Read Tobelo O SAMUEL MADODIHIRAKA 9 Bible Online

O SAMUEL MADODIHIRAKA 9 - Tobelo bible

O SAMUEL MADODIHIRAKA 9

¹Naga o nyawa womatengo wokaya deʼ ai kuahaka o Benyamin ai hoanino, ai romanga o Kish. Unanga o Behkoret ai tau ma nyawa, manga ahali majaga o Afiahino. Ai ama o Abiel deʼ ngoi el̄e ongo Zeror.

²O Kish toünanga aingohaka o nauru, ai romanga o Saul, o goduru womatengo wohailoa deʼ wo rikotil̄e. O Israel yo ngodumu moiua yoholoi yohailoa dede ünanga. Ai roëheö iholoi ikurutil̄e; o Israeloka manyawa manga gogurutil̄e duga-duga hiädono yogö kai belekaino.

³O wange moiuku o Kish ai keledai ihihanga. Hababu gënanga o Kish witemo o Saulika, ”Ni ao wololeleani womatengo, deʼ nia lingiri hagala o keledai gënanga.”

⁴Daha o Saul deʼ wilöleleani yoiki yatailako o Efraim ma daira deʼ mal̄oku ma buturungokaika deʼ o Salisa matonaka, mä yamakeua hagala o aiwani gënanga. Ipaha önanga yotagi gila-gila o Sahalim ma tonakika, mä hagala o keledai gënanga koiwa dika dokengoka. Onanga yalingiri o Benyamin madairaoka, mä ka parahaja dika.

⁵Maöraha önanga imahi ädono o Zuf ma tonakika, o Saul witemo wilö leleanika, ”Naino ngone holio dika uha-uha ahi Ama iholoi wohawatere wona tiba-tibanga ngone ngaro deʼ hagala o keledai gënanga.”

⁶Wolö leleani gënanga wohaluhu, ”Damäohi! O kotaoka nënanga naga ma Jou Madutu Ai gilaongo womatengo. Unanga duru iwi horomati o nyawa karana okia wohi demo salalu igou-goungu idadi. Naino ngone hoiki unangika, mudukua ünanga wakunu wona hingahu o kiaka hagala o keledai gënanga.”

⁷O Saul wato, ”Nako ngone hoiki homaka make dede ünanga, okia aha ngone hihi döaka unangika? Koigoungua, tongone nanga bilaono homagö gao-gao imataka, deʼ ngone konanga kia-kia okaua mangale hihi döaka ma Jou Madutu Ai gilaongika gënanga?”

⁸Wolö leleani gënanga wohaluhu, ”De madiai nagahi ngohioka o tiwi o humati moi. Genanga aha tihi döaka ma Jou Madutu ai gilaongika gënanga, hupaya ünanga womau wona hingahu ngone ino kiaka hagala o keledai gënanga.”

⁹”Kayaoa!” O Saul wohaluhu. ”Naino ngone hoiki.” Daha önanga yoiki o kotaika, ma Jou Madutu Ai gilaongo ai ngï ika gënanga. Maöraha önanga yadoa o doporono mameta o kotaika gënanga, önanga imaka make deʼ o momoholehe yamoruono naga yomau ima guiti o akere o humuoka. Daha önanga yäleha o momoholehika gënanga, ”Boteka yomai-maihi naga o kotaka?” (O öraha gënanga o nabi womatengo iwi hetongo womai-maihi, ho nako womatengo woigo woleha okianaga moi ma Jou Madutuika, ünanga wotemo hoko nënanga, ”Niaino ngone hoiki womai-maihika.”)

¹²”Iya, naga,” yo haluhu o momoholehe gënanga, ”nënanga daha ünanga wopahaika winihihiraika ngini. Nako ngini nitaiti, maraioka ngini yakunu kaniwi nïkika. Unanga daha wo böa o kotaika karana o wange nënanga o huhuba mangï mal̄okuoka o doporonoka naga o huhuba wohi huba mangale o kawaha. Unanga woböa uahi, ya aho-ahokino yakunua yol̄omo, karana ünanga kiani wohi barakati ihira o huhuba gënanga. Nako öraha nëna nga ngini nioiki, ngini aha niwi make ünanga wadoa uahi o doporono hupaya wol̄omo.”

