Ai Jaji ma Peti, önanga yao o Eben-Haezer deʼ yaino toönanga manga kotaika, o Asdod.

²Genangoka o Peti gënanga yao ihi ngohama toönanga manga gomanga matauika, o Dagon, de yakelengauku o gomanga ma dulada gënanga madatekoka.

³Maöraha yarehino mangoru-ngorumino o Asdod manyawa yaika o gomanga ma tauika gënanga, önanga yamake o Dagon madulada itifaka o tonakuku imotumuku, ma Jou Ai Jaji ma Peti mahimangoka! Onanga yagoraka o dulada gënanga de ihi gilio okaoli mangï ika.

⁴Mä yarehino mawange, mangoru-ngorumino, önanga yamake o dulada gënanga itifa okali o Jaji ma Peti mahimangoka gënanga. Ma moi nënanga o dulada gënanga mahaëke de magiama itobikoka ikelengauku o ngoranoka; duga-duga ma roëhe o dulada gënanga yadodoa uahi. (

⁵Hababu gënanga, hiädono o wange nënanga o gomanga o Dagon ma imam-imam mata-mata yohö huba-huba o Asdod oka kayo aguru o Dagon matau mangorana gënanga yadokoua.)

⁶Ipaha ma Jou wahukumu o Asdod manyawa deʼ madaira ma gilolotino deʼ o boro-boroho toönanga manga roëhika.

⁷Maöraha önanga yamake o kia magogiria idadi onangika gënanga, önanga yato, ”O Israeloka manga Jou Madutu wona hukumu ngone deʼ tongone nanga gomanga o Dagon. Ngone yakunua hamal̄aika o Jaji ma Peti igogogere nenangoka iholoi itedekanoli.”

⁸Hababu gënanga önanga yäahoko o Filistin manga koano yamotoa hupaya ima toomu, daha yäleha, ”O Israeloka manga Jou ai Jaji ma Peti gënanga ngone kiani hadodoaika?” Yohaluhu o kokoano gënanga, ”Nia tururu o Gat ma kotaika.” Ho, O Peti gënanga yatururu o Gat makotaika, o Filistin makota moi mahomoaka.

⁹Mä o Peti gënanga imahi adonika genangoka, ma Jou wahukumoli o kota gënanga deʼ idadi o gigoro duru kohä amoko. O kota manyawa gënanga, yaoa o gögö yaoa yatotimono wahukumu deʼ o boro-boroho yadu puda toönanga manga roëhika.

¹⁰Daha o Jaji ma Peti gënanga yototaka o Ekronika, o Filistin manga kota mahomoaoli. Kade imahi ädono o Peti gënanga dokengoka, makota manyawa yopöaka yato, ”O Israeloka manga Jou Madutu Ai Jaji ma Peti gënanga ina dotaoino hupaya ina toma ngone mata-mata.”

¹¹Hababu gënanga önanga ya ahoko o Filistin manga kokoano mata-mata hupaya ima toomu, daha yotemo, ”Nihigilio o Israeloka manga Jou Madutu Ai Jaji ma Peti gënanga mangï ika madodi hiraokahi, hupaya uha ina toma ngone deʼ nanga tau ma dol̄a.” O kota ingodumu idadi o gigoro karana ma Jou Madutu wä hukumu o kota manyawa deʼ duru koha dubuho.

¹²Hagala o nyawa yohö hone-honengua, yadaene o panyake o boro-boroho gënanga hiädono o kota manyawa gënanga imahi böaka ima gahoko o roriwo toönanga manga goma-gomangika.