Read Tojolabal Apocalipsis 1 Bible Online

Apocalipsis 1 - Tojolabal bible

Apocalipsis 1

¹Ja libro iti huax yala jasunc'a jeeji yi ja Jesucristo yuj ja Diosi ba oj bi cho see quitic ja quentic chomajquili, como yatjumotic ni ja yeni. Ja' huas sc'ana yal cabtic jastal oj to ni ec'uqui, jayuj ja Jesusi seca qui ja yangel ba oj jac yal cabi. Jaxa queni, quena ni Juanoni, yatjumon ni ja Jesucristoi.

²Jaxa huego oj cho cala huabyex ja jas yala ja Diosi soc ja jas cho yala ja Jesucristoi.

³Jel lec oj yil ja ma' huas sc'uman tzatz ja juun it ja ba huax yala jastal oj to ec'uqui. Jach ni ja ma' huas smacla soc huas sc'uan ja jas huanon stz'ijbajel cani, porque jel xa mojan ja tiempo oj c'ot smeranil spetzanil ja iti. Ja Juani stz'ijba ja juque iglesia

⁴Lec ay apetzanilex ja janec' creyente ayex ja ba juque iglesia tey ba Asia. Ja queni, Juanon nia. Sc'an to Dios, huanex yiljel ja syajal sc'ujol ja yen ja ma' ti ni ay jmoctiqui. Yena ni ja ma' ya culan ja satq'uinali, y yena ni oj cho jacuc cuando huax c'ot tic'an ja tiempo. Y jach ni, yena ni huax yaahuex laman. Jach ni ja Espíritu Santo ja ma' ti ni ay ja ba sti sat ja Diosi. Ja Diosi ti ni culan ec' huan yaajel ja mandari. Jaxa Espíritu Santo jahui huax cho sc'ana que oj bi ahuilex ja syajal sc'ujol ja Diosi.

⁵Jach ni ja Jesucristo ja ma' tola vida huas sea quitic ja smeranil ja Diosi. Ja yeni, tey ba sc'ab spetzanil ja ma' ch'ac ta ni chamuquei. Jach ni spetzanil ja ma' ay yatel ja ba luum iti, yena ni mandar ay yuja. Stz'acatal lec ja Cristo ja ma' jel huas syajtayotiqui. Sc'ulanotic ta ni librar soc ja jmultiqui, pero ja' ni yuj ja xchiq'uel ja spec'ai.

⁶Cho stz'acatal ja yeni, cuenta xa ni ayotic soc spetzanil ja ma' mandar xa ni aye yuj ja Cajualtiqui. Oj xa bi ochcotic ja ba sti sat ja Tatal Diosi ba oj caatic yi stz'acatal tola vida. Lec huax toyotic tola vida ja Cajualtic Jesucristo porque ja yeni, mi ni nunca oj ch'ac ja smandari. ¡Amén!

⁷Q'uelahuilex ja Cristo tac. Lajan soc huanon yiljel ja oj to jacuc ja Cristo ja ba yoj asoni. Mi ni jun cristiano ba mi oj yile cuando huax jac merani. Oj to cho yile ja ma' yaahue yajbuc ja Cajualtiqui. Jel oj ajyuc ja oq'uel ja ora jahui porque ja ba spetzanil ja lugari, ja cristiano oj oc'uc cuando huax yilahue huax jaqui y mi to huax suchi ja sc'ujolei. Pero lec ni oj oc'uquea.

⁸Ata huabilex ja jas huax yala ja Cajualtic Dios ja ma' mi ni jun cosa mi oj bob yuji: ―Ja queni, cuando mi to mach ay ja ba mundo, ti ni ayona, jaxa cuando huax c'ot tic'an ja tiempo, ti ni oj ajyucona, xchi nia. Y meran nia, ja yeni ti ni ay ja huego, cho ti ni ay cuando mi tox cujlaji ja satq'uinali. Jaxa cuando huax c'ot tic'an ja tiempo, ti ni oj ajyuca.

