Read Tobelo O SAMUEL MADODIHIRAKA 8 Bible Online

O SAMUEL MADODIHIRAKA 8 - Tobelo bible

O SAMUEL MADODIHIRAKA 8

¹O Samuel iwi timonoka, ai ngoha-ngohaka yagoraka yodadi o Israeloka manga hakimi.

²Aingohaka mariaka ai romanga o Yoel deʼ ma dodoto ai romanga o Abia. Onanga yodadi o hakimi o Bersyeba mabereraka.

³Mä önanga yanïkua toönanga manga ama ai kalakuanga, mä duga-duga ihi akunu manga diri dika. Onanga yatarima o tiwi o uru mabokumu de yajuru hakimi o kawaha de madodagi iadilua.

⁴Hababu gënanga o Israel manga tutuda mata-mata ima toomu daha iwi himanga o Samuel o Rama mabereraka,

⁵ deʼ yotemo ünangika, ”Noihene Bapa, bapa initimonoka deʼ ani ngoha-ngohaka bapa yanïkua ani kalakuanga bapa. Ho, kayaoa bapa nï goraka o koano womatengo hupaya ngomi deʼ mia koanoka hokä o hoana deʼ o berera mahomoa.”

⁶Mä o Samuel wosanangua deʼ toönanga manga gogahoko gënanga. daha ünanga woma niata ma Jouika,

⁷deʼ ma Jou witemo, ”Natarima hagala manga gogahoko o hoana gënanga ngonaika. Hababu ngonaua önanga ini tila, mä Ngohi. Onanga ihi igo okauaoli Ngohi, hokä toönanga manga koano.

⁸Mamulaenge Ngohi taao önanga yohupu o Mesirino, Ngohioka deʼ önanga ima idulu deʼ yahuba hagala o gomanga deʼ o kia öraha nënanga önanga yodiai ngonaika, gënanga önanga yo diaioka Ngohino.

⁹Hababu gënanga natarima toönanga manga gogahoko; mä nahi doäka o hohininga önanga deʼ magou-goungu, deʼ nahi ngahu dama ma koano aha sarakia wahidiai önanga.”

¹⁰Hagala ma Jou Ai demo-demo gënanga o Samuel wohi ädono hagala o nyawaika yogö gaho-gahoko o koano womatengo unangika, wato,

¹¹”Dama hoko nënanga nia koano aha winihidiai ngini,” hoko gënanga o Samuel wahitararono. ”Unanga aha wapakisa nia ngoha-ngohaka yowohama yotentara; onangino utu hokä o duduono yokokureta, utu hokä o duduono o kudauku yobare-barene, deʼ utu mahomoa o duduono imadö dagi-dagi.

¹²Utu yägoraka yodadi manga kapita magogurutil̄e mangale o nyawa yaribuhu moi, deʼ utu mahomoa mangale o nyawa yamoritoa. O koano gënanga aha wäpakisa nia ngoha-ngohaka yopasolo ai dumuleoka, ai gugutuku mahasili yototoomu, yododiai hagala ai daë deʼ ai kureta wohi poparangi mapakakaha.

¹³Nia ngoha-ngohaka ongo heka aha wä huloko yodiai o minya mabou-bounu unangika deʼ iwihö hohakai deʼ yododiai ai roti.

¹⁴Unanga aha wal̄e nia dumule, nia angguru madumule deʼ nia zaitun madumule duru marö rahai deʼ wahi döaka ai pegaweika.

¹⁵Nia dumule deʼ nia angguru madumule mahasilino o hidoku ngimoi aha inihi daene masoungu o hidoku moi, daha wähi döaka yokokapita magogurutil̄e okaika deʼ ai pegawe-pegaweika.

¹⁶Unanga aha wal̄ë nia gilaongo, nia aiwani duru ma oa-oa deʼ nia keledai deʼ wapake mangale ai manarama.

¹⁷O hidoku ngimoi nia kabingi deʼ nia duba matikaino aha wa l̄ë o hidoku moi. Deʼngini mahirete aha nidadi ai gilaongo.

¹⁸Nako maöraha gënanga yadonoka, ngini aha nitaiana karana o koano ngini niwi iriki gënanga, mä ma Jou woluku wo ihene nia daiana.”

¹⁹Mä o hoana gënanga yolegaikaua o Samuel ai demo, koaholi önanga yato, ”Mal̄aika! Sarakia ö dika ngomi mio mau okoano.

²⁰Ngomi mio mau mima ketero deʼ o hoana mahomoa, tongomi mia koano kiani womi pareta ngomi deʼ womi tuda ngomi o parangi magoronaka.”

²¹O Samuel woihene iböto hagala toönanga manga demo gënanga, ünanga wohi ädono ma Jouika.

²²Ma Jou wohaluhu, ”Namoteke dika toönanga manga mau deʼ nigoraka o koano wotengo onangika.” Ipaha o Samuel wähuloko o Israel manyawa yolio manga tauika moi-moi.