¹⁴Ho, o Saul deʼ wilö leleani yoiki o kotaika, deʼ maöraha önanga yö ngohama o ngorana ma amo-amoko önanga ka imaka tagaika deʼ o Samuel magogiria woma dagi wameta o puji mangï ika o doporonoka.

¹⁵Hokä kanugonika gënanga ma Jou wohi döaka o behehongo o Samuelika hoko nënanga,

¹⁶”Yarehe o ngoromino done maöraha hoko nënanga, ngohi aha tihuloko womatengo o Benyamin ai hoanino woni ädono. Ni urapi ünanga deʼmanonako o minya mangale wo dadi o koano ahi umati o Israelokaika. Unanga aha wahi halamati Ahi umati o Filistin ma nyawaino. Ngohi tamakeoka ahi umati manga hangihara de toihene toönanga manga gari yogahoko o roriwo.”

¹⁷Maöraha o Samuel wimake o Saul, ma Jou witemo unangika, ”Neunanga manyawa ti heto-hetongoka ngonaika gënanga. unanga aha wapareta Ahi umati.”

¹⁸Oraha gënanga o Saul womahi tigi o Samuelika o ngorona ma amo-amoko madatekoka, de woleha, ”Nohi apongo Bapa, o kiaka ai tau womai-maihi gënanga?”

¹⁹O Samuel wohaluhu, ”Ngohi womai-maihi gënanga. Nioiki nihiraika o puji mangï ika o doporonoka, karana o wange nënanga ngini aha hol̄omo dede ngohi. Yarehe o ngoru-ngorumino hagala nialö leha-leha aha tahaluhu, iböto gënanga ngini yakunu nilio.

²⁰Mangale hagala nia keledai ihö hihihnga o wange hange ipö paha-pahaika gënanga, uha nihawatere, karana yamakeoka. Ikali, duru irö roragane o Israeloka ingodumu aha inihi döaka ngonaika deʼ ani tau manyawa.”

²¹O Saul wohaluhu, ”Ngohi nënanga o Benyamin ai hoanino, o hoana duru mai teteke o Israelokaka, deʼ ikali ahi tau manyawa o kia-kiaua yadaene o hoana gënanga magoronaka. Ho, yadodoa bapa notemo hoko gënanga ngohino?”

²²Ipaha o Samuel wä ahoko o Saul deʼ wilö leleani yowo hama o ngï ma amo-amoko magoronaika, daha ünanga wahi döaka o ngï ihö horomati onangika yaö aho-ahokino manga himangoka manga ngoë o nyawa done hoyamoruange.

²³O Samuel wohi gila-gila wätemo yohö hohakaika, ”Nihidiai o hiode ma akeme kangano tohi dodö dogumika nginioka gënanga.”

²⁴Ipaha yohö hohakai gënanga yal̄e o hidoku yairi-iri koka o hiode ma akeme mauguroka, daha ihi diai o Saul ai himangoka. O Samuel witemo, ”O hidoku nënanga tatinga-tingakoka mangale ngona hupayaöraha nënanga ngona yakunu nol̄omo nima kinïki deʼ yoböa-böaino mahomoa. Ika nol̄omo.” Daha o Saul wol̄omo. Ho, o wange gënanga o Saul wol̄omo ima kinïki de o Samuel.

²⁵Iböto gënanga önanga youti o puji mangïoka deʼyauku gënanga deʼ yowohama o kotaika. O Saul wihi döaka o dangiri o tau mal̄okuoka,

²⁶Daha ünanga womä idu. Maöraha ibatingoka. O Samuel wiahoko o Saul naga o katuoka gënanga, wato, ”Nomomiki, naino toni ngotaka ngona noma jobo.” O Saul womomiki, daha ima jobo ima nïki deʼ o Samuel.

²⁷Maöraha önanga ima hiädono o kota mabatingoka, o Samuel witemo o Saulika, ”Nihuloko wolö leleani gënanga woiki wona hihiraika.” Daha wolö leleani gënanga woiki, deʼ o Samuel wotemoli, ”Noma togumohi jai-jai nenangoka, ngohi tonihi ngahu ma Jou Madutu Ai behehongo ngonaika.”