Read Tobelo O SAMUEL MADODIHIRAKA 6 Bible Online

O SAMUEL MADODIHIRAKA 6 - Tobelo bible

O SAMUEL MADODIHIRAKA 6

¹Ma Jou Ai Jaji ma Peti naga o Filistinoka o mede tumidi madekana ipaha,

²O Filistin manyawa ya ahoko manga imam-imam deʼ yogö gogumatere daha yäleha, ”Ma Jou Ai Jaji ma Peti gënanga ngone kiani hasarakia? Nako ngone hohigilio mangï ika, sarakia madodagi?”

³Daha önanga yohaluhu, ”O Israeloka manga Jou Madutu Ai Jaji ma Peti gënanga uha ngini nihigilio hoko gënanga dika, mä kokiani nia domoteke de o ngongike mangale nia baradoha maduduhuhu. De hoko gënanga aha inihi togumu, de ngini aha nihi öriki yadodoa o Israeloka manga Jou Madutu gënanga kahoko genangika wini hukumu ngini.”

⁴”O duduhuhu okia kiani ngone hohi döaka ena ngika.” hagala o nyawa gënanga yoleha. O imam-imam gënanga yohaluhu, ”O boroho o gurasi motoa deʼ o karahe o gurasi motoa, imamoteke deʼ manga gegetongo O Filistin manga koano. Koigoungua o huha marupa o boro-boroho deʼ o karaheö ini bangoka ngini mata-mata, yaoa o kawaha yaoa o koano?

⁵Hoʼ, kiani nia diai nio duru o boro-boroho deʼ o karahe hoko gënanga magiria nia bereraka. De hoko gënanga ngini nihi doäka o horomati O Israel manga Jou Madutuika. Marai Unanga aha woma togumu wini hukumu ngini, deʼ nia goma-gomanga ikali nia tonaka.

⁶O kia mafaida ngini nia haëke nia togowini hokä o Mesir manga koano deʼ manyawa mahira? Uha nia wohanga sarakia ma Jou Madutu woma higogule önanga, hiädono önanga ima sikaokaua deʼ o Israel manyawa gënanga önanga kayä mal̄aika yatingaka o Mesir.

⁷Hababu gënanga, nidiai moi o goroba mahungi deʼ o hapi o dutu hinoto kaihü huhuohi deʼ komaiwahi yapake ihi tauru o goroba. Nihi ngohama o hapi hinoto gënanga o gorobaika, deʼ nia duhu o hapi mangoha-ngohaka gënanga ilio makurunga ma goronaika.

⁸Ipaha, nia l̄e ma Jou Ai Jaji ma Peti, nihi doa o gorobail̄e, deʼ nia kelenga madatekoka o peti madol̄a o arata o gurasi kokiani ngini nihihuba Unangika hokä nia baradoha madüduhuhu. Nia mal̄aika o hapi deʼ o gorona gënanga ima dagi mahirete.

⁹Nio lega nihidodiai mado dagi; nako o Jaji ma Peti gënanga yao mameta mabereraika mahirete, enagënanga o Betsemes makota, gënanga mamangarati o Israeloka manga Jou Madutu wohi böaoka o bodito iko kiria gënanga ngoneino. Mä nako o goroba gënanga madumutu dokengikaua, ngone aha hohi öriki o bodito gënanga o Israel manga Jou madutu okaua de yaino, mä duga-duga kaima daenika dika.”

¹⁰Hagala nyawa gënanga yamoteke; önanga yal̄e o hapi hinoto kayahü huhuohi, daha yonoa o gorobaika, mä mahapi ma ngoha-ngohaka gënanga ihi dotebenoino o kurunga magoronaka.

¹¹Daha o Jaji ma Peti gënanga ihi doa o goroba ma l̄okuil̄e, o petiö madol̄a o karahe o gurasi deʼ madulada o boro-boroho gënanga.

¹²Hagala o hapi gënanga ima dagi gila-gila mameta o Bet-Semesika; o aiwani gënanga ima dagi ihi gila-gila deʼ ipöa-pöaka, o ngekomo ma amoko deʼ koi rehenua yahigili ekola yaniraka. O Filistinoka manga koano ya motoa gënanga ya nïki gila-gila hiädono o Bet-Semes mari batingika.

¹³O öraha gënanga o Bet-Semes manyawa magogiriaka manga gandum youtuku o waioka. Maöraha önanga yamake o Jaji ma Peti gënanga, deʼ manga morene önanga yöbuhuku.

¹⁴O goroba gënanga ima togumu moi o helewo mapako-pako madatekoka, o Yosua ai dumuleoka, o Bet-Semes manyawa womatengo. O kota manyawa gënanga yabela-belaka o goroba magota gënanga daha yatoaka o hapi hinoto gënanga mangale yatuhuku o huhuba ma Jouika.

¹⁵Ipaha o Lewi manyawa ihi guti ma Jou Ai Jaji ma Peti deʼ o peti madol̄a o arata o gurasi gënanga, daha yakelenga o helewo mapako-pako mal̄okuoka gënanga. Iböto gënanga o Bet-Semes manyawa ihi huba o huhuba itö tuhu-tuhuku deʼ o huhuba mahomoahi ma Jouika.

¹⁶Maöraha o Filistinoka manga koano yamotoa gënanga yamake mata-mata gënanga, o wange gënanga dika önanga yolio o Ekronika.

¹⁷De hoko gënanga o Filistin manyawa ihi dongotaka ma Jouika o huhuba o baradoha maduduhuhu mangale o kota motoa manyawa yapopareta o Filisti oka manga koano yamotoa. Hagala o kota gënanga enagënanga: o Asdod, o Gaza, o Askelon, o Gat deʼ o Ekron. Mahidogoronaka naga de mabebeno o mehele, ma nagaö koiwa. O kota higetongo gënanga ihi dingoto moi o boroho o gurasi deʼ moi karahe o gurasi. Manyonyata idö dadadino gënanga enagënanga o helewo mapako-pako mangï önanga yogogelenga ma Jou Ai Jaji ma Peti. Hiädono o wange nënanga o helewo gënanga kanagahi o Yosua ai dumuleoka o Bet-Semes manyawa gënanga.

¹⁹Mä karana o Bet-Semes manyawa gënanga ihi hahere ma Jou ai Jaji ma Peti magoronauku, o nyawa yamori tumidi toönanga manga hidogoronaka ma Jou wätoma. Daha o kawaha imahi pake o duka manonako hababu ma Jou wahi bänga önanga o bodito hoko gënanga ma amoko.

²⁰Daha o Bet-Semes manyawa yotemo, ”O nagona yakunu yatäna ma Jou Ai himangoka, ma Jou Madutu wo Tö Tebi-tebini gënanga? O kiaika ngone kiani hototaka o Peti gënanga, hupaya i kurutika dede ngone?”

²¹Daha önanga yahidingoto manga huhuloko yahinoto o Kiryat-Yearim ma nyawaika deʼmanga behehongo hokä hoko nënanga, ”O Filistin manyawa ihi gilioka ma Jou Ai Jaji ma Peti. Niaino deʼ niao o Peti nënanga nia ngï ika.”