⁹Ja queni Juanon nia, mero ahuermanoonex. Jaxa jastal huanex lec huocol ja huenlex quermano jumasa, jach ni ja quen chomajquili. Pero siquiera, jpetzaniltic ti xa aytic ja ba sc'ab ja Diosi, jayuj ja' ni snihuanil jc'ujoltic ja jahua. Ja queni, como huanon ni yaljel ja yabal ja Diosi ‑ huanon ni staajel ti' ja Cajualtic Jesusi, jayuj ti lutjiyon preso ja il ba Patmos, iday, ja lugari, joybanubal puro ja'.

¹⁰Ja jastal ja c'ac'u culan cujtic huax huaj c'umtic ja Cajualtiqui, ti ni ajyiyon ja ili, pero huaj to cabi, lajan soc mi xa jcuerpo quen ja quioji porque ja ora jahui, ti jac jmoc ja Espíritu Santo. Ti cho cab jun ruido ja ba jpatiqui pero lajan soc yoq'uel jun trompeta, pero jel tzatz juntiro.

¹¹Ti cho yala caba: ―Ja huen Juan, tz'ijba can ja jas oj xa jea hui, tix cho jeca yi ja creyente jumasa ja ma' huas stzomo sbaje ja ba juque iglesia jau ja ba Asia. Es meran, tuctuquil ja bayei. Ay jun c'ole tey ba Efeso, soc jun c'ole tey ba Esmirna, soc jach ni ja ba Pérgamo, soc ja ba Tiatira, soc ja ba Sardisi, soc ja ba Filadelfia, soc ja ba Laodicea. Jach ni ch'ac yal caba.

¹²Ti jsutu jbaja. Huax c'ana oj quil machunc'a huas sc'umanoni, iday, cuando jsutu jbaji, ti quila ti sactec'tec' ec' juque candelerio puro oro.

¹³Jaxa ba snalan ja juque candelerio, ti tec'an ec' jun huinica. Pero mi cualquiera huinicuc ja jahui. Ja sc'ui, c'otel man ba yoc, jaxa sincho, nihuan lec ja sati man ba sni yaltzil, pero puro oro.

¹⁴Jaxa s'olomi, sac juntiro como jastal ja tenoq'ui. Sact'ojt'oj xta ni juntiroa. Jaxa sbac sati, lajan soc ja yajlel ja c'aq'ui porque ja yeni huas snaa spetzanil ja jas tey ba jc'ujoltiqui.

¹⁵Jaxa yoqui, chacjoljol xta juntiro como jastal jun taq'uin ti huax ajyi ba yoj c'ac'. Jach ni ja sc'umali, jachuc ja sruidoil como jastal huax juulji ja nihuac jai.

¹⁶Ja ba stojol sc'abi, yaman yuj juque c'anal, jaxa ba stii, tey jun espada xchabil lado ja yeji, pero jay xta snii. Jaxa sati, lajan soc ja c'ac'u cuando huax lijpi tzatz lequi.

¹⁷Cuando quila, ti mocyon ja ba sti sati, lajan soc chamel coyon, iday, jaxa yeni, ti syamahuon soc ja stojol sc'abi, ti yalaa: ―Mi la xihui porque quena ni desde cujlaji, soc quena ni man oj c'ot tic'an ja tiempo.

¹⁸Quena ni ja ma' sacui ni. Meran nia, chamyon nia pero ja huego, sac'anon xa sbaj spetzanil ja tiempo. Cho quena ni huax cala jas ora oj cham ja cristiano soc huax cho cala ba oj huajuc ja huax chamyei.

¹⁹Jayuj ja huego, Juan, tz'ijba ja jas huana yiljeli. Tz'ijba ja jas huan eq'uel ja huego ja ba mundo, soc jach ni ja jastal oj to ni ec'uqui.

²⁰Jel tuc ahuila ja juque c'anal yaman cuj ja ba stojol jc'abi, pero oj cala huab jasunc'a ja sbeji. Ja' ni ja jucuane ja ma' huas sc'ulane mandar ja juc'ole creyente ja ba tuctuquil iglesia. Jaxa juque candelerio ba puro oro, ja' ni ja juc'ole creyente. Jach ni yala cab ja Cajualtic Jesusi. Ja carta jumasa jecji yile ja juque iglesia: Ja carta it jecji ba Efeso