Read Tolpan Lucas 3 Bible Online

Lucas 3 - Tolpan bible

Lucas 3

¹(Locopyaya, Jesús püné tepyala na, gente sin 'yüsa la síjitsja Dios po'ó. Custjay ma nin la tjiji na p'in, Juan wínetsja, véletsja Dios mpes. Dios jas tji'yüsa la tjiji tsjan la veles. Juan niná Zacarías jatjam p'iyatsja jupj.) Juan wa cjuwá nt'a pǘ'ütsja. Jupj quelel véletsja na Dios mpes, jepa noypan israelpan tuluctsja. Tiberio jepa más püné waytsja ne'aj. Poncio Pilato jepa auxiliar waytsja Judea mo'ó. Herodes jepa waytsja Galilea mo'ó. Herodes jüpülücj Felipe jepa waytsja Iturea mo'ó, Traconite mo'ó 'ots'ipj. Lisanias jepa waytsja Abilinia mo'ó. Israelpan sin popa nepénowa jepa jatja watsja yupj. Anás, Caifás lal, sacerdotepan más püné witjacj waytsja yupj. Tiberio año quince nas tjijyü'ta jupj, Juan quelel véletsja na Dios mpes.

³Juan jun ta'á tjemey 'üsǘ püné la nt'a. Jordán lotsja 'üsǘ püné ne'aj. Ne'aj gente jis walap'a'a tjevele más 'ücj 'aplijila nsem yupj, malala nyuca la tjajay mpes. Más 'ücj yupj ca Dios jos jin la mijicj quinam, tjevele. Juan tjevele jupj ca 'üsüma jis mpa'tas, mpes bautizar jis mpalas ca. Mpes pjü ca jus nlayecj yupj quelel 'üsüs la mijicj quinam, Dios jos jin. Nin mpes Dios ma ca jola nsem yupj püna malala nyuca la tjajay mpes. Nin tjevele Juan yupj jis lal.

⁴Isaías Juan po'ó tepyaca püná. Profeta waytsja jupj, Isaías. Tepyaca popel mo'ó Dios tjevelá. Nin tepyaca jupj Juan po'ó:“Yom niná wa cjuwá nt'a ca mim. Pajal ca quelel mveles gente jilal napj mpes. Mpes yümücj ca mveles: ‘Qjuis Jepa Püné ca ncuwim. Nujola t'as ca nin la müjí quinam jupj jos jin. Malala nujola nun, jümücj la lu'ulú jinwá. Po ma malala nujola t'as quinam. 'Üsüs nujola t'as qjuis Jepa Püné jos jinwá’,nin ca mveles jupj.

⁵‘Nujisas jümücj viyavin, palavin jinwá quinam Dios lal. Ts'entuna nt'a tipit'a la müjí quinam. Joc' witjacj, neven 'ots'ipj, yumal la müjí quinam. La lu'ulú nt'a la t'atsj la müjí. La toc nt'a jüljül la müjí. Ca jümücj 'üsüs nsem qjuis Jepa Püné mpes. Nin p'iyá la müjí nujisas mo'ó. Qjuis Jepa Püné len̈ way ncuwim. Ma malala nujola t'as. Dios jola jin nujola t'as.

⁶Nin la tjüjí na, gente pjü way ca jus nlayecj Dios liji yupj 'ücj ca mpatjam jupj lal’ ”, nin tepyaca Isaías.

⁷Gente pajal pülücj tjiquil Juan nt'a. Jisastsja jupj ca bautizar lis mijis. Jis wala tjevele: —Nun nin p'iyá latsj jinwá. Nun solejé Dios po ma jos gente malala lajay. Len̈ way ca jis capj ntülüs. Nin mpes tjuculá nun napj nt'a, napj ca bautizar la numejay. Nujola nun nin lojí mpes, jupj ma ca nucopj ntülüs. T'üc' tulucj. Dios selé nun newa ma quelel lojí jupj jos jin.

⁸T'üc' way 'aplijila t'as nun, malala la tjüjí mpes, ne ca 'üsüs la müjí quinam Dios jos jin. Po ma nujola t'as nun pajal 'üsüs, nun judiopan mpes. Ma nujola t'as nun pajal 'üsüs, nun Abraham püna tüpü'ü popa mpes. T'üc' tulucj. Dios ca 'ücj la qjuijis niná pwen Abraham ts'uyupj ca mpalas.

