Read Tolpan Hebreos 3 Bible Online

Hebreos 3 - Tolpan bible

Hebreos 3

¹Natjampan, nun Dios juts'a'á. Jupj la nu t'ya nun. Pjü way napj tjevelé Jesús po'ó, pjü way nujola t'as lovin. Dios jas tjejyama jupj cupj nt'a la veles Dios po'ó. Jesús sacerdote más püné way jupj; jupj jama Dios nt'a la veles cupj mpes. Niná pyonecj jupj po'ó.

²Dios la t'ya Jesús, ne Jesús la tjiji pjü way Dios jostsja jin. Jesús nin p'iyá la tjiji Moisés la tjiji jinwá, Moisés ne tsjay püna tüpü'ü jupj. Moisés la tjiji wa Dios jostsja jin Dios gente jis lal.

³Mop'in Jesús más 'üsüs Moisés lal. Napj ca mpac tsjan mpes ca jus nlayé más 'üsüs jupj Moisés lal. Yom wa si jünsa más 'üsüs way wosis lal; jupj p'iyá la tjiji wosis. Nin p'iyá, Jesús más 'üsüs Moisés lal.

⁴Wosis p'iyá jupj sin nin jas tjijyünsa tulucj. Gente sin jajünsüpj yupj jis wa. Nin p'iyá niná, gente yupj sin nin patja tulucj. Dios lis tjiji. Dios lis tjiji pjü way.

⁵Moisés pjü way la tjiji Dios jostsja jin Dios lal japon jis lal. Moisés yupj jilal tjevele tsjan ca sin mü'üsüs la mijis Dios p'a jawas. Moisés 'üsüs tsji' la tjiji Dios mpes; newa mozo way p'intsja jupj.

⁶Cristo la tjiji wa pjü Dios jostsja jin Dios lal japon jis lal. Nin p'in más 'üsüs way jupj Moisés lal. Cristo Dios Jatjam jupj, mozo tulucj jupj. Moisés mozo p'intsja jupj. Cristo se jamá Dios ts'uyupj pjü way. Cupj pyonecj Dios po'ó, Cristo po'ó 'ots'ipj; velecj la p'a jilal pyonecj mpes. Dios jos lovin nin lijicj. Selecj p'a jawas 'üsüs ca qjuis mpalas Dios mpes. Dios jos lovin 'ücj qjuisas nsem niná mpes. Lijicj na jupj jos jinwá, t'üc' way cupj jupj gentá. Dios lal japon ca mpatjam Dios lal.

⁷Nujola tapalas Dios Cjües tjevelá Dios Popel po'ó. Tjevele:“Yacjaj, niná pjo'oqué na Dios velá,

⁸nusin tjü'üsüs niná, la müjí wa jupj vele jin.Judiopan püna tapatja ma nin la tjajay tjelyawun̈ na wa cjuwá nt'a.Yupj ma quelel la tjajaytsja Dios tjevele jinwá. Dios jay pjucj tjevyaja jinwá tepyala la tjajay yupj.”

⁹Dios tjevele:“Nun solejé tsjan la tjajay yupj. Nenem püna tapatjá, nun yupj sin popa p'iyá püs naya potjaqué. Año cuarenta mpes yupj tjunuc pajal 'üsüs la tjejay napj yupj mpes.Newa nin, malala la tjajaytsja, yólatsja napj ma jis capj ntül yupj. Nay pjucj tjevyaja jinwatsja yupj mpes.

¹⁰Po ma najastsja yupj la tjajay.Napj tjevelé: ‘Yupj lovin ma jisas napj najas jinwá. La p'a wa quelel lajay p'in. Ma quelel sin 'yǘsatsja tsjan najastsja napj.’

¹¹Po ma najastsja yupj malala la tjajay. Mpes napj nin tjevelé tsjan ca la mejay.Tjevelé: ‘Püs way mpes pajal malala jis tepyálatsja wosis cjuwá nt'a. Napj quelel se 'atsja momas, 'ücj jis la püt'üs ne'aj. Quina yupj ma polel ne'as jil 'amá niná nt'a, nin ca la mejay napj.’ ” Dios nin tjevele jupj Popel po'ó.

¹²Natjampan, 'in tjajama. Ma la müjí yupj la tjajay jinwá; pajal malala la tjajay yupj. Lovin mponé Dios lal, jupj ne pü'ü lovin. Ma poné Dios lal, ma so con̈có jupj.

¹³Lovin nin mvelé niná nunwá. Lovin la müjí Dios jos jinwá. Nin polel lojí custjay, Cristo ma niswa tjac' na p'in. Mpes malala lojí na, ca jus nlayé 'üsüs tulucj nu mpalas nin la tjüjí mpes, ne ma malala ca quelel la müjí niswá.

¹⁴Püna qjuisastsja na Cristá, t'üc' way pajal tepyonecj jupj po'ó. Más 'ücj lovin nin pyonecj. Mpes nin ca qjuis mpalas pjü way Dios tjevelá. Nin ca qjuis mpalas Cristo se con̈cocj mpes.

¹⁵Dios Popel vele:“Yacjaj, niná pjo'oqué na Dios velá, nusin tjü'üsüs niná, la müjí wa jupj vele jin.Judiopan püna tapatja ma nin la tjajay, tjelyawun̈ na wa cjuwá nt'a.Dios jay pjucj tjevyaja jinwá tepyala la tjajay yupj.”

¹⁶Nun solejé pjacj ma quelel la tjajaytsja Dios jostsja jin, Dios lal tjepjyacan̈ na. Moisés jis ticyuna Egipto mpe, yupj p'iyá pjü way ma quelel la tjajaytsja Dios jostsja jin.

¹⁷Año cuarenta mpes nin la tjajay Dios ma jostsja jin. Nun solejé pjacj cuscú ninatsja. Yupj ne niná malala la tjajay wosis cjuwá nt'a. Yupj tecya'lin̈ ne'aj.

¹⁸Dios tjevele:“Püs way mpes pajal malala jis tepyálatsja wosis cjuwá nt'a. Napj quelel se 'atsja momas, 'ücj jis la püt'üs ne'aj.Mop'in yupj ma polel ne'as jil 'amá niná nt'a, nin ca la mejay napj.” Nun solejé pjacj jilal Dios nin tjevele niná. Ma la tjajay jupj tjevele jin, yupj jilal nin tjevele.

¹⁹Mpes qjuisin 'yüsa nin mpes ma polel tjil 'amá niná nt'a, Dios lal ma topon mpes.