⁹Dios pajal len̈ way ca jis capj ntülüs malala lajay. Yupj ma 'üsüs lajay, jupj ca jis capj ntülüs yupj pjü way. Yom jupj sine ma vyala jinwá ca la mijis Dios. Jupj sine ma vyala, jyo'o, 'awa mo'o ts'iyá. Nin ca la mijis Dios malala lajay jis lal. —Nin tjevele Juan yupj jis lal.

¹⁰Mpes yupj pajal pülücj la tjü'üy jupj lal: —¿Tsjan más 'ücj la qjuijicj cupj?

¹¹Juan jis wala tjevele: —Po ma la müjí püna la tjüjí jin. Jipj jin quip mat'e tyatj, pjaní ca ma'ayan jas quip cjuwá. Ve tyatj na, nin p'iyá ca la mijin.

¹²Nenéyawa niyom impuesto jat'anquepj tjiquil wa. Jisastsja Juan ca bautizar lis mijis. Juan lal tjowelepj: —Jipj qjuisin 'yüsa lejay Dios mpes. Qjuis wala mvelen tsjan jos Dios ca cupj la qjuijicj.

¹³Jis wala tjevele: —Püna p'in t'emel más pülücj nt'a nun jepa tjijyü'ta lal, niná tüpwe'qué nun. Ninana ma ca la müjí quinam. Jepa tjijyü'ta jinwá p'in ca nta'é jupj mpes. Más pülücj ma ca nta'é.

¹⁴Militarpan nepenowá tjiquil wa, la tjü'üy wa: —¿Tsjan jos Dios la qjuijicj cupj? Juan jis wala tjevele: —Malala nyuca lojitsja püná, ma nin la müjí quinam. Po ma tüpwe'qué, la p'a lacj jeyapj mpes nun jilal. Po ma ca mvelé yupj malala la tjajay, yupj ma malala la tjajay nam. 'Ücj nujisas t'as t'emel tsji' lojí jaylacj lal.

¹⁵Judiopan la nuctsja Dios ca jas majamas Yom pjaní jis capj la p'acj. Püna Dios tjevele ca nin la mijis jupj. Ne'aj tapatja nin yólatsja Juan p'iyá niná Yomen Dios se jamá.

¹⁶Mpes Juan jis wala tjevele pjü jis lal: —Nam 'a niná Yomen tulucj. Napj bautizar la nusejay 'üsǘ lal p'in. P'a wa ncuwim más püné napj lal. Nam 'a pajal tsjicj way jupj lal. Po 'üsüs napj lal jupj mpes tsji' lejay. Napj jupj caite syoc la p'in, 'ücj napj lal. Püné jupj pajal. Nun nepénowa nasa quelel lojí Dios jos jin. Jupj ca nu ma'ayas Dios Cjües. Nun nepénowa newa ma quelel lojí Dios jos jin. Jupj ca nucopj ntülüs.

¹⁷”Len̈ way ca nin la mijis. Ca 'üsüs la mijis jupj 'amá nt'a, ma ca malala mpü'üm ne'aj. Ca ne'aj mo'onsos 'üsüs witjacj, ma ca malala jis mpalas. Pjü malala ca mü'ümüs; jupj 'yüma na, len̈ pjacj se wat'ata jupj 'owus —nin tjevele Juan yupj jis lal.

¹⁸Juan p'a wa nin p'iyá tjevele wa judiopan jis lal; pülücj tjevele. Jupj tjevele más 'ücj yupj más 'üsüs ca la mijicj quinam Dios jos jin. Jis walap'a'a tjevele Dios pajal 'üsüs la tjiji yupj mpes.

¹⁹Juan cus tjeve'le yupj jis jepa ne'aj, jepa niná Herodes ló. Cus tjeve'le vosas lal tjowaya mpes, vosas Herodías lotsja. Pjü way Herodes malala nyuca la tjiji mpes wa cus tjeve'le jupj.

²⁰Herodes ma jostsja Juan tjevelá. Nin mpes p'a wa malala la tjiji: cawilta mo'o tje'yonsa Juan. Juan bautizar la tjiji Jesús.

²¹Custjay cawilta mo'o 'onsa secj p'in, Juan bautizar la tjiji Jesús. La p'a pülücj bautizar lis tjiji na, Juan bautizar la tjiji wa Jesús. Bautizar tepyala na, Jesús Dios lal tjevele. Dios lal tjevele na, tsjun po'o tsjicj way la tücüeme, jun cjol tepyala.

²²Nepé Dios Cjües palá tjac' Jesús jay nt'a la 'osos. Sipipj jinwá justa lay tepyala jupj. Tsjun po'o nepé vele pjactsja: “Jipj napj Natjam. Quelel la 'ejay pajal napj. Pajal 'üsüs najas jipj lal.” Qui'á sin tapac püna tapatja jis lá, José yupj popa p'iyá püs naya tüpü'ü.

²³Jesús quelel sin mü'üsüs la mijis na, nasa way año tréinteya tyá'atsja jupj.Gente yólatsja jupj ne José jatjam.José niná Elí jatjam waytsja jupj.

²⁴Elí Matat jatjam waytsja;Matat Leví jatjam waytsja;Leví Melqui jatjam waytsja;Melqui Jana jatjam waytsja;Jana José jatjam waytsja;

²⁵José Matatías jatjam waytsja;Matatías Amós jatjam waytsja;Amós Nahúm jatjam waytsja;Nahúm Esli jatjam waytsja;Esli Nagai jatjam waytsja;

²⁶Nagai Maat jatjam waytsja;Maat Matatías jatjam waytsja;Matatías Semei jatjam waytsja;Semei José jatjam waytsja;José Judá jatjam waytsja;

²⁷Judá Joan'an jatjam waytsja;Joan'an Resa jatjam waytsja;Resa Zorobabel jatjam waytsja;Zorobabel Salatiel jatjam waytsja;Salatiel Neri jatjam waytsja;

²⁸Neri Melqui jatjam waytsja;Melqui Adi jatjam waytsja;Adi Cosam jatjam waytsja;Cosam Elmodam jatjam waytsja;Elmodam Er jatjam waytsja;

²⁹Er Josué jatjam waytsja;Josué Eliezer jatjam waytsja;Eliezer Jorim jatjam waytsja;Jorim Matat jatjam waytsja;

³⁰Matat Leví jatjam waytsja;Leví Simeón jatjam waytsja;Simeón Judá jatjam waytsja;Judá José jatjam waytsja;José Jonán jatjam waytsja;Jonán Eliaquim jatjam waytsja;

³¹Eliaquim Melea jatjam waytsja;Melea Mainán jatjam waytsja;Mainán Matata jatjam waytsja;Matata Natán jatjam waytsja;

³²Natán David jatjam waytsja;David Isaí jatjam waytsja;Isaí Obed jatjam waytsja;Obed Booz jatjam waytsja;Booz Salmón jatjam waytsja;Salmón Naasón jatjam waytsja;

³³Naasón Aminadab jatjam waytsja;Aminadab Aram jatjam waytsja;Aram Esrom jatjam waytsja;Esrom Fares jatjam waytsja;Fares Judá jatjam waytsja;

³⁴Judá Jacob jatjam waytsja;Jacob Isaac jatjam waytsja;Isaac Abraham jatjam waytsja;Abraham Taré jatjam waytsja;Taré Nacor jatjam waytsja;

³⁵Nacor Serug jatjam waytsja;Serug Ragau jatjam waytsja;Ragau Peleg jatjam waytsja;Peleg Heber jatjam waytsja;Heber Sala jatjam waytsja;

³⁶Sala Cainán jatjam waytsja;Cainán Arfaxad jatjam waytsja;Arfaxad Sem jatjam waytsja;Sem Noé jatjam waytsja;Noé Lamec jatjam waytsja;

³⁷Lamec Matusalén jatjam waytsja;Matusalén Enoc jatjam waytsja;Enoc Jared jatjam waytsja;Jared Mahalaleel jatjam waytsja;Mahalaleel Cainán jatjam waytsja;

³⁸Cainán Enós jatjam waytsja;Enós Set jatjam waytsja;Set Adán jatjam waytsja,Dios p'iyá Adán la tjiji jupj. Nintsja püna tapatja jis lá, José ne yupj popa p'iyá, püs naya tüpü'ü jupj.